14 ناۋرىزدا تاڭەرتەڭ الماتى اۋەجايىنان ۋكرايناعا گۋمانيتارلىق كومەك جىبەرىلدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
قازاقستان رەسپۋبليكاسى پرەزيدەنتىنىڭ تاپسىرماسى بويىنشا قر دەنساۋلىق ساقتاۋ مينيسترلىگى ۋكرايناعا گۋمانيتارلىق كومەك دايىندادى. قر ۇكىمەتى جانىنداعى حالىقارالىق گۋمانيتارلىق كومەك كورسەتۋ ماسەلەلەرى جونىندەگى كوميسسيا ۋكراينا حالقىنا مەديتسينالىق پرەپاراتتار ءبولدى.
گۋمانيتارلىق جۇك سالىنعان ۇشاق الماتى-كاتوۆيتسە باعىتىندا ۇشادى. ول جەردە ۋكرايناداعى قازاقستان ازاماتتارى ەۆاكۋاتسيالانعان ەدى. جۇك Air Astana كومپانياسىنىڭ Boeing 767 ۇشاعىنا تيەلدى.
اۋەجاي قىزمەتكەرلەرى اۆتومات جۇكتيەگىش كومەگىمەن اۋەكەمەسىنىڭ جۇك بولىمىنە ارقايسىسىنىڭ سالماعى بىرنەشە توننا بولاتىن ءتورت كونتەينەردى 20 مينۋت ىشىندە ورنالاستىردى.
گۋمانيتارلىق كومەكتىڭ جالپى سالماعى 28,2 توننا بولادى. وندا ءدارى-دارمەكتىڭ 17 ءتۇرى بار: انتيبيوتيكتەر، قابىنۋعا قارسى، جوتەلگە قارسى جانە انتيگيپەرتەنزيۆ پرەپاراتتار. جۇك 14, 15 ناۋرىزدا ەكى رەيسپەن جىبەرىلەدى.
"بۇگىن جۇكتىڭ ءبىر بولىگى جىبەرىلەدى. 31 پاللەت جىبەرىلدى. ەرتەڭ قالعانىن جىبەرەمىز. گۋمانيتارلىق كومەككە ارنالعان پرەپاراتتار حالىقارالىق گۋمانيتارلىق كومەك ماسەلەلەرى جونىندەگى كوميسسيا وتىرىسىنىڭ حاتتامالارى جانە دەنساۋلىق ساقتاۋ مينيسترلىگىنىڭ ۇسىنىستارى بويىنشا تاڭدالدى. ۋكراينا تاراپى قازىر ولارعا قانداي ءدارى-دارمەكتەر قاجەت ەكەنىن ايتتى. بارلىق پرەپارات قازاقستاندا وندىرىلگەن", - دەدى "سك-فارماتسيا" جشس الماتى قالاسى بويىنشا وكىلدىگىنىڭ مەنەدجەرى شولپان ادىلبەكوۆا.
جۇك بىرنەشە كۇن ىشىندە جەدەل جينالعانى ايتىلدى. پرەپاراتتار ءۇشىن ارنايى ساقتاۋ شارتتارى قاجەت ەمەس، تەك تەمپەراتۋرا +15-تەن +25 گرادۋسقا دەيىن بولۋى كەرەك.
"ادىرنا" ۇلتتىق پورتالى
