بۇعان دەيىن 10 تاۋلىككە قاماۋعا الىنعان ۆاينەر مەيىرجان تورەباەۆ ءوزىن "ۇرىپ-سوعىپ" كۋالىك الۋ ءۇشىن قاماۋعا الىنۋى مۇمكىن ەكەنىن ايتتى، دەپ حابارلايدى “ادىرنا” ۇلتتىق پورتالى قازتاگ سايتىنا سىلتەمە جاساپ.
"مەن، مەيىرجان تورەباەۆ، ءوزىمنىڭ قارجىلىق پيراميداعا قاتىسىم جوق ەكەنىن ايتقىم كەلەدى. بارلىعى (قاماۋدا وتىرعاندار) مەنىڭ 10 تاۋلىككە قامالعانىما تاڭ قالۋدا. بۇل دالەلدىڭ جوقتىعىنان. بۇرىننان وتىرعاندار مەنى مۇندا ادەيى مويىنداتۋ ءۇشىن قاماۋعا العانىن ايتادى. بۇلاي بولمايدى دەپ ۇمىتتەنەمىن، ناتيجەسىن 10 كۇننەن كەيىن كورەمىز", - دەپ جازعان مەيىرجان، ۋاقىتشا ۇستاۋ يزولياتورىنان ادۆوكاتى ەرلان ماكەنوۆ ارقىلى بەرگەن حاتىندا.
ادۆوكاتتىڭ ايتۋىنشا، ۆاينەردىڭ ءوزى جازبانى جاريالاۋدى وتىنگەن.
"تورەباەۆ مەيىرجان جازىقسىز! بۇگىن الماتىدا زارداپ شەككەندەردىڭ ءباسپاسوز ءماسليحاتىندا جابىرلەنۋشىلەر، سونىڭ ىشىندە جابىرلەنۋشى دوسمايلوۆا باعيلا دا وسىلاي دەيدى. جابىرلەنۋشىلەردىڭ سوزىنشە، ۆاينەردى قارجىلىق پيراميدا قۇردى دەپ ايىپتاۋ پوليتسيا دەپارتامەنتى قىزمەتكەرلەرىنىڭ يدەياسى", - دەپ ءتۇسىندىردى ماكەنوۆ.
سونداي-اق، ول بۇلتارتپاۋ شاراسىن 10 تاۋلىككە قاماۋعا الۋ شەشىمىنە وزگەرتۋ وتە تاڭقالارلىق جانە سيرەك كەزدەسەتىن سوت شەشىمى ەكەنىن، سونداي-اق مەيىرجاننىڭ بۇلتارتپاۋ شاراسىن وزگەرتۋگە نەگىز بولماعانىن اتاپ ءوتتى.
“10 تاۋلىككە قاماۋعا الۋدى تاعايىنداۋ ءىس جۇزىندە ورگان قاماۋعا الۋ ءۇشىن جەتكىلىكسىز دالەلدەمەلەردى ۇسىنىپ، سول ارقىلى سوتقا دەيىنگى تەرگەپ-تەكسەرۋ ورگاندارىنا قوسىمشا دالەلدەمەلەر الۋعا ۋاقىت بەرگەندە عانا قولدانىلادى. ءوز اتىمنان قوسىپ وتەرىم، مەيىرجان شىنىمەن ازىلگە جاقىن جىگىت، ول كوڭىل-كۇيىن تۇسىرمەي، ادىلدىك ورنايتىنىنا سەنەدى جانە ۇمىتتەنەدى", - دەپ تۇيىندەدى زاڭگەر.
”ادىرنا” ۇلتتىق پورتالى
