قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ ۇكىمەت وتىرىسىنان كەيىن وتكەن ءباسپاسوز ءماسليحاتىندا قىرعىزستان تاراپىنان كەلەتىن سۋدىڭ كولەمى وزگەرمەيتىنىن اتادى، دەپ حابارلايدى “ادىرنا” ۇلتتىق پورتالى قازاقپارات سايتىنا سىلتەمە جاساپ.
«قىرعىز تاراپىنىڭ دەپۋتاتتارى شەكاراداعى ساۋدا قاتىناسى رەتتەلمەسە، قازاقستانعا تيەسىلى سۋدى قىسۋ كەرەك دەگەن ماسەلە كوتەرگەنى ايتىلىپ ءجۇر. شىنىمەن دە سونداي تاۋەكەل بار ما»، - دەپ سۇرادى باق وكىلى مينيستردەن.
ۆەدومستۆو باسشىسىنىڭ ايتۋىنشا، رەسمي دەڭگەيدە ونداي ماسەلە كۇن تارتىبىنە قويىلىپ وتىرعان جوق.
«قىرعىز رەسپبۋليكاسىنا سۋ رەسۋرستارى بويىنشا قانشالىقتى تاۋەلدىمىز دەگەنگە كەلسەك، راسىمەن تاۋەلدىلىك بار. نەگىزىنەن قىرعىزستان اۋماعىنداعى توقتاعۇل سۋ قويماسىنان كەلەتىن سۋعا تاۋەلدىمىز. قىرعىزدارمەن ارادا كەلىسىم بار. ولاردىڭ بىزگە ءبولۋى ءتيىس سۋ كولەمدەرى بويىنشا ەشقانداي تاۋەكەل نەمەسە قاۋىپ كورىپ تۇرعان جوقپىز. قىرعىزدار بىزگە سۋ بەرمەي قويادى دەگەن مالىمەت بىزدە جوق»، - دەدى ول.
سونداي-اق، مينيستر وسى ايدىڭ 20-سى كۇنى تاراز قالاسىندا شۋ جانە تالاس وزەندەرىنىڭ بويىنداعى سۋ شارۋاشىلىعى نىساندارى بويىنشا ءماجىلىس وتكەنىن ەسكە سالدى.
«ءبىزدىڭ ماماندار قىرعىز ارىپتەستەرىمەن كەزدەستى. ناقتى كەلىسىمدەر بار. سوندىقتان ءبىز قىرعىز تاراپىنان تيەسىلى سۋدى الماي قالۋىمىز مۇمكىن دەگەن تاۋەكەل جوق»، - دەدى سەرىكقالي برەكەشەۆ.
سونداي-اق، بۇگىنگى ۇكىمەت تىرىسىندا قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ورنىن وتاندىق ونىممەن اۋىستىرۋدى قاجەت ەتەتىن يمپورتتىق تاۋرالاردىڭ 3 ساناتىن انىقتادى.
”ادىرنا” ۇلتتىق پورتالى
