ۋكراينانىڭ بۇرىنعى پرەزيدەنتى ۆيكتور يانۋكوۆيچ قازىرگى مەملەكەت باسشىسى ۆلاديمير زەلەنسكيگە قانتوگىستى قالاي بولسا دا توقتاتۋعا شاقىردى، - دەپ حابارلايدى "ادىرنا" پورتالى ريا نوۆوستيگە سىلتەمە جاساپ.
يانۋكوۆيچتىڭ ايتۋىنشا، قاقتىعىسقا قاتىسۋشى بارلىق تاراپتار بىتىمگەرشىلىك كەلىسىمدى كۇتىپ وتىر.
"مەنسىز-اق سىزگە كەڭەس بەرىپ، اقىل ايتاتىن جانداردىڭ كوپتىگىن بىلەمىن، بىراق جەكە ءوزىڭىز قانداي جاعدايدا دا قانتوگىستى توقتاتىپ، بەيبىت كەلىسىمگە كەلۋگە مىندەتتىسىز. مۇنى ۋكراينا دا، دونباسس تا جانە رەسەي دە سىزدەن كۇتۋدە. سىزگە ۋكراين حالقى دا باتىستاعى سەرىكتەستەر دە ريزا بولار ەدى»، - دەلىنگەن ەكس-پرەزيدەنتتىڭ ۇندەۋىندە.
28 اقپاندا، 3 جانە 7 ناۋرىزدا بەلارۋس اۋماعىندا رەسەي مەن ۋكراينا دەلەگاتسيالارى اراسىنداعى كەلىسسوزدەردىڭ ءۇش راۋندى ءوتتى. ەكىنشى راۋند بارىسىندا تاراپتار ازاماتتاردى ەۆاكۋاتسيالاۋ، ازىق-تۇلىك پەن ءدارى-دارمەك جەتكىزۋ ءۇشىن گۋمانيتارلىق دالىزدەردى بىرلەسىپ قامتاماسىز ەتۋ تۋرالى تۇسىنىستىككە قول جەتكىزدى.
كەلىسسوزدەردىڭ ءتورتىنشى راۋندى جاقىن ارادا وتەدى، دەپ بۇعان دەيىن دۋمانىڭ حالىقارالىق ىستەر جونىندەگى كوميتەتىنىڭ باسشىسى، ماسكەۋ دەلەگاتسياسىنىڭ مۇشەسى لەونيد سلۋتسكي ءمالىم ەتتى.
ەسكە سالايىق، رەسەي ۋكراينادا اسكەري وپەراتسياسىن 24 اقپاندا باستاعان بولاتىن. پرەزيدەنت ۆلاديمير پۋتين ونىڭ ماقساتىن «سەگىز جىل بويى كيەۆ رەجيمى تاراپىنان زورلىق-زومبىلىق پەن گەنوتسيدكە ۇشىراعان ادامداردى قورعاۋ» دەپ اتادى. ول ءۇشىن، ونىڭ ايتۋىنشا، «ۋكراينانى دەميليتاريزاتسيالاۋ جانە دەنازيالاندىرۋ» جۇرگىزۋ كەرەك، دونباسستا «بەيبىت تۇرعىندارعا قارسى قاندى قىلمىستار» ءۇشىن جاۋاپتى بارلىق اسكەري قىلمىسكەرلەردى جاۋاپقا تارتۋ جوسپارلانۋدا.
"ادىرنا" ۇلتتىق پورتالى
