ۇلتتىق يدەولوگيامىز -مەملەكەتتىك ءتىلىمىز بولۋى كەرەك!

4140
Adyrna.kz Telegram

قر پارلامەنتى ءماجىلىسى دەپۋتاتى قازىبەك يسا «اق جول» فراكتسياسى اتىنان قر پرەمەر-ءمينيسترى ءا. سمايىلوۆقا دەپۋتاتتىق ساۋال جولداپ، شۇعىل ۇلتتىق يدەولوگيا كونتسەپتسياسىن قابىلداۋ قاجەت ەكەنىن ايتتى. 

«قازاق ءۇنى» دەپۋتاتتىق ساۋالدىڭ تولىق ءماتىنىن ۇسىنادى.

1.وتانشىلدىق ۇلتتىق يدەولوگيادان باستالادى

مەملەكەتتىڭ جاڭا ءداۋىرىن باستاپ بەرگەن قاندى قاڭتار قاسىرەتى ەلىمىزدەگى 30 جىلداعى بارلىق قاتەلىكتەرىمىزدى الەمگە ايگىلەپ بەردى. الدىمەن ەكونوميكا، سودان سوڭ ساياسات دەگەن ۇستانىم ءوزىن ەشقانداي اقتامادى. تۇرالاپ قالعان ەكونوميكامىز ءوز الدىنا، ساياساتىمىز جاڭارماعاسىن ساسىعان سۋداي جارامسىز، زياندى بولىپ قالعانىنا كوزىمىز جەتتى. سوندىقتان دا پرەزيدەنت ق.توقاەۆ باستاعان تۇبەگەيلى ساياسي رەفورمانى حالىق قولداۋدا.

قاڭتارداعى قاسىرەت ەڭ الدىمەن ەلىمىزدە 30 جىلدان بەرى ۇلتتىق يدەولوگيانىڭ ۇشقىنى دا بولماعانىن اشكەرە ەتتى.

ەندى ساياسي رەفورمامەن بىرگە شۇعىل ۇلتتىق يدەولوگيامىزدىڭ كونتسەپتسياسىن قابىلداپ، زاڭدى بەكىتۋ كەرەك.

«وتانشىلدىق رۋحى جوعارى ەل كوزدەگەن ماقساتىنا قالايدا جەتەدى»-دەدى مەملەكەت باسشىسى جولداۋدا. ءيا، وتانشىلدىق ۇلتتىق يدەولوگيادان باستالادى.

ۇلتتىق يدەولوگيانىڭ جوقتىعى كوزگە ۇرىپ تۇرعان ءبىزدىڭ تاۋەلسىز قازاق ەلىندە ۇلتتىق رۋحتى كوتەرۋ بۇگىنگى كۇننىڭ ەڭ ماڭىزدى تالابى!

2. ۇلتتىق يدەولوگيا – ەڭ الدىمەن مەملەكەتتىك ءتىل!

قازىر حالىقتى ءبىرتۇتاس ەتىپ بىرىكتىرۋشى ۇلتتىق يدەولوگيامىز - مەملەكەتتىك ءتىلىمىز بولۋى كەرەك!

بۇنى ەلىمىزدەگى ەتنوستاردىڭ ءبارى دە قولداۋدا. قازاقستان حالقى اسسامبلەياسى 2020 جىلى مەملەكەتتىك ءتىلدى مىندەتتەيتىن زاڭ قابىلداۋ تۋرالى ۇندەۋ جاسادى.

سىرتقى جاۋدان قورعانۋ ءۇشىن الدىمەن ەلدىڭ ىشىندە ءوز ءتۇتىنى ءتۇزۋ ۇشۋ كەرەك! بۇل - ءبىر تىلگە بىرىگۋ دەگەن ءسوز!

ال بىرىگۋ تىلدەن باستالاتىنى ءتىرى ادامعا بەلگىلى!

ءتىلى ءبىردىڭ – تىلەگى دە ءبىر، تىرەگى دە ءبىر، ياعني، قارۋى دا، اسكەرى دە ءبىر!

بۇنداي ەل بولىپ، ءبىر تىلگە بىرىگۋگە كىم قارسى - سول ەلدىڭ جاۋى!

تۇرىك رەسپۋبليكاسىنىڭ تۇڭعىش پرەزيدەنتى كەمال اتاتۇرىك سايلانا سالىسىمەن العاشقى جىلى-اق: «تۇركيا مەملەكەتى مىقتى بولۋى ءۇشىن ەلىمىزدەگى 78 ۇلت بۇگىننەن باستاپ ءبارىمىز ءبىر تىلدە -تۇرىك سويلەيتىن ءبىر ۇلتپىز!» -دەپ جاريالادى. وسىنداي قازاق ۇلتى الدىنداعى تاريحي جاۋاپكەرشىلىك پەن ۇلى امانات بىزدە دە ورىندالۋى ءتيىس ەدى...

ويتكەنى، پرەزيدەنتتىڭ ءوزى جولداۋىندا ايتقانداي، «ءبىز ەڭ باستى قۇندىلىعىمىز – تاۋەلسىزدىگىمىزدى ساقتاپ، ۇلتتىق بىرەگەيلىگىمىزدىڭ نەگىزىن نىعايتىپ، ەلىمىزدى جاڭعىرتۋ جولىندا ۇيىسۋعا ءتيىسپىز. بۇل – بولاشاق ۇرپاق الدىنداعى قاسيەتتى بورىشىمىز.»

سوندىقتان، ەلدى بىرىكتىرىپ، توپتاستىرۋ ءۇشىن بارلىق ۇلت مەملەكەتتىك تىلدە سويلەۋى كەرەك!

مەنىڭ اكەمنىڭ كەزىندە قازاقستاندا ءبارى ورىسشا بولدى...

مەن 1979 جىلى الماتىعا وقۋعا كەلگەندە دە بارلىق جەردە ورىس ءتىلى ۇستەم ەدى. جاۋاپ تۇسىنىكتى – ويتكەنى ءبىز كەڭەس وداعىنىڭ بودانى، وتار ەل ەدىك.

ال 1999 جىلى ۇلىم: «اكە، نەگە بارلىعى ورىس تىلىندە؟» دەدى. «تاۋەلسىزدىكتى العانىمىزعا كوپ بولعان جوق، الدا ءبارى قازاق تىلىندە بولادى، ۇلىم» دەپ جۇباتتىم. وعان ءوزىم دە سەنگەن ەدىم.

بيىل 2022 جىلى ەندى نەمەرەم: «نەگە بارلىق جەردە ورىس تىلىندە؟»-دەپ سۇرادى... ال بۇل كەزدە تاۋەلسىزدىك العانىمىزعا 30 جىلدان اسىپ كەتكەن ەدى؟ى.

بۇعان مەن نە دەپ جاۋاپ بەرەمىن؟!.

بۇعان ءبىز نە دەپ جاۋاپ بەرەمىز؟

بۇعان كىم جاۋاپ بەرەدى؟

ءتورت ۇرپاق اۋىسقانشا توردەن كەتپەيتىن، اۋىسپايتىن ول قانداي ءتىل؟!.

ۇلتتىق مۇددەنى قورعاۋ - مەملەكەتتىك تىلدەن باستالادى! 

ال بىزدە 30 جىلدان بەرى مەملەكەتتىك ءتىل تۋرالى زاڭ جوق! 

ەندەشە، قازاقستان پرەزيدەنتى ايتقانداي، «قازاق ءتىلىنىڭ ۇلتارالىق قاتىناس تىلىنە اينالۋى ءۇشىن بارلىعىمىز جۇمىلا ارەكەت ەتىپ»، مەملەكەتتىك ءتىلدى مىندەتتەيتىن مەملەكەتتىك ءتىل تۋرالى زاڭ قابىلداۋىمىز كەرەك!

3.مەملەكەتتىك ءتىلدىڭ تاۋەلسىزدىگى اتا زاڭدا ايقىن كورىنۋى ءتيىس!

ءدال قازىر كونستيتۋتسياعا ساياسي وزگەرىس ەنگىزىلىپ جاتقان كەزدە، 30 جىلدان بەرى ءوز ءتىلىمىز ەمەس، وگەي ءتىلدىڭ كۇيىن كەشىپ كەلە جاتقان قازاق ءتىلىنىڭ مەملەكەتتىك ءتىل رەتىندە جەكە دارا ايقىنداۋ ماسەلەسىن شەشىپ الۋىمىز كەرەك! ويتكەنى، پرەزيدەنت توقاەۆ ايتقانداي: «مەملەكەتتىك ءتىل ماسەلەسى – ۇلكەن ساياسات!». ەندەشە نەگە ۇلكەن ساياساتىمىز - مەملەكەتتىك ءتىلىمىز ساياسي وزگەرىستەردەن قالىپ قالۋى كەرەك؟!

