قازاقستان قورعانىس مينيسترلىگى بيىل قارجىلىق ماسەلەلەرگە بايلانىستى اسكەري پاراد وتكىزبەيتىن بولدى. بۇل وتە دۇرىس قادام دەپ ەسەپتەيمىز. قازاقستان ءۇشىن 9-مامىر جەڭىس كۇنى ەمەس. بۇل رەسمي تۇردە ەكىنشى جاھان سوعىسى قۇرباندارىن ەسكە الۋ كۇنىنە اينالعانى ءجون بولماق.
قازاقستانداعى رەسەيشىل كۇشتەر بۇل كۇندەرى «بەسسمەرتنىي پولك» سياقتى شاباشتى ۇيىمداستىرۋدى قولعا الىپ جاتۋى ابدەن مۇمكىن. مۇنداي پسيحوز ۇلىدەرجاۆالىق شوۆينيزم مەن يمپەريالىق استامشىلىقتىڭ وتىنا ماي قۇيادى. بىلتىر ول رەسەيدە ونلاين رەجيمدە وتكەن. بيىل اگرەسسور مەملەكەت ۋكرايناعا قارسى باسقىنشىلىق «اسكەري وپەراتسياسى» كەزىندە جەڭىلىپ جاتقان تۇستا اسكەري پسيحوز ابدەن ءورشۋى ىقتيمال. بىراق قالاي بولعاندا دا قازاقستاندا «بەسسمەرتنىي پولك» اكتسياسىنا توسقاۋىل قويىلۋى قاجەت.
مايدانگەرلەردى ەسكە الامىز دەگەن جەلەۋمەن سوۆەت-گەرمان سوعىسىندا قازا تاپقان اتا-بابالارىنىڭ سۋرەتىن توبەسىنە كوتەرىپ شەرۋ وتكىزۋ قازاق ءۇشىن تاپقىرلىق ەمەس. بۇل سسسر-ءدى قالپىنا كەلتىرۋدى ارمانداعان پۋتلەرلىك بيلىكتىڭ يدەولوگيالىق ايلا-شارعىسى.
ءبىز بولساق مۇسىلمان حالىقپىز. توبەسىنە سۋرەتىن كوتەرمەك تۇگىلى بەيىتىنىڭ باسىنا سۋرەت سالۋعا تىيىم سالىنعان. شاريعات جولى بويىنشا سۋرەتتەردى توبەگە كوتەرىپ قۇرمەتتەۋ بۇل – سۋرەتكە تابىنۋ. ال دىنىمىزدە اللادان باسقاعا تابىنۋشىلىقتى شيرك دەيدى. بىزگە ەڭ كەرەگى – 9 مامىردا مەشىتتەردە، وتباسىلارىندا مايداندا قازا تاپقان، سوعىستا العان جاراقاتتارىنان كەيىن قايتىس بولعان كۇللى مايدانگەرلەرگە، اكەلەرىمىز بەن اتالارىمىزعا باعىشتالىپ قۇران وقىلۋى. «ءولى رازى بولماي، ءتىرى بايىمايدى» دەگەنىمىز سول.
قازاقستانداعى سەپاراتيستىك پيعىلداعىلار قالعىپ وتىرماعانى تاعى انىق. بۇرىنعى اسكەري قىزمەتكەر قۋات احمەتوۆتىڭ ايتۋىنا قاراعاندا «بەسسمەرتنىي پولك» اكتسياسىن بەلسەندى تۇردە ۇيىمداستىرۋشىلاردىڭ ءبىرى الماتى قالاسىنداعى اۋعان سوعىسى ارداگەرلەرى مەن مۇگەدەكتەرى ۇيىمدارى ۇيلەستىرۋ كەڭەسىنىڭ توراعاسى مۇرات ابدىشۇكىروۆ دەگەن بىرەۋ كورىنەدى. 2019 جىلى الگى وسى اكتسيامەن 150 مىڭ ادام شىعارامىن دەپ وزەۋرەگەنى، ارتىنان 130 مىڭ ادام شىعاردىم دەگەنى دە ەستە. جالپى اۋعان سوعىسى ارداگەرلەرى ۇيىمدارى «بەسسمەرتنىي پولككە» بايلانىستى ءوز ۇستانىمدارىن اشىقتان اشىق جاريالايتىن كەزى كەلدى. حالىق كىمنىڭ كىم ەكەنىن ءبىلۋى كەرەك.
ال رەسمي ورىندار كەشەگى سسسر-ءدىڭ يمپەريالىق استامشىلىعىن تۋ ەتكەن «بەسسمەرتنىي پولك» سياقتى اكتسيالاردى رەمي توقتاتقانى، كەشەگى كوللوبورتسيونيست ۆلاسوۆشىلاردىڭ ايىرىم بەلگىسى گەورگيەۆ لەنتاسىن تاعۋعا رەسمي تىيىم سالعانى ءجون!
"ادىرنا" ۇلتتىق پورتالى
