دۇرىس تاماقتانۋ: نەدەن باستاۋ كەرەك؟

1227
Adyrna.kz Telegram

تاماقتى تاڭداۋ دەنساۋلىعىمىزعا تىكەلەي اسەر ەتەدى. تاعام - بۇل ءبىزدىڭ مۇشەلەرىمىز ءۇشىن ەنەرگيا بەرەتىن جانارماي سەكىلدى. ادام اعزاسى بارلىق قاجەتتى زاتتاردى تاماق پەن سۋ ارقىلى الادى. ازىق-تۇلىك ونىمدەرىنىڭ قۇرامى جانە ولاردىڭ قاسيەتتەرى دەنساۋلىققا، فيزيكالىق دامۋعا، ەڭبەك قابىلەتتىلىگىنە، ەموتسيونالدى كۇيىنە جانە جالپى ءومىر ءسۇرۋ ساپاسى مەن ۇزاقتىعىنا تىكەلەي بايلانىستى. سوندىقتان دۇرىس تاماقتانۋ - سالاۋاتتى ءومىر سالتىنىڭ ماڭىزدى شارتتارىنىڭ ءبىرى.

ساۋ دەنەدە - ساۋ اقىل دەمەكشى، دەنەنىڭ بارلىق ومىرلىك فۋنكتسيالارى: تىندەر مەن جاسۋشالاردىڭ دامۋ كوزى، ولاردىڭ ۇنەمى جاڭارۋى، ادامنىڭ ەنەرگياعا قانىعۋى – پايدالانعان اسقا بايلانىستى. دۇرىس تاماقتانباۋدىڭ سالدارىنا فيزيكالىق جانە پسيحيكالىق دامۋ دەڭگەيىنىڭ تومەندەۋى، تەز شارشاۋى، قورشاعان ورتانىڭ قولايسىز فاكتورلارىنىڭ اسەرىنە قارسى تۇرا الماۋى، ءتىپتى ەرتە قارتايۋ جانە ءومىر ءسۇرۋ جاسىنىڭ تومەندەۋى جاتادى.

ەندەشە، دۇرىس تاماقتانۋدى نەدەن باستاۋ كەرەك؟ باستاپقى 5 ەرەجەنى ەستە ساقتاۋ ءجون!

№1 ەرەجە. فاست-فۋدتى ماڭگى ۇمىتىپ، تاتتىلەردى كوپ پايدالانباۋعا تىرىسىڭىز.

№2 ەرەجە. مۇمكىندىگىنشە ماۋسىمدىق تاعامداردى قولدانىڭىز - ولاردىڭ قۇرامىندا ماكسيمالدى قورەكتىك زاتتار بار. جىلىجايلاردا وسىرىلگەن نەمەسە الىستان اكەلىنگەن قىسقى كوكونىستەر مەن جەمىستەر حيميالىق زاتتارمەن وڭدەۋدىڭ جانە ۇزاق ۋاقىت ساقتاۋدىڭ ارقاسىندا بارلىق ارتىقشىلىقتارىن جوعالتىپ قانا قويماي، نيتراتتار مەن باسقا دا زياندى حيميالىق قوسىلىستاردىڭ قاينار كوزىنە اينالادى.

№ 3 ەرەجە. تازارتىلعان تاعامداردى پايدالانۋدى شەكتەڭىز: قانت، وسىمدىك مايى، اق بيداي ۇنى، تازارتىلعان اق كۇرىش. ولاردىڭ قۇرامىندا اس قورىتۋ جولدارىنىڭ جۇمىس ىستەۋىنە قاجەت جانە ىشەكتە تۇراتىن پايدالى باكتەريالاردى تاماقتاندىرۋ ءۇشىن وتە ماڭىزدى كلەتچاتكا بولمايدى. سوندىقتان اق ناننىڭ ورنىنا قارا ناندى جەپ، تازارتىلعان اق قانتتى قوڭىر قانتپەن نەمەسە بالمەن الماستىرۋعا بولادى.

№ 4 ەرەجە. سۋدى كوپ ءىشىڭىز. شاي، كوفە جانە ءتاتتى شىرىندار سۋدى الماستىرمايدى. دەنە كۇنىنە 1 كگ دەنە سالماعىنا كەم دەگەندە 30-35 مل سۇيىقتىق الۋ كەرەك. مىسالى، 50 كگ سالماققا 1,7 ل سۋ قاجەت.

№ 5 ەرەجە. اقۋىزدى تاعامدار تۋرالى ۇمىتپاڭىز. بۇل سىزگە ۇزاق ۋاقىت بويى قانىقتىلىق سەزىمىن بەرە الادى، سونىمەن قاتار اقۋىزدار امينقىشقىلدارعا باي. ولار دەنەگە بۇلشىقەت ەتىن قۇرىپ، ەسكىرگەن جاسۋشالاردى الماستىرۋ ءۇشىن قاجەت. اقۋىزعا باي تاعامعا ءار ءتۇرلى ەت، بالىق، كالمار، جاڭعاق، ساڭىراۋقۇلاق، كەيبىر بۇرشاق تۇقىمداستارى، جۇمىرتقا، سۇزبە جاتادى.

وسىنداي نەگىزگى ەرەجەلەرگە نازار اۋدارىپ، اعزاڭىزدى ۋاقىت وتە كەلە دۇرىس تاماقتانۋعا ۇيرەتسەڭىز، بولاشاقتا دەنەڭىز بەن دەنساۋلىعىڭىز العىسىن بىلدىرەدى. بىراق، تاماقتانۋ رەجيمىڭىزدى تىم تەز وزگەرتپەڭىز، بۇل كەرى اسەرگە اكەلىپ سوعادى. ءسىز وزگەرىسكە جوسپارلى تۇردە بارىپ، تاماقتانۋدى بىرتىندەپ تەڭگەرىمگە كەلتىرگەنىڭىز ءجون. فاناتيكالىق قۇلشىنىس وڭ ناتيجە بەرمەيدى.

سوفيا احمەتجانوۆا،

"ادىرنا" ۇلتتىق پورتالى

پىكىرلەر