شىمكەنتتە 39 جاستاعى ەر ادامدى ءوز ايەلى پەدوفيل دەپ ايىپتادى. كەلىنشەكتىڭ ايتۋىنشا، ول 8 جاسار تۋعان قىزىنا ازعىندىق جاساعان دەپ حابارلايدى “ادىرنا” ۇلتتىق پورتالى stan.kz-كە سىلتەمە جاساپ.
سۇمدىق جايتتى جەتكىنشەكتىڭ ءوزى اناسىنا ايتىپ بەرىپتى. پوليتسەيلەر وتاعاسىن بىردەن ۇستاعانىمەن، كوپ ۇزاماي بوساتقان.
اشىنعان ايەل ءىستىڭ توقتاتىلۋىنا كۇيەۋىنىڭ تەرگەۋشى مەن پروكۋرور تۋىستارى ىقپال ەتكەن دەپ ەسەپتەيدى. سوندىقتان كۇيەۋىنىڭ قايتادان قامالۋىن تالاپ ەتىپ وتىر. الايدا ءتارتىپ ساقشىلارى جاسوسپىرىمگە سەكسۋالدى سيپاتتاعى زورلىق-زومبىلىق كورسەتۋ بابىمەن ءىس قوزعالىپ، ساراپتاما تاعايىندالعانىن جەتكىزدى.
اتى-ءجونىن اتاماۋدى وتىنگەن ايەلدىڭ ايتۋىنشا، كۇيەۋىنىڭ ازعىن ەكەنىن اقپاندا بىلگەن. كورشى كەلىنشەكتەرمەن سەرۋەندەۋگە شىقپاق بولعاندا قىزى ۇيدە اكەسىمەن جالعىز ءوزىن قالدىرماۋىن ءوتىنىپ شىرىلداپتى. سەبەبىن سۇراعاندا، سۇمدىق جايتتى ايتقان. ءۇش ۇل مەن ءبىر قىز تاربيەلەپ وتىرعان اكە جىلعا جۋىق ۋاقىت ءوز قىزىنا بىلگەنىن ىستەپ كەلىپتى دەيدى كەلىنشەك.
«مەن ۇيدە جوق كەزدە ۇلكەن بالامدى بارىپ ويناپ كەل دەپ يگروتەكاعا جىبەرەدى ەكەن. ال كىشكەنتايلار وتىرادى ەكەن مۋلتفيلمگە قاراپ، ىستەپ وتقان ىسىنە»، – دەيدى جابىرلەنۋشى.
مۇنى ەستىگەن ايەل دەرەۋ پوليتسيا ەمەس، اتا-ەنەسىن شاقىرعان. بىراق كۇنىگە ەسىرتكى شەگەتىن ونى تۋىستارى «ءوزىمىز ەمدەپ الامىز» دەپ اراشالاپتى. كەيىن ۇرىپ-سوعاتىندى شىعارعان سوڭ پوليتسياعا ارىز ءتۇسىردىم دەيدى.
«تەرگەۋشى جانە دە پروكۋرور بارلىعى ءبىر اۋىلدان، كەيىن ءبىلدىم ءبارى ءبىر اۋىلدان ەكەن. رۋلاس. ءىستىڭ بارلىعىن جىلى جاۋىپ وتىر. بەرگەن ايعاقتاردىڭ ءبارىن جوققا شىعارىپ وتىر. سول كەزدە جاڭاعى ايتتى، مەن بۇل جاعداي پەدوفيلدىك ءۇشىن ارى كەتسە 10 جىل وتىرامىن. 10 جىلدان كەيىن ءبارىبىر شىعىپ، سەنى جانە قىزىمدى ولتىرەمىن دەدى سول كەزدە»، – دەيدى ايەل.
اسا اۋىر ايىپپەن 10 جىل وتىرماق تۇگىلى، 10 كۇننەن كەيىن ەركىندىككە شىققانىنا زاڭگەرلەر دە اڭ-تاڭ. ادۆوكات نۇركەن قالمىرزاەۆ بۇل ءىس بويىنشا كۋاگەردىڭ بار ەكەنىن ايتادى. بىراق تەرگەۋشى بۇعان ءمان بەرمەپتى.
«نەگىزى، كۋا بولعان ءبىر ءجاسوسپىرىم بالا بار. ونى تەرگەۋشىگە ايتقان دەيدى. بىراق تەرگەۋشى ونى ءوزىنىڭ جاۋاپ حاتتاماسىندا كورسەتپەگەن. پروكۋرور ءوز قاۋلىسىندا جازادى سوت ساراپتامالارى دايىن بولماۋىنا بايلانىستى وسىنداي بوساتىلۋعا جاتادى دەپ. ال نەگىزى مۇنداي جاعدايدا زاڭ بويىنشا سوزىلۋى كەرەك ەدى. سەبەبى ەرتەڭ ول ساراپتامانى پروكۋرور بىلمەيدى عوي. ول ەرتەڭ قورىتىندى بەرەتىنىن مىسالى»، – دەيدى ادۆوكات نۇركەن قالمىرزاەۆ.
ال پوليتسەيلەر بولسا ىسكە ەندى كىرىسىپ جاتىر. ياعني، تەرگەۋشىنى اۋىستىرىپ، كۋاگەرلەردەن جاۋاپ الۋدى باستاپتى. ساراپتامالار دا تولىق تاعايىندالعانىن جەتكىزدى. بىراق ءالى كۇدىكتى قامالماعان.
«كۇيەۋى ءجاسوسپىرىم قىزىنا سەكسۋالدى سيپاتتاعى زورلىق-زومبىلىق ارەكەتتەرىن جاساعانى بويىنشا كورسەتكەن. بۇل ارىز بىردەن ەڭبەكشى اپب-نىڭ بىرىڭعاي تىركەپ تەكسەرۋ تىزىمىنە تىركەلدى. قر قك-ءنىڭ 121-بابى، 4-بولىگى، ول سەكسۋالدى سيپاتتاعى زورلىق-زومبىلىق ارەكەتتەر جاسوسپىرىمگە جاسالعانى تۋرالى. بىراق سوتقا دەيىنگى تەرگەۋ امالدارى جالعاسىپ جاتىر. بىرنەشە ساراپتامالار تاعايىندالدى»، – دەيدى شىمكەنت قالالىق پد رەسمي وكىلى سالتانات قاراكوزوۆا.
زاڭ بويىنشا كۇدىكتى ەندى ءوز وتباسىنا جاقىنداماۋى جانە قوڭىراۋ شالماۋى كەرەك. ايتپەسە، بىردەن قامالادى. بىراق كۇيەۋىنىڭ كۇنىگە اناشا شەگەتىنىن ايتقان ايەلى ودان ولەردەي قورقادى. تاكسي قىزمەتىندە ىستەيتىن كۇيەۋىم اكەتۋى مۇمكىن دەپ قىزىن دا مەكتەپكە جىبەرۋدى قويىپتى.
“ادىرنا” ۇلتتىق پورتالى
