Qarjy pıramıdasy isi boıynsha vaıner Meıirjan Tórebaev kepilmen bosatyldy. Bul týraly QR Bas prokýrorynyń orynbasary Áset Shyndalıev málimdedi, dep habarlaıdy “Adyrna” ulttyq portaly QazAqparatqa siltep.
Ortalyq kommýnıkaııalar qyzmetinde QazAqparat tilshileri Bas prokýrordyń orynbasarynan qarjy pıramıdasy boıynsha vaınerlerdi jaýapqa tartýǵa qatysty surady. Óz kezeginde Á. Shyndalıev Mudabarah Capital qarjy pıramıdasynan zardap shekken áıeldiń óz-ózin órtep jiberýi óte qaıǵyly jaǵdaı ekenin aıtty.
«Zardap shekken adamnyń tezirek saýyǵyp shyǵýyn tileımin. Vaınerler boıynsha toqtalsaq, onda 169-dan astam zardap shekken adam bar, keltirilgen shyǵyn 2 mlrd teńge shamasynda. Qylmystyq jaýapkershilikke 14 adam tartylyp jatyr, olardyń arasynda tanymal vaınerler, blogerler bar», - dedi ol.
Á. Shyndalıevtiń aıtýynsha, alty adam qamaýǵa alynǵan, al vaıner Meıirjan Tórebaev kepilmen bosatyldy.
«Ár jaǵdaıda bultartpaý sharasy jekeleı qaralady. Barlyq jaǵdaıdy eskere otyryp, ıaǵnı turaqty turǵylyqty jeriniń, kámeletke tolmaǵan balalarynyń bolýy, onyń qylmysty jasaýdaǵy róli nazarǵa alynady. Osynyń bárin eskerip, sot oǵan qatysty kepilmen bosatý bultartpaý sharasyn tańdady», - dedi ol.
«Kúdiktiniń qamaýda otyrmaýy onyń keıin qylmystyq jaýapkershilikke tartylmaıdy degendi bildirmeıdi. Qazir is boıynsha tergeý aıaqtaldy, ıaǵnı tanystyrý kezeńi ótip jatyr. Osy qylmysqa qatysty barlyq kúdiktiniń is-qımylyna baǵa berilip, olarǵa aıyp taǵyldy. Bul rásimder aıaqtalǵannan keıin, ony prokýrorǵa joldaıdy. Óz kezeginde prokýror isti sotqa baǵyttaıdy», - dedi Bas prokýrordyń orynbasary.
Aıta keteıik, tanymal vaınerler Meıirjan Tórebaev, Azızjan Saıdbaev jáne Meıirhan Shernııazov qarjy pıramıdasyn qurdy degen kúdikpen ustaldy. Is boıynsha kúdikti A. Saıdbaevqa izdeý jarııalandy.
”Adyrna” ulttyq portaly
