ماجىلىستە بيىلعى بيۋدجەتتى ناقتىلاۋ كەزىندە الماتى، اتىراۋ، ماڭعىستاۋ جانە تۇركىستان وبلىستارىندا ەكى مىڭعا جۋىق مۇعالىمنىڭ ايلىعى وسەتىنى بەلگىلى بولدى، دەپ حابارلايدى ”ادىرنا” ۇلتتىق پورتالى Azattyq Rýhy سايتىنا سىلتەمە جاساپ.
ءماجىلىس دەپۋتاتى ءجاميلا نۇرمانبەتوۆا مۇعالىم جەتىسپەۋشىلىگى جوعارى وڭىرلەردە ۇزدىك پەداگوگتەردى قولداۋدىڭ ءتيىستى جوباسى بار ەكەنىن ايتتى. ونىڭ سوزىنشە، جوبا اياسىندا الماتى، اتىراۋ، ماڭعىستاۋ جانە تۇركىستان وبلىستارىندا 2 مىڭعا جۋىق مۇعالىمدى تارتۋ ءۇشىن 3,9 ملرد تەڭگە كوزدەلگەن.
«وسى رەتتە لاۋازىمدى قىزمەتكەردىڭ جالاقىسىن ارتتىرۋ ءۇشىن قاراجات قاراستىرىلعان. ودان بولەك، الەمۋەتتىك قولداۋ شارالارىنا قاراجات ءبولۋ كوزدەلمەگەن. ال وزگە وڭىرلەردەن كوشىپ كەلگەن ۇستازداردى باسپانامەن قامتۋ سياقتى ماسەلە قاراستىرىلعان با؟» دەگەن ساۋال جولدادى.
ءبىلىم جانە عىلىم مينيسترلىگى اسحات ايماعامبەتوۆ بۇل باعدارلاما بيىل قىركۇيەك ايىنان باستالاتىنىن، سول سياقتى جالاقى ءۇشىن جالپى سوماسى 3,9 ملرد تەڭگە قاراستىرىلعانىن جانە الەۋمەتتىك ماسەلەلەلەردى شەشۋ قارالعانىن ايتتى.
«ياعني، بۇل وڭىرگە بارعان مۇعالىمدەر ەكى ەسە جالاقى الادى جانە باسپانا جالداۋ اقىسى مەن كوممۋنالدىق شىعىندارى وتەلەدى. مىسالى، مۇنايلى اۋدانعا باسقا وڭىردەن مۇعالىم كوشىپ باراتىن بولسا، ايلىعى 790 مىڭ تەڭگەگە جۋىق بولادى. بۇل جوباعا قاتىساتىن مۇعالىمدەردىڭ بىلىكتىلىگى جوعارى بولۋ كەرەك. ماگيستراتۋرادا وقىعان مامان بولۋى كەرەك. ولار ارنايى ىرىكتەۋ ەمتيحاندارىنان مىندەتتى تۇردە وتەدى. تالاپتارعا ساي بولعان ۇستازدار اتالعان وڭىرلەرگە كوشىپ بارىپ، ەكى ەسە جوعارى جالاقى الادى»، - دەيدى مينيستر.
”ادىرنا” ۇلتتىق پورتالى
