ماسكەۋدە 13 مامىر كۇنى قاۋىپسىزدىك ورگاندارىنىڭ قىزمەتكەرلەرى ساحاروۆ داڭعىلىندا وتكەن "ەركىن ينتەرنەت ءۇشىن" شەرۋى كەزىندە ونداعان ادامدى ۇستادى دەپ حابارلادى "لەۆىي فرونت" قوزعالىسىنىڭ ۇيلەستىرۋشىسى سەرگەي ۋدالتسوۆ.
ول "ينتەرفاكس" اگەنتتىگىنە "لەۆىي فرونت" وكىلدەرى، انارحيستەر مەن باسقا دا ۇيىمداردىڭ وكىلدەرى - بارلىعى 30 شاقتى ادام ۇستالعانىن مالىمدەدى. ءۋدالتسوۆتىڭ ايتۋىنشا، پوليتسيا بەلسەندىلەر ميتينگ تاقىرىبىنا ساي كەلمەيتىن ساياسي ۇراندار ايتتى دەپ كىنا تاققان.
رەسەيدە Telegram مەسسەندجەرىن جابۋعا قارسى "ەركىن ينتەرنەت ءۇشىن" ميتينگىسىن وتكىزۋگە بيلىك رۇقسات بەرگەن. وعان بەس مىڭعا دەيىن ادام قاتىسادى دەلىنگەن.
ميتينگىگە قاتىسقاندار پارناس، "يابلوكو", "دەموكراتيچەسكي ۆىبور" پارتيالارى، "رەۆوليۋتسيوننايا رابوچايا پارتيا", "لەۆىي فرونت" قوزعالىسى جانە باسقا دا سولشىل جانە ۇلتشىل ۇيىمداردىڭ تۋلارىن ۇستاپ شىقتى.
جينالعاندار ينتەرنەت ەركىندىگىن قورعايتىن جانە بيلىكتى سىنايتىن ۇراندار ايتتى.
"ينتەرفاكس" اگەنتتىگىنە "وتكرىتايا روسسيا" قوزعالىسى فەدەرالدىق ساياسي كوميتەتىنىڭ مۇشەسى الەكسەي پريانيشنيكوۆتىڭ حابارلاۋىنشا، اكتسيا باستالار الدىندا پوليتسيا قوزعالىس سيمۆوليكاسى بار جالاۋشالاردى تارتىپ العان.
ۇيىمداستىرۋشىلار اكتسيانى "ينتەرنەت رەسۋرستار مەن ينتەرنەت قۇرالدارىن شەكتەۋگە، "جازباعا لايك باسىپ، بولىسكەنى ءۇشىن" قىلمىستىق قۋدالانۋعا قوعامنىڭ نازارىن اۋدارۋ ماقساتىندا" وتكىزگەنىن ايتادى.
رەسەي فەدەرالدىق قاۋىپسىزدىك قىزمەتىنە قولدانۋشىلار حات-حابارىن شيفرلاۋ كىلتىن بەرۋدەن باس تارتقانى ءۇشىن Telegram مەسسەندجەرىن سوت شەشىمى بويىنشا، ءساۋىردىڭ 16-سىنان باستاپ بۇكىل ەل اۋماعىندا بۇعاتتاعان. مەسسەندجەر بيلىك سالعان بۇعاتتى اينالىپ ءوتۋ ءۇشىن امەريكالىق Amazon جانە Google كومپانيالارىنىڭ سەرۆەرلەرىن پايالانا باستاعان سوڭ، روسكومنادزور ولارعا كىرۋدى دە شەكتەگەن. سونىڭ سالدارىنان 20 ميلليونعا جۋىق IP ادرەس بۇعاتتالىپ قالعان. Telegram مەسسەندجەرى جۇمىس ىستەپ تۇر.
________________________________________________________________________________________________________ azattyq.org
