حالىقارالىق گروسسمەيستەر جانسايا ابدىمالىك الماتى شاحمات فەدەراتسياسىنىڭ پرەزيدەنتى بولىپ تاعايىندالدى، دەپ حابارلايدى “ادىرنا” ۇلتتىق پورتالى فەدەراتسيانىڭ ءباسپاسوز قىزمەتىنە سىلتەمە جاساپ.
جاڭا ۇيىم مەگاپوليستە شاحمات مادەنيەتىن دامىتپاق.
ءباسپاسوز قىزمەتىنىڭ مالىمەتىنە سايكەس، فەدەراتسيا 2024 جىلعا دەيىن ءتورت نەگىزگى باعىتتى دامىتۋدى جوسپارلاپ وتىر.
“ول: تۇرعىندار اراسىنداعى جاپپاي سپورت، مەكتەپ باعدارلاماسىنداعى شاحمات، جوعارى ناتيجەلى سپورت، ارداگەرلەردى قولداۋ”، – دەدى جانسايا ابدىمالىك.
جوعارى ناتيجەلى سپورتتى دامىتۋ اياسىندا بالالار-جاسوسپىرىمدەر سپورتىن قولداۋ، 8 جانە 18 جاس ارالىعىنداعى سپورتشىلاردان الماتى قۇراماسىن قۇرۋ، قازاقستان، ازيا، الەم چەمپيوناتتارىنان، سونداي-اق، 16 جاسقا دەيىنگى بالالارعا ارنالعان وليمپيادادان جۇلدەلى ورىن الۋ ماڭىزدى مىندەتتەردىڭ ءبىرى بولىپ تابىلادى.
"ارينە، باستى ماسەلەلەردىڭ ءبىرى قارجىلاي قولداۋ تابۋ بولىپ تابىلادى. سەبەبى اقشاسىز سپورت فەدەراتسياسىنىڭ قىزمەتى كۇردەلەنەدى. الماتى شاحمات فەدەراتسياسى كاسىبي سپورتشىلار مەن شاحماتتى سۇيۋشىلەرگە ەڭ جاقسى جاعداي جاساۋ ماقساتىندا دەمەۋشىلەرمەن سەرىكتەستىك ورناتۋ ءۇشىن ءاردايىن اشىق", - دەدى 22 جاستاعى پرەزيدەنت.
“ادىرنا” ۇلتتىق پورتالى
