تابيعات انانىڭ بۋسانىپ، تىرشىلىك تىرىلەتىن جاڭارۋ ايىن سىربويىلىقتار بار ءسان-سالتاناتىمەن قارسى الدى. ورتالىق الاڭدا اقشاڭقان 18 كيىز ءۇي تىگىلىپ، ۇلتتىق سالت-ءداستۇردى دارىپتەيتىن شارالار، سپورت تۇرلەرىنەن جارىستار ۇيىمداستىرىلىپ، مەرەكە نىشانى سانالاتىن ناۋرىز كوجە ازىرلەنىپ، اسەرلى ءان مەن جىر توگىلدى.
كۇن مەن ءتۇننىڭ تەڭەلىپ، قىتىمىر قىستىڭ ىزعارىنان قۇتىلىپ، كوكتەمنىڭ شۋاقتى كۇندەرىنەن ءۇمىت كۇتتىرەتىن ۇلىستىڭ ۇلى كۇنىندە وبلىس اكىمى گۇلشارا ابدىقالىقوۆا سىربويىلىقتاردى ءاز-ناۋرىز مەيرامىمەن قۇتتىقتاپ، اقجارما تىلەگىن جەتكىزدى.
- كۇن مەنەن ءتۇن تەڭەلىپ، تىرشىلىك اتاۋلى ويانىپ، اينالا مارە-سارە بولاتىن ۇلىستىڭ ۇلى كۇنى – جىل باستاۋى ءاز-ناۋرىز بارشاڭىزعا قۇتتى بولسىن!
اق بوز ۇيلەر تىگىلىپ، داستارحانىمىز كەڭىنەن جايىلىپ، جينالعان جۇرت ءان مەن كۇيگە بولەنىپ، ابىر-سابىر بولاتىن وسى مەرەكەنى ءبىرازدان بەرى ساعىنا كۇتكەنىمىز دە راس. ەكى جىلدان بەرى الەمدى جاۋلاعان پاندەميا ىندەتى سالدارىنان ناۋرىز مەيرامىن كەڭ اۋقىمدا اتاي المادىق. مىنە، بيىل ىندەتتىڭ بەتى قايتىپ، ءبارىمىز ەمەن-جارقىن اتاپ وتۋگە مۇمكىندىك الدىق.
مەملەكەت باسشىسى قاسىم-جومارت كەمەلۇلى توقاەۆتىڭ ناۋرىز ايىندا قازاقستان حالقىنا جولداۋىن ارناۋى ەلىمىزدىڭ جاڭا تاريحي كەزەڭى ءتول جاڭا جىلىمىزدان باستالاتىنىن كورسەتتى.
ناۋرىز ءار وتباسىنا قۇت بولىپ ەنسىن، ىرىس-نەسىبەمىز مول بولسىن، شاڭىراقتاردى شاتتىققا كەنەلتىپ، قۋانىشقا تولتىرسىن دەپ تىلەيمىن! ۇلىس وڭ بولسىن، اق مول بولسىن! – دەدى گۇلشارا ابدىقالىقوۆا.
دۋماندى شارادا مارتەبەلى قوناق بولعان قر پارلامەنتى سەناتىنىڭ دەپۋتاتتارى مۇرات باقتيارۇلى مەن اقمارال ءالنازاروۆا جانە ءماجىلىس توراعاسىنىڭ ورىنباسارى بالايىم كەسەباەۆا ەلمەن بىرگە ناۋرىز تويىن تويلاپ، سىر حالقىنا باق-بەرەكە تىلەدى.
ءوڭىر باسشىسى الاڭدا تىگىلگەن كيىز ۇيلەرگە كىرىپ، قازاقى داستۇرمەن بۇلدىرشىندەردىڭ تۇساۋىن كەسىپ، جىر-تەرمەشىلەردىڭ ونەرىن كورىپ، جۇرتشىلىقپەن بىرگە ءاز-ناۋرىزدى قارسى الدى.
مەرەكەگە جينالعان تۇرعىندار دا تاعامدار مەن ناۋرىز كوجەدەن ءدام تاتتى.
دۋماندى شارادا سىر حالقىن وتاندىق ەسترادا جۇلدىزى "ديەتا.كز" توبى قۇتتىقتاپ، ءان شاشۋىن الا كەلدى. ءارى قاراي جەرگىلىكتى ونەرپازدار مەرەكەنى دۋمانعا بولەپ، كوتەرىڭكى كوڭىل-كۇي سىيلادى.
