جەر الەم نۇرلاناتىن، جان جۇرەكتى جادىراتاتىن مەرەيلى ءسات 8 ناۋرىز مەرەكەسى قارساڭىندا وبلىس اكىمى گۇلشارا ابدىقالىقوۆا ءتۇرلى سالادا تەر توگىپ، قوعام دامۋىنا قىزمەت ەتكەن شاڭىراق شىرايى ايەلدەر قاۋىمىمەن كەزدەستى.
ەرەكشە باسقوسۋعا ەل دامۋىنا ەلەۋلى ۇلەس قوسىپ جۇرگەن 30-عا جۋىق كوپبالالى باتىر انالار مەن ەڭبەك ادامدارى شاقىرىلدى. ەرگە بەرگىسىز قىزمەت ەتىپ، انالىق مەيىرىممەن قوعامعا جاقسىلىق تىلەپ جۇرگەن انالار اراسىندا اسكەري ءبولىمنىڭ ەفرەيتورى، كران جۇرگىزۋشى، اۋلا سىپىرۋشى سەكىلدى ەرەكشە ماماندىق يەلەرى دە بار.
كورىكتى كەزدەسۋدە ايماق باسشىسى گۇلشارا ابدىقالىقوۆا ايەل-انالاردى كوكتەمنىڭ شۋاقتى مەركەسىمەن قۇتتىقتاپ، سىر ءوڭىرىنىڭ وركەندەۋىنە ايانباي ۇلەس قوسىپ جۇرگەن بەلسەندى ايەلدەر قاۋىمى، ىسكەر ايەل-انالار، قىز-كەلىنشەكتەر ءۇشىن بۇل مەيرامنىڭ ەرەكشە مانگە يە ەكەنىن جەتكىزدى.
- بۇگىن اياۋلى انالارعا شىنايى العىسىمىزدى بىلدىرسەك دەگەن نيەتپەن جينالىپ وتىرمىز. ءبىزدىڭ انالارىمىز، ارۋلارىمىز تەك وتباسىنىڭ ۇيىتقىسى عانا ەمەس، ولار - بۇكىل قوعامدى العا سۇيرەپ، ەل ىنتىماعىن نىعايتىپ، نەسىبەسىن مولايتىپ جۇرگەن قۋاتتى كۇش.
مەملەكەت باسشىسى قاسىم-جومارت كەمەلۇلى توقاەۆ 2022 جىلدى بالالار جىلى دەپ جاريادى. بالا تاربيەسىنە قاشاندا ۇلت تاربيەسى دەپ قاراعان دانا حالقىمىز بولاشاق ۇرپاقتى دۇنيەگە اكەلىپ، باعىپ-قاعىپ، قياعا ۇشىراتىن انالاردى ارداقتاي دا، ايالاي دا بىلگەن. بارلىق ۋاقىتتا حالقىمىز وزىنە ەڭ قىمبات ۇعىمداردى – وتان مەن جەر، ءتىلدى – انا اتىمەن بايلانىستىرعان. ويتكەنى، تىرشىلىكتىڭ ءنارى دە، ءمانى دە – انا.
سىزدەر ارقاشان يبالىق مەن ىزەتتىڭ، پاراسات پەن پايىمنىڭ، مەيىرىمدىلىك پەن ىزگىلىكتىڭ باستاۋى بولىپ كەلەسىزدەر. بۇگىنگى كۇنى بيلىك پەن مەملەكەتتىك قىزمەتتە، رەسپۋبليكالىق دەڭگەيدەگى باسقارۋشى ورگانداردا ايەلدەر ۇلەسىنىڭ ارتۋى – سىزدەردىڭ قارىمدى قابىلەتتەرىڭىز بەن ىسكەرلىكتەرىڭىزدىڭ دالەلى.
ءتول مەرەكەمىز تاعى دا قۇتتى بولسىن!، – دەدى گۇلشارا ابدىقالىقوۆا.
مەيىرىمگە تولى باسقوسۋدا وبلىستىق ءماسليحات حاتشىسى ناۋرىزباي بايقاداموۆ، وبلىستىق ارداگەرلەر كەڭەسىنىڭ توراعاسى سەرىك دۇيسەنباەۆ انالارعا يگى تىلەگىن ارناپ، ءىلتيپات ءبىلدىردى.
كەزدەسۋدە باتىر انا، ەڭبەك جانە تىل ارداگەرى كۇلتاي رىسپامبەتوۆا، ءتول ونەرىمىزدى جاڭعىرتىپ جۇرگەن جىراۋ زاۋرە كارىباەۆا، ءۇش دۇركىن «التىن دومبىرا» يەگەرى، ايتىسكەر اقىن مۇحتار نيازوۆتىڭ اناسى جۇماكۇل وڭعارباەۆا اقجارما تىلەگىن جەتكىزدى. قۇرمەت تورىنەن كورىنگەن اسكەري قىزمەتشىنىڭ اناسى الماگۇل قۇرمانباەۆا دا ەل تىنىشتىعى ءۇشىن قيىندىقپەن بەتپە-بەت كەلگەن ازاماتتاردىڭ اناسىنا شىنايى العىسىن ءبىلدىرىپ، "قاسىرەتتى قاڭتار" وقيعاسى كەزىندە ۇلىنان ايىرىلعان انالاردىڭ جان-دۇنيەسىن جاقسى تۇسىنەتىنىن تىلگە تيەك ەتتى.
جيىندا «ەل نامىسى» ارنايى مونيتورينگتىك توبىنىڭ جەتەكشىسى ناتاليا ميشۋكوۆا، كاراتە-دودان حالىقارالىق دارەجەدەگى سپورت شەبەرى، ەكى دۇركىن الەم چەمپيونى ءمولدىر جاڭبىرباي قۇرمەتكە يە بولدى.
شارا ارنايى كونتسەرتتىك باعدارلامامەن جالعاسىپ، جەرگىلىكتى ونەرپازدار انالارعا قۇرمەتىن اسەرلى انمەن جەتكىزدى.