بۇل قازىر ەلدى الاڭداتىپ وتىرعان ەڭ باستى ماسەلەلەردىڭ بىرەگەيى!

مىسالى، «اق جول» فراكتسياسى 2012 جىلى مەملەكەتتىك ءتىلدىڭ قولدانىلۋىن ارتتىرۋ بويىنشا زاڭ جوباسىن جاساعاندا ۇكىمەت وتكىزبەي تاستادى. «قازاق تىلىنە قازاق ۇكىمەتى قارسى شىقتى» دەپ جازدىق ءبىز.

كونستيتۋتسيا مەن زاڭدارىمىزدا مەملەكەتتىك ءتىلدىڭ مارتەبەسىن قورعاۋ – ەلىمىزدەگى ەڭ باستى ماسەلە بولىپ تۇر قازىر. وسى ماقساتتا «قازاق ءۇنى» ۇلتتىق پورتالىندا كونستيتۋتسياسىنداعى 7-ءشى باپتىڭ 2-ءشى تارماعىن الىپ تاستاپ، مەملەكەتتىك ءتىل تۋرالى زاڭ قابىلداۋدى تالاپ ەتكەن اشىق حات ءۇش رەت جاريالاندى. ءۇشىنشىسى 2020 جىلى قايتا جاريالانعان «مەملەكەتتىك ءتىلدىڭ تاۋەلسىزدىگى اتا زاڭدا ايقىن كورىنسىن!» اتتى قازاقستان پرەزيدەنتى ق.توقاەۆقا جازىلعان اشىق حاتقا ەلىمىزدىڭ الەمگە ايگىلى تارلاندارى باستاپ، 126 215 ادام قول قويىپ، قولدادى. بۇل بۇرىنعى مەجەلەردەن مىڭ ەسەدەي اسىپ ءتۇسىپ، تاريحي رەكوردتىق دەڭگەيگە جەتىپ وتىر. بۇل قالىڭ قول ىشىندە تەك قازاقتار عانا ەمەس، ءارتۇرلى ۇلت وكىلدەرى دە (50-گە جۋىق) جەتكىلىكتى.

«ەستيتىن مەملەكەتكە» ميلليونداردىڭ ءۇنىن ەستىرتكەن، ءبىر جارىم ايدا 126 مىڭنان اسا اشىق حاتقا قول قويعان پەتيتسيا پرەزيدەنتكە تاپسىرىلعانىنا دا ەكى جىل بولادى جاقىندا.

2021 جىلى «اق جول» فراكتسياسىنىڭ مەملەكەتتىك ءتىل تۋرالى زاڭ قابىلداۋدى تالاپ ەتكەن دەپۋتاتتىق ساۋالىندا ايتىلعانداي قر پرەمەر-مينيسترىنە، ۇكىمەتكە تاپسىرىلعان مەملەكەتتىك ءتىل تۋرالى زاڭ كونتسەپتسياسى جوباسىنا دا 2 جىل بولدى...

قر پرەزيدەنتى ق.توقاەۆ باسقاراتىن ۇلتتىق كەڭەستىڭ 2019 جىلعى ءبىرىنشى وتىرىسىندا «كونستيتۋتسيادان ورىس ءتىلى تۋرالى باپتى الاتىن كەز جەتتى» دەپ ۇسىنىس جاساعانىمىزعا دا ءۇش جىلعا جۋىق ۋاقىتقا جاقىندادى.

الەمدە بار ەلدە مەملەكەتتىڭ ازاماتى ازاماتتىق پارىزى مەن مىندەتىن ورىنداۋى بۇلجىماس زاڭ! ول زاڭعا مەملەكەتتىك ءتىلدى ءبىلۋ مىندەتى دە كىرەدى. بۇل مىندەتىن ازاماتتارى دا، ءتىپتى مەملەكەتتىك ءتىلدى ءبىلۋى مىندەتتى بولۋى ءتيىس مەملەكەتتىك قىزمەتكەرلەرى دە ورىندامايتىن الەمدە جالعىز ەل قازاقستان! ويتكەنى ءبىزدىڭ ەلدىڭ كونستيۋتسياسىندا عانا مەملەكەتتىك ءتىلدى ءبىلۋ ءار ازاماتتىڭ مىندەتى ەكەنىن ادەيى جازباي كەتكەن… بۇل كونستيتۋتسيا تالابى مەن اتىنا ساي ەمەس زاڭسىزدىق! وسى زاڭسىزدىقتى تاۋەلسىزدىكتىڭ 30 جىلىنان اسقاندا جاڭا قازاقستان، ەكىنشى رەسپۋبليكادا تۇزەلۋى ءتيىس!

«مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ پارىزى. مىندەتى دەپ تە ايتۋعا بولادى.»-دەگەن مەملەكەت باسشىسى ق.توقاەۆتىڭ ءسوزى ەندى ىسكە اينالىپ، اتازاڭعا جازىلۋى كەرەك.

كونستيتۋتسياسى بابىنىڭ ءبىرىنشى تارماعىن ورىنداماي، سىزىپ تاستاپ، وعان قارسى ەكىنشى تارماعىن ورىندايتىن ەل الەمدە تاعى دا جالعىز تەك قازاقستان!

4.مەملەكەتتىك ءتىل ەسىكتەن كىرە الماي تۇرسا، ءبىز قالاي توردە وتىرامىز؟!

ۇلتتىق يدەولوگيامىز - مەملەكەتتىك ءتىلدىڭ اۋىر ءحالى قازىر دابىل قاعار جاعدايدا!

قالاي دابىل قاقپايمىز، تاۋەلسىزدىك العان 30 جىلدا ءوز ءتىلىن بىلمەيتىن ۇرپاق ءوسىپ شىقسا؟!. سوندا ءبىز قاي ەلدە، قانداي تاۋەلسىزدىكتە ءومىر سۇرگەنبىز؟

قايدا ءبىزدىڭ ۇلتتىق يدەولوگيامىز؟ استانادان باستاپ، قالالاردىڭ كوبىسىندە ۇلكەندەر دە، اۋلادا ويناپ جۇرگەن بالالار دا شەت تىلىندە – رەسەي تىلىندە سويلەسە، اقوردا، ۇكىمەت، پارلامەنت، اكىمدىكتەر مەن مەملەكەتتىك مەكەمەلەردىڭ، ۇلتتىق كومپانيالاردىڭ بارىندە مەملەكەتتىك ءتىلدى ەسىكتەن سىعالاتىپ، ورىس تىلىندە سويلەسە، سوندا قايداعى، قانداي تاۋەلسىزدىك؟!.

مەملەكەكەتتىك ءتىل ەسىكتەن كىرە الماي جىلاپ تۇرسا، ءبىز نەگە جەتىسىپ، قالاي توردە وتىرامىز، مىرزالار؟!. قالاي ەل بولامىز؟

مەملەكەتتىك ءتىلىمىزدى مىندەتتەيتىن زاڭ شىعارا الماساق، بۇل جەردە نەگە وتىرمىز؟ وندا ءبىزدىڭ ازاماتتىعىمىز، پارتيوتتىعىمىز، ەل الدىندا ۋادە بەرگەن، ورىنداۋعا ءتيىس اماناتىمىزدىڭ بارلىعى كوزبوياۋشىلىق، وتىرىك بولعانى عوي!

مىنە، 30 جىل ۇلتشىلدىقپەن كۇرەسكەن ۇلتسىزدىق يدەولوگيانىڭ جەتكىزگەن جەرى وسى!

وزگە ەلدەردىڭ بارىندە مەملەكەتتىك ءتىلدى كوتەرسەڭ - پاتريوتسىڭ، ال بىزدە عانا - جاۋسىڭ!

ەستيتىن مەملەكەت حالىقتى قالاي تۇسىنەدى، ەگەر ەكەۋى ەكى تىلدە سويلەسسە؟!.

ءبىز مەملەكەتتىك ءتىلىمىزدى مىندەتتەيتىن زاڭ قابىلداۋ ءۇشىن ەندى تاعى 30 جىل ءۇشىنشى پرەزيدەنتتى كۇتۋىمىز كەرەك پە؟!

“بابالار اماناتىنا ادال بولىپ، ونى ۇرپاققا تابىستاۋ – مەن ءۇشىن كيەلى پارىز! مەن ازاماتتارىمىزدىڭ ەرتەڭ ەمەس، بۇگىن باقىتتى ءومىر سۇرگەنىن قالايمىن.”-دەپ مالىمدەگەن قر پرەزيدەنت توقاەۆ وسى كيەلى پارىزىن ەرتەڭ ەمەس، بۇگىن ءوزى ورىنداۋى ءتيىس!

