ەكس-ءبىلىم جانە عىلىم ءمينيسترى ءشامشا بەركىمباەۆا ومىردەن وزدى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
«بۇگىن ەكس-ءبىلىم جانە عىلىم ءمينيسترى بەركىمباەۆا ءشامشا كوپبايقىزىنىڭ قايتىس بولعانى تۋرالى حاباردى ۇلكەن وكىنىشپەن قابىلدادىم»، - دەپ جازدى ايماعامبەتوۆ.
ءشامشا بەركىمباەۆا ەڭبەك جولىن اۋىل مۇعالىمى بولىپ باستاعان. وسى جىلدار ىشىندە مەكتەپ ديرەكتورى، الماتى وبلىستىق پارتيا كوميتەتىنىڭ حاتشىسى، ءبىلىم ءمينيسترىنىڭ ورىنباسارى، قازاقستاننىڭ قىرعىزستانداعى ەلشىلىگىنىڭ ءبىرىنشى حاتشىسى، الماتى وبلىسى ءبىلىم باسقارماسىنىڭ باستىعى قىزمەتتەرىن اتقاردى. سونداي-اق، قازاقستان پارلامەنتى سەناتىنىڭ دەپۋتاتى، ۇزاق جىلدار بويى جەنپۋ رەكتورى بولدى.
«پەداگوگيكا عىلىمدارىنىڭ كانديداتى، دوتسەنت، اكادەميك ءشامشا كوپبايقىزى ەلىمىزدەگى ءبىلىم مەن عىلىمنىڭ دامۋىنا زور ۇلەس قوستى.ءشامشا كوپبايقىزى اۋىل مەكتەپتەرىن دامىتۋعا، دارىندى بالالاردى قولداۋعا جاعداي جاساۋعا ەرەكشە كوڭىل ءبولدى. جۇمىس كەزدەسۋلەرىندە ءشامشا كوپبايقىزى ۇنەمى مەنىمەن تاجىريبەسىمەن ءبولىسىپ، كەڭەستەرىن ايتىپ، ءبىزدىڭ سالاداعى جاڭالىقتاردى قاداعالاپ وتىردى. ۇلتتىق ءبىلىم مەن عىلىمنىڭ كورنەكتى تۇلعاسىنىڭ كەتۋى – ورنى تولماس شىعىن. ءشامشا كوپبايقىزىنىڭ تۋعان-تۋىستارى مەن جاقىندارىنا قايعىلارىنا ورتاقتاسىپ، كوڭىل ايتامىن»، — دەپ جازدى اسحات ايماعامبەتوۆ.
“ادىرنا” ۇلتتىق پورتالى
