قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسىنىڭ توراعالىعىمەن قورعانىس مينيسترلىگىندە ارميانى ودان ءارى دامىتۋ ماسەلەلەرى جونىندە كەڭەس ءوتتى، دەپ حابارلايدى “ادىرنا” ۇلتتىق پورتالى اقورداعا سىلتەمە جاساپ.
قاسىم-جومارت توقاەۆ قورعانىس ۆەدومستۆوسىنىڭ باسشىلىعىنا اسكەري قاۋىپسىزدىكتىڭ قازىرگى جاعدايىن ەسكەرە وتىرىپ، قارۋلى كۇشتەردىڭ قۇرىلىمى مەن قۇرامىن جاڭعىرتۋ جونىندە تاپسىرما بەردى. سونىمەن قاتار زاماناۋي تسيفرلىق تاسىلدەر ارقىلى اسكەري باسقارۋ جۇيەسىن جەتىلدىرۋ قاجەت ەكەنىنە نازار اۋداردى.
جيىندا قازاقستان اسكەرىن زاماناۋي ءارى جوعارى تەحنولوگيالى قارۋ تۇرلەرىمەن، اسكەري تەحنيكامەن قايتا جابدىقتاۋ ماسەلەلەرى تالقىلاندى. قورعانىس مينيسترلىگىنە اسكەري كۇشتەردى پايدالانۋدىڭ جاڭا ادىستەرىن ەنگىزۋ ارقىلى جاۋىنگەرلىك دايىندىق باعدارلاماسىن قايتا قاراۋ تاپسىرىلدى.
مەملەكەت باسشىسى اسكەري قىزمەتشىلەردىڭ كاسىبي دەڭگەيىن ارتتىرۋ، مەريتوكراتيا قاعيداتى نەگىزىندە مانساپتى ءوسىرۋ ماقساتىمەن اسكەري ءبىلىم بەرۋ جانە كادرلىق ساياسات جۇيەسىن دامىتۋ ماسەلەلەرىنە باسا ءمان بەردى. پرەزيدەنت اسكەري قىزمەتشىلەر مەن اسكەري قىزمەتتىڭ الەۋمەتتىك مارتەبەسىن ارتتىرۋ جانە جاستاردى اسكەري بورىشىن وتەۋگە ىنتالاندىرۋ قاجەتتىگى تۋرالى ايتتى.
جيىن سوڭىندا جوعارعى باس قولباسشى مەملەكەتتىڭ مۇددەسىن جانە ءاربىر ازاماتتىڭ قاۋىپسىزدىگىن قورعاۋ قارۋلى كۇشتەردىڭ مىندەتى ەكەنىن اتاپ ءوتتى.
“ادىرنا” ۇلتتىق پورتالى
