ساراپشىلار ازىق-تۇلىك باعاسىنىڭ تاعى دا ءوسۋى مۇمكىن ەكەنىن مالىمدەدى، دەپ حابارلايدى “ادىرنا” ۇلتتىق پورتالى Turkistan.kz سايتىنا سىلتەمە جاساپ.
قازاقستاندا 2022 جىلدىڭ ناۋرىز ايىندا ازىق-تۇلىك تاۋارلارىنىڭ باعاسى 5,8% ءوستى، ال جىلىنا 15,4% كوتەرىلدى. جىل بويىنشا شاققاندا باعانىڭ قىمباتتاۋى ەڭ كوپ اقتوبە وبلىسىندا تىركەلدى – باعا 18,5%-عا وسكەن. تۇركىستان وبلىسى مەن شىمكەنتتە – 17,2%-عا، جامبىل وبلىسىندا – 16,7%-عا ءوسۋ تىركەلدى.
ەلىمىزدە جەمىستەر مەن كوكونىستەر بىردەن 25,9%-عا، قانت، توساپ، بال، شوكولاد جانە كونديتەرلىك ونىمدەر – 24,7%-عا، مايلار مەن توڭ مايلار – 17,4%-عا، نان ونىمدەرى مەن جارما – 13,6%-عا، بالىق جانە تەڭىز ونىمدەرى – 13,1%-عا قىمباتتادى. ەت، ونىڭ ىشىندە ەت ونىمدەرى – 12,9%-عا، ءسۇت ونىمدەرى – 11,8%-عا ءوستى.
ءساۋىر ايىنىڭ تولىق دەرەكتەرى ءالى جوق. بىراق، زەرتتەۋشىلەردىڭ ايتۋىنشا، تەرىس ديناميكا جالعاسىپ وتىر.
ماسەلەن، 1 ءساۋىر مەن 12 ءساۋىر ارالىعىندا الەۋمەتتىك ماڭىزى بار ازىق-تۇلىك تاۋارلارىنا تىكەلەي مەملەكەت باقىلايتىن جانە رەتتەيتىن باعالار تاعى 1,8%-عا، ال جىل باسىنان وسى كۇنگە دەيىن بىردەن 13,4%-عا كوتەرىلدى.
”ادىرنا” ۇلتتىق پورتالى
