اقش-تىڭ جەتەكشى اناليتيكالىق ورتالىقتارىنىڭ ءبىرى «اتلانتيكالىق كەڭەس» الاڭىندا «قازاقستاندىق-امەريكالىق قارىم-قاتىناستارعا وتىز جىل: قاڭتار داعدارىسى جانە بولاشاققا جول» تاقىرىبىندا پانەلدىك پىكىرتالاس ءوتتى، دەپ حابارلايدى قر ءسىم ءباسپاسوز قىزمەتى.
حالىقارالىق سالىق جانە ينۆەستيتسيا ورتالىعىنىڭ پرەزيدەنتى دەنيەل ۆيت ءوز العىسوزىندە ەكىجاقتى ىنتىماقتاستىقتىڭ نەگىزگى جەتىستىكتەرى مەن قازاقستاننىڭ عالامدىق تۇراقتىلىق پەن قاۋىپسىزدىكتى قامتاماسىز ەتۋگە قوسقان ەلەۋلى ۇلەسىن اتاپ ءوتتى.
قازاقستاننىڭ اقش-تاعى ەلشىسى ەرجان اشىقباەۆ قاڭتار وقيعالارىنىڭ تۇپكى سەبەپتەرىن جويۋ بويىنشا ۇكىمەتىنىڭ قابىلداپ جاتقان شارالارى تۋرالى بايانداپ، تەرگەۋدىڭ اشىق نەگىزدە ۇلتتىق زاڭناما مەن ەلىمىزدىڭ حالىقارالىق مىندەتتەمەلەرىنە سايكەس جۇرگىزىلەتىنىنە سەندىردى.
پرەزيدەنت قاسىم-جومارت توقاەۆتىڭ «جاڭا قازاقستاندى» قۇرۋعا باعىتتالعان رەفورمالارى مەن باستامالارى، سونداي-اق حالىقتىڭ ءال-اۋقاتىن ارتتىرۋعا باعىتتالعان ۇكىمەت قىزمەتىنىڭ باسىمدىقتارىنا باستى نازار اۋدارىلدى. بۇل تۇرعىدا، ەلشى مەملەكەت باسشىسىنىڭ ساياسي رەفورمالار مەن دەموكراتيالىق وزگەرىستەردى ودان ءارى جۇزەگە اسىرۋ باعىتىنا بەيىلدىلىگىن راستادى.
ءوز كەزەگىندە، اتلانتيكالىق كەڭەستىڭ ەۋرازيا ورتالىعىنىڭ اعا ديرەكتورى دجون حەربست قازاقستاننىڭ ورتالىق ازياداعى تۇراقتاندىرۋشى جانە تەڭگەرۋشى ءرولىن، سونداي-اق ءوزىنىڭ تيىمدىلىگىن دالەلدەگەن كوپۆەكتورلى سىرتقى ساياساتىنىڭ ءساتتى جۇزەگە اسىرىلۋىن اتاپ ءوتتى.
«New Lines Institute» وي-تالقى ورتالىعىنىڭ ديرەكتورى كامران بوحاري قاڭتارداعى وقيعا قازاقستاننىڭ دامۋ تراەكتورياسىنا اسەر ەتپەگەنىن اتاپ ءوتتى. ونىڭ پىكىرىنشە، مەملەكەتتى وزگەرتۋ جانە ەكونوميكالىق دامۋدى جەدەلدەتۋ بەلگىلى ءبىر كۇش-جىگەردى قاجەت ەتەدى جانە مەملەكەت باسشىلىعى وڭ باعىتتا كەلە جاتىر.
اتلانتيكالىق كەڭەستىڭ اعا عىلىمي قىزمەتكەرى اريەل كوەن اقش-تىڭ سانكتسيالىق ساياساتىنىڭ تەرىس اسەرىنىڭ الدىن الۋدىڭ ماڭىزدىلىعىن اتاپ ءوتىپ، ەلىمىز كاسپي قۇبىر كونسورتسيۋمى ارقىلى الەمدىك مۇناي جەتكىزىلىمىنىڭ 1,2% قامتاماسىز ەتەتىنىنە نازار اۋداردى.
جالپى، ءىس-شاراعا قاتىسۋشىلار قازاقستانداعى ساياسي جانە ەكونوميكالىق رەفورمالارعا وڭ باعا بەرىپ، ولاردىڭ وزەكتىلىگى مەن ۇزاق مەرزىمدى تيىمدىلىگىنە سەنىم ءبىلدىردى. ساراپشىلار قازاقستاننىڭ اۋقىمدى ەۋرازيا ايماعىنداعى تۇراقتاندىرۋشى ءرولىن جانە ەكىجاقتى ىنتىماقتاستىقتى تەرەڭدەتۋ ءۇشىن ەلەۋلى الەۋەتتىڭ بولۋىن ەسكەرە وتىرىپ، اقش پەن قازاقستان اراسىنداعى كەڭەيتىلگەن ستراتەگيالىق ارىپتەستىكتى ودان ءارى دامىتۋدىڭ ماڭىزدىلىعىن اتاپ ءوتتى.
“ادىرنا” ۇلتتىق پورتالى
