«اشىق پارتيا» تۇجىرىمداماسىن ىسكە اسىرۋ ماقساتىندا بۇگىن «AMANAT» ورتالىق اپپاراتىندا كوپفۋنكتسيونالدى ءباسپاسوز ورتالىعى اشىلدى. وندا تۇراقتى تۇردە بريفينگتەر، ءباسپاسوز كونفەرەنتسيالارى جانە مەديا سالاسىنىڭ وكىلدەرىمەن ءتۇرلى فورماتتاعى كەزدەسۋلەر وتەدى.
«AMANAT» جانىنداعى ءباسپاسوز ورتالىعى پارتيانىڭ حالىقپەن كەرى بايلانىسىنىڭ، پارتيالىقتاردىڭ اشىقتىعى مەن جاريالىلىعىن ارتتىرىپ، سونداي-اق باق-پەن جۇمىس ىستەۋدە جاڭا تاسىلدەردى ەنگىزۋدىڭ ءتيىمدى قۇرالدارىنىڭ ءبىرى بولماق.
«1 ناۋرىزدا وتكەن كەزەكتەن تىس سەزدە «AMANAT» توراعاسى قاسىم-جومارت توقاەۆ پارتيانى جاڭعىرتۋ، ونىڭ ىشىندە سايلاۋشىلارمەن كەرى بايلانىستى كۇشەيتۋگە جانە پارتيالىقتاردىڭ قوعاممەن اشىق جۇمىس ىستەۋىن قامتاماسىز ەتۋگە قاتىستى نەگىزگى مىندەتتەردى اتاپ ءوتتى. سايلاۋالدى باعدارلامانىڭ ورىندالۋى، دەپۋتاتتىق فراكتسيانىڭ جۇمىسى جانە پارتيالىق جوبالاردىڭ ىسكە اسىرىلۋى تۋرالى جەدەل اقپارات بەرۋ ماقساتىندا بۇگىن كوپفۋنكتسيونالدى ءباسپاسوز ورتالىعى اشىلدى. بۇل – پارتيا قىزمەتىنىڭ اشىقتىعىن قامتاماسىز ەتۋ جولىنداعى قادامداردىڭ ءبىرى»، دەپ اتاپ ءوتتى «AMANAT» پارتياسىنىڭ حاتشىسى رينات كەرتاەۆ.
سونداي-اق، ءباسپاسوز كونفەرەنتسيالارى پارتيانىڭ الەۋمەتتىك جەلىدەگى جەكە پاراقشالارىندا ونلاين رەجىمدە كورسەتىلەدى. ءباسپاسوز ورتالىعى جۋرناليستەر مەن سپيكەرلەرگە ىڭعايلى بولۋ ءۇشىن قاجەتتى مۋلتيمەديا جابدىعىمەن جابدىقتالعان. «AMANAT» پارتياسى جانىنداعى ءباسپاسوز ورتالىعىنىڭ جەتەكشىسى بولىپ قىمبات قالي تاعايىندالدى.
«ءباسپاسوز ورتالىعى پارتيانىڭ كۇن تارتىبىندەگى وزەكتى ماسەلەلەر بويىنشا اقپاراتتى تالقىلاۋ جانە تاراتۋ ورنىنا اينالۋى ءتيىس. ءداستۇرلى ءباسپاسوز كونفەرەنتسيالارىنان بولەك، ىسكەرلىك ءارى بەيرەسمي جاعدايدا ءتۇرلى كەزدەسۋلەر ۇيىمداستىرۋ ءۇشىن ديالوگ الاڭىن ۇسىنامىز»، دەدى قىمبات قالي.
ءباسپاسوز ءماسليحاتىنىڭ نەگىزگى تاقىرىپتارى «AMANAT» پارتياسى دەپۋتاتتىق فراكتسياسىنىڭ زاڭ شىعارۋ باستامالارى، قوعامدىق كەڭەستەر مەن رەسپۋبليكالىق قوعامدىق قابىلداۋ بولمەسىنىڭ قىزمەتى، پارتيالىق جوبالاردى ىسكە اسىرۋ جانە سايلاۋالدى باعدارلامانى ورىنداۋ بولادى دەپ جوسپارلانىپ وتىر.
