مەملەكەت باسشىسى نۇرسۇلتان نازارباەۆ قازاق ءتىلىن كيريلليتسادان لاتىن قارپىنە كوشىرۋ تۋرالى جارلىققا بىلتىر جىل سوڭىندا قول قويعان بولاتىن. جاسىراتىنى جوق، سودان بەرى كورشى رەسەي حالقى بۇل رەفورمانى قازاقتاردان از تالقىلاعان جوق. ءبىرازى جاقتاسا، كوبى «ورىس الەمىنەن الىستاپ باراسىڭدار» دەپ قاباق شىتتى. ال، كۇنى كەشە «روسسيا 1» تەلەارناسىنان تىكەلەي ەفيردە شىعاتىن «ۆوسكرەسنىي ۆەچەر» توك-شوۋىندا ورىس ساياساتكەرلەرى مەن تەلەجۇرگىزۋشى ۆلاديمير سولوۆەۆ قازاقتىڭ ءتىلىن مازاق ەتىپ، ەلدە مايدان بولۋى مۇمكىن دەپ قورقىتتى.
سولوۆەۆتىڭ جەكسەنبىلىك كەشى بۇل جولى اقش پەن جاقتاستارىنىڭ سيريانى اتقىلاۋىنا ارنالدى. تالقىلاۋ بارىسىندا تەلەجۇرگىزۋشى «قازاقستان نە ءۇشىن بۇل تۇرعىدا رەسەيدى جاقتاپ، ءسوزىن سويلەگەن جوق» دەگەن ماسەلە كوتەردى. ەستە بولسا، قازاقستان بيلىگى وسىدان بىرەر كۇن بۇرىن «سيرياداعى جاعداي قارۋمەن ەمەس، ساياسي-بەيبىت جولمەن شەشىلۋى ءتيىس» دەگەن پىكىرىن ايتقان بولاتىن. ال، ورىس ساياساكەرلەرى مەن ساياساتتانۋشىلارىنىڭ پىكىرىنشە، قازاقستان بيلىگى اقش-تى ايىپتاپ، سيريا مەن رەسەي بيلىگىن «قولپاشتاۋى» كەرەك ەكەن.
وسىلاي دەپ قازاق كورشىلەرىنە رەنىشتەرىن بىلدىرگەن سولوۆەۆ پەن ونىڭ قوناقتارى قازاقستاننىڭ رەسەيدەن الشاقتاپ بارا جاتقانىن ايتتى. ءتىپتى، لاتىن الفاۆيتىنە كوشۋىمىزدى مازاق ەتىپ، قازاقستاندا ۋكرايناداعىداي مايدان بولۋى مۇمكىن دەگەندى ايتىپ قالدى.
«قازاقستانمەن ءبىزدىڭ اليانس قانداي ءوزى؟ ولار نەگە ءۇنسىز قالدى بىزگە قولداۋ بىلدىرمەي؟ ءبىز بىلمەيتىن شىعارمىز، بالكىم ارامىزدان قارا مىسىق كەسىپ وتكەن بولار؟ الدە كەلەسى مايداننىڭ قازاقستاندا بولاتىنىن كۇتەمىز بە؟» - دەدى تەلەجۇرگىزۋشى ۆلاديمير سولوۆەۆ ستۋديا قوناقتارىنا.
«وكىنىشكە قاراي، قازاقستان تاۋەلسىزدىك العان ۋاقىتتان بەرى اقىرىنداپ قازاقىلانىپ بارادى. ماسەلەن، 91-جىلعا دەيىن ەلدە ورىستاردىڭ سانى كوپ بولسا، قازىر از ۇلتتاردىڭ بىرىنە اينالدى» - دەپ زاتۋلين وكىنىشىمەن ءبولىستى.
