قارجى پيراميداسى ءىسى بويىنشا ۆاينەر مەيىرجان تورەباەۆ كەپىلمەن بوساتىلدى. بۇل تۋرالى قر باس پروكۋرورىنىڭ ورىنباسارى اسەت شىنداليەۆ مالىمدەدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
ورتالىق كوممۋنيكاتسيالار قىزمەتىندە قازاقپارات تىلشىلەرى باس پروكۋروردىڭ ورىنباسارىنان قارجى پيراميداسى بويىنشا ۆاينەرلەردى جاۋاپقا تارتۋعا قاتىستى سۇرادى. ءوز كەزەگىندە ءا. شىنداليەۆ Mudabarah Capital قارجى پيراميداسىنان زارداپ شەككەن ايەلدىڭ ءوز-ءوزىن ورتەپ جىبەرۋى وتە قايعىلى جاعداي ەكەنىن ايتتى.
«زارداپ شەككەن ادامنىڭ تەزىرەك ساۋىعىپ شىعۋىن تىلەيمىن. ۆاينەرلەر بويىنشا توقتالساق، وندا 169-دان استام زارداپ شەككەن ادام بار، كەلتىرىلگەن شىعىن 2 ملرد تەڭگە شاماسىندا. قىلمىستىق جاۋاپكەرشىلىككە 14 ادام تارتىلىپ جاتىر، ولاردىڭ اراسىندا تانىمال ۆاينەرلەر، بلوگەرلەر بار»، - دەدى ول.
ءا. شىنداليەۆتىڭ ايتۋىنشا، التى ادام قاماۋعا الىنعان، ال ۆاينەر مەيىرجان تورەباەۆ كەپىلمەن بوساتىلدى.
«ءار جاعدايدا بۇلتارتپاۋ شاراسى جەكەلەي قارالادى. بارلىق جاعدايدى ەسكەرە وتىرىپ، ياعني تۇراقتى تۇرعىلىقتى جەرىنىڭ، كامەلەتكە تولماعان بالالارىنىڭ بولۋى، ونىڭ قىلمىستى جاساۋداعى ءرولى نازارعا الىنادى. وسىنىڭ ءبارىن ەسكەرىپ، سوت وعان قاتىستى كەپىلمەن بوساتۋ بۇلتارتپاۋ شاراسىن تاڭدادى»، - دەدى ول.
«كۇدىكتىنىڭ قاماۋدا وتىرماۋى ونىڭ كەيىن قىلمىستىق جاۋاپكەرشىلىككە تارتىلمايدى دەگەندى بىلدىرمەيدى. قازىر ءىس بويىنشا تەرگەۋ اياقتالدى، ياعني تانىستىرۋ كەزەڭى ءوتىپ جاتىر. وسى قىلمىسقا قاتىستى بارلىق كۇدىكتىنىڭ ءىس-قيمىلىنا باعا بەرىلىپ، ولارعا ايىپ تاعىلدى. بۇل راسىمدەر اياقتالعاننان كەيىن، ونى پروكۋرورعا جولدايدى. ءوز كەزەگىندە پروكۋرور ءىستى سوتقا باعىتتايدى»، - دەدى باس پروكۋروردىڭ ورىنباسارى.
ايتا كەتەيىك، تانىمال ۆاينەرلەر مەيىرجان تورەباەۆ، ازيزجان سايدباەۆ جانە مەيىرحان شەرنيازوۆ قارجى پيراميداسىن قۇردى دەگەن كۇدىكپەن ۇستالدى. ءىس بويىنشا كۇدىكتى ا. سايدباەۆقا ىزدەۋ جاريالاندى.
”ادىرنا” ۇلتتىق پورتالى