جالپى بيلىك، مەملەكەت ۇلتپەن بىرگە بولعىسى كەلە مە؟ ەندەشە ۇلتتىڭ تىلىندە سويلەسىن! تاۋەلسىزدىك العان مەملەكەت باسشىسىنان باستاپ، مەملەكەتتىك قىزمەتكەرلەردىڭ ءبارىنىڭ شەت تىلىندە، وتارلاۋشى ەل رەسەي تىلىندە سويلەگەنىن ەل كورمەۋ كەرەك! وتارلاۋشى ەلدىڭ تىلىندە سويلەپ تۇرىپ، تاۋەلسىز ەلدىڭ مۇددەسىن قورعايمىن دەپ ەلدى الداۋ - بوس ءسوز! بۇگىندە وعان ەشكىم سەنبەيدى!

ەلباسى ەنگىزگەن كونستيتۋتسيا مەن زاڭدارىمىزداعى مەملەكەتتىك ءتىلدىڭ بەيشارالىعىن بىلدىرەتىن باپتاردىڭ ءبارىن دە زەينەتكە شىعارىپ جىبەرۋ كەرەك.

بولماسا، «جاڭا قازاقستان»، «ەكىنشى رەسپۋبليكا» دەگەننىڭ ءبارى الدامشى، ەلدى الداعان كوزبوياۋشىلىق بولىپ شىعادى!

ءبىز تاۋەلسىزدىكتى كىمنەن الدىق؟ ارىسى پاتشالى رەسەيدەن، بەرىسى كوممۋنيستەر بيلەگەن كەڭەس وداعىنان الدىق! ەندەشە ازاتتىق العان ەل 30 جىلدان استام ءوزىن وتارلاۋشى ەلدىڭ تىلىندە سويلەپ كەلە جاتقانى، ول ءتىلدى كونستيتۋتسياسى مەن زاڭدارىنا بەكىتىپ قويعانى قانداي ماسقاراشىلىق؟!. الەمدە قانداي ەل بار مۇنداي قورلىققا كونىپ كەلە جاتقان؟!.

سالىق تولەۋ قانداي مىندەت بولسا، مەملەكەتتىك ءتىلدى ءبىلۋ دە سونداي مىندەت بولۋى ءتيىس.

«ەكى تىلگە بىردەي جاعداي جاساۋ كەرەك» دەگەن - ەكىجۇزدىلىك. ول اشتان ولگەلى جاتقاننىڭ اۋزىنان استى جۇلىپ اپ، توقتىقتان جارىلا جازداپ جاتقاننىڭ اۋزىنا تىعۋمەن تەڭ.

مەملەكەت پەن ۇكىمەت باسشىلارىنىڭ، مينيسترلەر مەن اكىمدەردىڭ، دەپۋتاتتاردىڭ، جالپى ساياساتكەرلەر مەن قايراتكەرلەردىڭ قازاقستاننىڭ مەملەكەتتىك تىلىندە ءبىر اۋىز سالەمدەسىپ الىپ، بىردەن رەسەي تىلىنە اۋىسىپ كەتىپ: «بارىنە تۇسىنىكتى تىلمەن سويلەيىن”-دەگەنى - مەملەكەتتىك ءتىلدى قورلاۋى جانە بىزدە 30 جىلدا دا مەملەكەتتىك ءتىلدىڭ بولماعانىن مويىنداۋى!

مەملەكەتتىك ءتىلدى قورلاتپاۋ - مەملەكەت باسشىلارىنان باستاپ، ءبارىمىزدىڭ باستى مىندەتىمىز بولۋى ءتيىس!

5. اقپاراتتىق قاۋىپسىزدىگىمىز دابىل قاعار جاعدايدا!؟.

جاقىندا MediaNet حالىقارالىق جۋرناليستىك ورتالىعىنىڭ «Demoscope» ساۋالناما بيۋروسى جۇرگىزگەن ساۋالناما ناتيجەسىن كورسەڭىز، شوشيسىز. ساۋالناما انىقتاۋىنشا ءبىزدىڭ ەلدى رەسەي باق-تارى جاۋلاپ العان! وسىدان-اق قاۋىپتىڭ قاي جاقتان كەلىپ جاتقانىن بىلۋگە بولادى!

ال ءبىز نەگە بۇلاي قاتەرلى جاعدايعا جەتكەنبىز؟ باسىندا ايتقانىمىزداي، تاعى دا، ءبارى دە تىلگە كەلىپ تىرەلەدى. ويتكەنى، ساۋالناماعا قاتىسقانداردىڭ 77 پايىزى ورىستىلدىلەر. ساۋالناماعا جاۋاپ بەرگەن 23 پايىز قازاق تىلدىلەردىڭ ءوزىنىڭ دە 13 پايىزى رەسەي اقپاراتىن تىڭدايتىندار بولىپ شىققان. وسىدان-اق ۇلكەن قاۋىپتىڭ قاي جاقتان كەلىپ جاتقانىن بىلۋگە بولادى!

ءتىلدى تۇزەمەي، ەل تۇزەلمەيدى! «مەملەكەتتىك ءتىل - ۇلتتىق قاۋىپسىزدىك ماسەلەسى» دەپ پرەزيدەنت تۋراسىن تاۋىپ ايتقان. ەندى سوزدەن ىسكە كوشەتىن ۋاقىت جەتتى!

سوندىقتان، ەلىمىزدەگى شەتەل اقپاراتىن شۇعىل توقتاتۋ كەرەك!

4. قازىر گەوساياسي جاعدايلارعا بايلانىستى ءبىزدىڭ ەلگە باسقا ەلدەردەن قونىس اۋدارۋشىلار اعىلىپ جاتقاندىقتان، ۇلتتىق قاۋىپسىزدىك ماقساتىندا 2019 جىلى «اق جول» فراكتسياسى ۇسىنعانداي، قازاقستان ازاماتتىعىن الۋ ءۇشىن مەملەكەتتىك ءتىل مەن ەل تاريحىنان ەمتيحان تاپسىرۋى تاپسىرۋى تيىستىگىن زاڭمەن بەكىتۋىمىز كەرەك.

رەسەيدە ازاماتتىق الۋ ءۇشىن عانا ەمەس، ءجاي جۇمىسقا تۇرۋ ءۇشىن الدىمەن مەملەكەتتىك ءتىلدى ءبىلۋىڭ كەرەك! مىسالى، رەسەيدىڭ مەملەكەتتىك ءتىلىن ءبىلۋى ءتيىس اۋلا سىپىرۋشىسىنىڭ ازاماتتىق قۇقى مەن قۇنى ءبىزدىڭ مەملەكەتتىك ءتىلدى ءبىلۋى ءتيىس ەمەس، بىلمەيتىن مينيسترلەردەن، اكىمدەردەن، دەپۋتاتتاردان جوعارى تۇر!

«اق جول» فراكتسياسىنىڭ ۇسىنىستارى.

1.ۇلتتىق يدەولوگيامىزدىڭ كونتسەپتسياسىن تەز ارادا زاڭدى تۇردە بەكىتۋ قاجەت!

2. مەملەكەتتىك ءتىلدى مىندەتتەيتىن زاڭ قابىلداۋ كەرەك!

3. كونستيتۋتسياداعى ءتىل تۋرالى 7-ءشى باپقا وزگەرىس ەنگىزىپ، قازاق ءتىلىنىڭ مەملەكەتتىك ءتىل رەتىندە جەكە دارا ستاتۋسىن ايقىنداۋ كەرەك!

4.مەملەكەتتىك ءتىلدىڭ دامۋى مەن ءتيىستى زاڭدى قاداعالاۋ ءۇشىن تىكەلەي پرەزيدەنتكە قارايتىن ءتىل اگەنتتىگىن قۇرۋ قاجەت.

5.قازاقستاننىڭ ۇلتتىق اقپاراتتىق قاۋىپسىزدىگىن جاساپ، شەتەلدىك تەلەارنالار مەن باسىلىمداردىڭ تارالۋىن شۇعىل توقتاتۋ قاجەت!

6.ءبىزدىڭ ەلگە كورشىلەس ەلدەردەن قونىس اۋدارۋشىلار اعىلىپ جاتقاندىقتان، ۇلتتىق قاۋىپسىزدىك ماقساتىندا 2019 جىلى «اق جول» فراكتسياسى ۇسىنعانداي، قازاقستان ازاماتتىعىن الۋ ءۇشىن مەملەكەتتىك ءتىل مەن ەل تاريحىنان ەمتيحان تاپسىرۋى ءتيىس.

قۇرمەتپەن، “اق جول” فراكتسياسى دەپۋتاتتارى

پىكىرلەر