توقاەۆ: ءبىز دەموكراتيالىق وزگەرىستەردىڭ جاڭا داۋىرىنە وتتىك

1250

اقوردا رەزيدەنتسياسىندا 10 مەملەكەتتىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى، دەپ حابارلايدى "ادىرنا" ۇلتتىق پورتالى. 

سەنىم گراموتالارىن كۋبا ەلشىسى وسكار سانتانا لەون (رەزيدەنتسياسى نۇر-سۇلتان قالاسىندا), بانگلادەش ەلشىسى كامرۋل احسان، دومينيكان رەسپۋبليكاسىنىڭ ەلشىسى فرانك گانس داننەنبەرگ كاستەليانوس، ارگەنتينا ەلشىسى ەدۋاردو انتونيو زۋاين، پەرۋ ەلشىسى حۋان حەنارو دەل كامپو رودريگەس، نيگەريا ەلشىسى ياكۋبۋ سانتۋراكي سۋلەيمان، لاوس ەلشىسى ۆيلاۆان ياپوحە، چاد ەلشىسى ادام بەشير ماحامۋد، رۋاندا ەلشىسى فيدەليس نتامپاكا ميرونكو، بەنين ەلشىسى اكامبي اندرە وكۋنلولا-بياۋ تاپسىردى.

مەملەكەت باسشىسى ەلشىلەردى قازاقستانداعى ديپلوماتيالىق ميسسيالارىنىڭ رەسمي باستالۋىمەن قۇتتىقتاپ، ەلىمىزدەگى يگى مىندەتتەرىن ورىنداۋ بارىسىندا ولارعا پرەزيدەنت اكىمشىلىگى مەن قازاقستان ۇكىمەتى تاراپى جان-جاقتى قولداۋ كورسەتەتىنىن جانە كومەكتەسەتىنىن ايتتى.

قاسىم-جومارت توقاەۆ ءوز سوزىندە الەمنىڭ سوڭعى وتىز جىل ىشىندە ەڭ كۇردەلى گەوساياسي جانە گەوەكونوميكالىق احۋالدى باستان وتكەرىپ وتىرعانىن ايتتى. ونىڭ ايتۋىنشا، كوروناۆيرۋس پاندەمياسى ەلدەرىمىز ءۇشىن ايتارلىقتاي سىناق بولدى. سونىمەن قاتار حالىقارالىق قاتىناستارداعى احۋالدىڭ شيەلەنىسۋى الەمنىڭ دامۋىنا كەرى اسەر ەتىپ وتىر.  وسىعان بايلانىستى قازاقستان پرەزيدەنتى قاقتىعىستاردىڭ بۇۇ جارعىسىنا سايكەس تەزىرەك جانە ءادىل رەتتەلەتىنىنە سەنىمدى ەكەنىن جەتكىزدى.

مەملەكەت باسشىسى كوپۇلتتى جانە كوپكونفەسسيالى قازاقستان دامۋدىڭ جاڭا كەزەڭىنە قادام باسقانىن اتاپ ءوتتى.

– ءبىز دەموكراتيالىق وزگەرىستەردىڭ جاڭا داۋىرىنە وتكەنىمىزدى جاريالاپ، مەملەكەتتىك بيلىكتى بۇرىن-سوڭدى بولماعان ورتالىقسىزداندىرۋعا، ۇيلەسىمدى جانە تەپە-تەڭدىك جۇيەسىن نىعايتۋعا كىرىستىك، – دەدى پرەزيدەنت.

قاسىم-جومارت توقاەۆ ەلىمىزدە شەتەلدىك ينۆەستورلار مەن ساۋدا جونىندەگى سەرىكتەستەردىڭ قازاقستان ەكونوميكاسىنا دەگەن سەنىمىن نىعايتۋعا باسا ءمان بەرىلەتىنىنە توقتالدى.

– ءبىزدىڭ ۇكىمەت ۇلتتىق ەكونوميكانىڭ اشىقتىعىنا، كەلىسىمشارتتارعا قول سۇعىلماۋىنا جانە جەمقورلىقپەن اياۋسىز كۇرەسكە بەيىلدىلىگىن ساقتايدى. بۇل رەفورمالار حالقىمىزدىڭ تاريحىنداعى بەتبۇرىس كەزەڭدى بىلدىرەدى. ءبىز تۇرالاپ قالۋ ەمەس، قارقىندى دامۋ جولىن تاڭدايمىز، – دەدى قاسىم-جومارت توقاەۆ.

پرەزيدەنت شىن مانىندە باسەكەگە قابىلەتتى، دەموكراتيالىق جانە الەۋمەتتىك مەملەكەت قۇرۋ ءۇشىن الەمنىڭ بارلىق ەلىمەن ءوزارا ءتيىمدى ءارى دوستىق قارىم-قاتىناستاردى نىعايتۋعا نيەتتى ەكەنىمىزدى ايتتى.

ءراسىم سوڭىندا مەملەكەت باسشىسى ديپلوماتتارعا تابىس تىلەپ، ولاردىڭ مەملەكەتتەرىنىڭ باسشىلارىنا جۇرەكجاردى سالەمىن جولدادى. سونداي-اق جيىنعا قاتىسۋشىلاردى قاسيەتتى رامازان ايىمەن، پاسحا مەرەكەسىمەن جانە لاوس جاڭا جىلىمەن قۇتتىقتادى.

"ادىرنا" ۇلتتىق پورتالى 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket