Toqtar Tóleshovtiń múlikteri ózine qaıtaryldy

1003
Foto: Aq Jaıyq
Foto: Aq Jaıyq

21 jylǵa sottalǵyn «Syra patshasy» Toqtar Tóleshovtiń múlkin qaıtarý týraly Eńbekshi aýdanynyń prokýrory talap aryz túsirgen bolatyn. Qalalyq sottyń azamattyq ister jónindegi sot alqasynda olıgarhtyń burynǵy seriktesterine qarsy túsirgen aryzyn qaraý isi aıaqtaldy, dep habarlaıdy «Adyrna» ulttyq portaly Ekspress K saıtyna silteme jasap.

Sot materıaldaryna sáıkes, 21 jylǵa sottalǵan Toqtar Tóleshovtiń úkimi negizinde sot oryndaýshy olıgarhtan memleket esebine 1 368 587 455 teńge óndirip alýy kerek bolǵan. Alaıda sot oryndaýshy bul somany tárkileýde birqatar qıyndyqqa tap bolǵan.

Prokýrordyń talap-aryzynda kórsetilgendeı, 99,99962% akııasy Toqtar Tóleshovke tıesili "Darhan Grýpp" JShS aktıvteriniń aıtarlyqtaı bóligin Tóleshovtiń seriktesteri mekeme balansynan alyp tastaǵan. Tóleshov jazasyn ótep otyrǵandyqtan, kompanııa seriktesteri muny senimhat negizinde iske asyrypty.

Sondaı-aq, prokýror Shymkenttegi "Arman" balabaqshasy men Saryaǵash aýdanyndaǵy qosalqy qurylystary bar jer telimin berý týraly hattamany zańsyz dep tanýdy talap etken.

Eske salaıyq, 2020 jyly abaqtyda jazasyn ótep otyrǵan Toqtar Tóleshovtiń ózi seriktesterine qarsy azamattyq talap aryzben is qozǵatqan bolatyn. Alaıda ol kezde olıgarhtyń talaby qanaǵattandyrylǵan joq. Byltyr kúzde Joǵarǵy sot jergilikti sottyń sheshimin buzyp, isti qaıta qaraýǵa jibergen.

Belgili bolǵandaı, azamattyq ister jónindegi sot alqasynda qaralǵan is boıynsha, prokýror joǵaryda atap ótken múlikterdi "syra patshasyna" qaıtarýdy suraǵan. Osynyń negizinde múlikter keıin sot oryndaýshylar arqyly memleket paıdasyna tárkilenbek.

"Prokýrordyń jınalys hattamasyn jáne mámilelerdi jaramsyz dep taný týraly talap aryzy ishinara qanaǵattandyryldy. Jınalys hattamalary jaramsyz dep tanyldy. Atap aıtqanda, "Darhan Grýpp" JShS menshigine eki gektardan astam jer ýchaskesi bar nysandar qaıtaryldy. Al "Arman" balabaqshasy qazirgi ıesi M.Saparbaev ınstıtýtynda qaldyryldy", — delingen sot Jarlyǵynda.

Sot qaýlysy jarııa etilgen kúnnen bastap zańdy kúshine enedi. Eger taraptar bul qaýlymen kelispese, alty aı shinde Joǵarǵy sotqa kassaııalyq shaǵym túsirýge quqyly.

Aıta keteıik, "Shymkentsyra" zaýytynyń ıesi Toqtar Tóleshov 2016 jyldyń qarashasynda "bılikti kúshpen basyp almaq boldy", "jer reformasyna qatysty mıtıngilerdi qarjylandyrdy" jáne osy sııaqty Qylmystyq kodekstiń taǵy birneshe babymen kináli dep tanylyp, 21 jylǵa sottalǵan.

«Adyrna» ulttyq portaly.

Pikirler
Uqsas jańalyqtar