21 جىلعا سوتتالعىن «سىرا پاتشاسى» توقتار تولەشوۆتىڭ مۇلكىن قايتارۋ تۋرالى ەڭبەكشى اۋدانىنىڭ پروكۋرورى تالاپ ارىز تۇسىرگەن بولاتىن. قالالىق سوتتىڭ ازاماتتىق ىستەر جونىندەگى سوت القاسىندا وليگارحتىڭ بۇرىنعى سەرىكتەستەرىنە قارسى تۇسىرگەن ارىزىن قاراۋ ءىسى اياقتالدى، دەپ حابارلايدى «ادىرنا» ۇلتتىق پورتالى ەكسپرەسس ك سايتىنا سىلتەمە جاساپ.
سوت ماتەريالدارىنا سايكەس، 21 جىلعا سوتتالعان توقتار تولەشوۆتىڭ ۇكىمى نەگىزىندە سوت ورىنداۋشى وليگارحتان مەملەكەت ەسەبىنە 1 368 587 455 تەڭگە ءوندىرىپ الۋى كەرەك بولعان. الايدا سوت ورىنداۋشى بۇل سومانى تاركىلەۋدە بىرقاتار قيىندىققا تاپ بولعان.
پروكۋروردىڭ تالاپ-ارىزىندا كورسەتىلگەندەي، 99,99962% اكتسياسى توقتار تولەشوۆكە تيەسىلى "دارحان گرۋپپ" جشس اكتيۆتەرىنىڭ ايتارلىقتاي بولىگىن تولەشوۆتىڭ سەرىكتەستەرى مەكەمە بالانسىنان الىپ تاستاعان. تولەشوۆ جازاسىن وتەپ وتىرعاندىقتان، كومپانيا سەرىكتەستەرى مۇنى سەنىمحات نەگىزىندە ىسكە اسىرىپتى.
سونداي-اق، پروكۋرور شىمكەنتتەگى "ارمان" بالاباقشاسى مەن سارىاعاش اۋدانىنداعى قوسالقى قۇرىلىستارى بار جەر تەلىمىن بەرۋ تۋرالى حاتتامانى زاڭسىز دەپ تانۋدى تالاپ ەتكەن.
ەسكە سالايىق، 2020 جىلى اباقتىدا جازاسىن وتەپ وتىرعان توقتار تولەشوۆتىڭ ءوزى سەرىكتەستەرىنە قارسى ازاماتتىق تالاپ ارىزبەن ءىس قوزعاتقان بولاتىن. الايدا ول كەزدە وليگارحتىڭ تالابى قاناعاتتاندىرىلعان جوق. بىلتىر كۇزدە جوعارعى سوت جەرگىلىكتى سوتتىڭ شەشىمىن بۇزىپ، ءىستى قايتا قاراۋعا جىبەرگەن.
بەلگىلى بولعانداي، ازاماتتىق ىستەر جونىندەگى سوت القاسىندا قارالعان ءىس بويىنشا، پروكۋرور جوعارىدا اتاپ وتكەن مۇلىكتەردى "سىرا پاتشاسىنا" قايتارۋدى سۇراعان. وسىنىڭ نەگىزىندە مۇلىكتەر كەيىن سوت ورىنداۋشىلار ارقىلى مەملەكەت پايداسىنا تاركىلەنبەك.
"پروكۋروردىڭ جينالىس حاتتاماسىن جانە مامىلەلەردى جارامسىز دەپ تانۋ تۋرالى تالاپ ارىزى ءىشىنارا قاناعاتتاندىرىلدى. جينالىس حاتتامالارى جارامسىز دەپ تانىلدى. اتاپ ايتقاندا، "دارحان گرۋپپ" جشس مەنشىگىنە ەكى گەكتاردان استام جەر ۋچاسكەسى بار نىساندار قايتارىلدى. ال "ارمان" بالاباقشاسى قازىرگى يەسى م.ساپارباەۆ ينستيتۋتىندا قالدىرىلدى", — دەلىنگەن سوت جارلىعىندا.
سوت قاۋلىسى جاريا ەتىلگەن كۇننەن باستاپ زاڭدى كۇشىنە ەنەدى. ەگەر تاراپتار بۇل قاۋلىمەن كەلىسپەسە، التى اي شىندە جوعارعى سوتقا كاسساتسيالىق شاعىم تۇسىرۋگە قۇقىلى.
ايتا كەتەيىك، "شىمكەنتسىرا" زاۋىتىنىڭ يەسى توقتار تولەشوۆ 2016 جىلدىڭ قاراشاسىندا "بيلىكتى كۇشپەن باسىپ الماق بولدى", "جەر رەفورماسىنا قاتىستى ميتينگىلەردى قارجىلاندىردى" جانە وسى سياقتى قىلمىستىق كودەكستىڭ تاعى بىرنەشە بابىمەن كىنالى دەپ تانىلىپ، 21 جىلعا سوتتالعان.
«ادىرنا» ۇلتتىق پورتالى.
