Aqtóbe oblysy ákiminiń birinshi orynbasary Rýslan Hambarov ózin eks-prezıdent Nursultan Nazarbaevtyń nemere inisi Qaırat Satybaldynyń kúıeý balasy degen aqparatty jalǵan dep atady, dep habarlaıdy "Adyrna" portaly.
«Men Qaırat Satybaldynyń kúıeý balasymyn degen aqparatqa keletin bolsaq, bul jalǵan aqparat. Meniń qaıyn atam – eńbek sińirgen sportshy, eki dúrkin KSRO chempıony, Eýropa chempıony, sambodan álem kýbogynyń ıegeri. Bul ataqty dzıýdoshy, sambıst Aıtjan Shańǵaraev. Áıelim ekeýmiz úshinshi balamyzdyń dúnıege kelýin kútýdemiz, sondyqtan 17 naýryzdan bastap kezekti eńbek demalysynda boldym. Men jaqyn arada óz mindetime qaıta kirisemin», - dep Hambarov Satybaldynyń kúıeý balasy jáne otstavkaǵa ketýge nıetti ekendigi týraly aqparatqa túsinikteme berdi.
Eske salaıyq, 13 naýryzda Qazaqstannyń eks-prezıdenti Nursultan Nazarbaevtyń nemere inisi Qaırat Satybaldynyń qyzmettik ókilettigin asyra paıdalaný jáne «Qazaqtelekom» AQ qarjysyn jymqyrý faktileri boıynsha Almatyda ustalyp, ýaqytsha ustaý ızolıatoryna qamaýǵa alynǵany belgili boldy. Satybaldynyń memleket qaýipsizdigine nuqsan keltiretin basqa da qylmystarǵa qatystylyǵy da qazir tekserilip jatyr. Sol kúni BAQ derekkózderi habarlaǵandaı, Nazarbaevtyń nemere inisi Nur-Sultanda qamaýda bolady. Nazarbaevtyń nemere inisin ustaýdy UQK Arystan arnaıy bólimshesiniń qyzmetkerleri júrgizgen.
14 naýryzda «Qazaqtelekom» keńselerinde tintýler júrgizilgeni belgili boldy, operatordyń ózi bul aqparatqa túsinikteme berýden bas tartty, biraq ol tintýler elorda men Almaty bólimshelerinde júrip jatqanyn kórsetti.
Naýryzdyń 23-i kúni Ile-Alataý memlekettik ulttyq tabıǵı parkiniń kúzet aımaǵyna jaqyn taýlardan Satybaldyǵa tıesili bolýy múmkin zańsyz salynǵan vılla tabylǵany habarlanǵan bolatyn.
"Adyrna" ulttyq portaly
