«اتامەكەن» ۇكپ تورالقا توراعاسى اقتوبە اگلومەراتسياسىنىڭ كاسىپكەرلەرىمەن كەزدەستى.
رايىمبەك باتالوۆتىڭ جۇمىس ساپارى اقتوبە وبلىسىنان باستالدى. پالاتا باسشىسى تاياۋ ۋاقىتتا قازاقستاننىڭ نەگىزگى اگلومەراتسيالارىنىڭ، شاعىن جانە ميكروبيزنەستىڭ، سونداي-اق اۋىل شارۋاشىلىعىنداعى كاسىپكەرلەردىڭ قيىندىقتارىمەن تانىسۋدى جوسپارلاپ وتىر.
اقتوبەدەگى العاشقى كەزدەسۋگە جۇزدەن اسا كاسىپكەر جينالدى. ريتەيل، وندىرىستىك جانە سەرۆيستىك كومپانيالاردىڭ وكىلدەرى جەرگىلىكتى كاسىپكەرلەر ءۇشىن وزەكتى ماسەلە شاعىن شارۋا قوجالىقتارى، شاعىن جانە ميكروبيزنەس ءۇشىن ناقتى قولداۋ باعدارلامالارىنىڭ جوقتىعى دەپ سانايدى.
«ءبىزدىڭ ناقتى مىندەتتەرىمىزدى ەسكەرەتىن شاعىن-ميكروبيزنەستى قولداۋ باعدارلامالارى جوق. كوبىسى ايتادى، بىراق ەشكىم ەشتەڭە ىستەمەيدى»، – دەيدى كاسىپكەرلەر.
ۇكپ وكىلدەرى كاسىپكەرلەردىڭ پىكىرىمەن كەلىسەدى. ۇلتتىق پالاتا مەملەكەتتىك قولداۋ شارالارىن تالدادى. سوندا ولاردىڭ كوپشىلىگى ورتا جانە ءىرى بيزنەس سۋبەكتىلەرىنە ارنالعانى انىقتالدى. ەل كاسىپكەرلەرىنىڭ باسىم بولىگى – شاعىن جانە ميكروبيزنەس وكىلدەرى. ال كاسىپكەرلەردى قولداۋ باعدارلامالارى ولارعا باعىتتالماعان.
«اكىمدىكتەرمەن بىرلەسىپ، باعدارلامالاردى ميكرو جانە شاعىن بيزنەسكە پايدالى بولۋى ءۇشىن قالاي ترانسفورماتسيالاۋ كەرەگىن بىلەمىز. ءاربىر وڭىردەگى بيزنەستىڭ پروبلەمالارى مەن قاجەتتىلىكتەرى ۇنەمى وزەكتى ماسەلە بولۋى ءتيىس. بۇگىن، ەڭ باستىسى، شاعىن جانە ميكروبيزنەستىڭ قاجەتىن ەستۋىمىز كەرەك»، – دەپ اتاپ ءوتتى رايىمبەك باتالوۆ.
كەزدەسۋدە جەر تەلىمدەرىنە قولجەتىمدىلىك، اۋىل شارۋاشىلىعى تەحنيكاسىنىڭ قىمباتتاۋى، سۋبسيديالاۋ جانە مامانداردىڭ جەتىسپەۋشىلىگىنە قاتىستى ماسەلەلەر كوتەرىلدى. باستى پروبلەمالاردىڭ ءبىرى – ست-KZ ۇلتتىق ءوندىرۋشىنىڭ سەرتيفيكاتتارىن بەرۋ. بيزنەس يەلەرى «اتامەكەننىڭ» وڭىرلىك وكىلدىگىنە سەرتيفيكات الۋدىڭ كۇردەلى مەحانيزمى جانە ەشتەڭە وندىرمەي قۇجاتتى الىپ جاتقان، ءىسىن ادال جۇرگىزبەيتىن كاسىپكەرلەرگە بىرنەشە رەت شاعىمدانعان.
«ءىسىن ادال جۇرگىزبەيتىن بىرنەشە كاسىپكەردىڭ كەسىرىنەن قالعان بيزنەس زارداپ شەكپەۋى ءتيىس. جاقىن ارادا مەحانيزمدى وڭايلاتۋ كەرەك. مۇنىمەن كەلىسەمىن»، – دەدى ۇكپ باسشىسى.
سونىمەن قاتار جەر قويناۋىن پايدالانۋشىلاردىڭ ساتىپ الۋىندا جەرگىلىكتى شاعىن جانە ورتا بيزنەستىڭ مۇددەسىن ساقتاۋ ماسەلەسى، ءبىلىم بەرۋ سەكتورىندا بيزنەستى دامىتۋ پروبلەمالارى تالقىلاندى.
رايىمبەك باتالوۆ كەزدەسۋدى قورىتىندىلاي كەلە، «اتامەكەن» ۇكپ قىزمەتىنىڭ باستى باعىتى شاعىن جانە ميكروبيزنەستى قولداۋعا باعىتتالعانىن جانە پالاتا پىكىرتالاس بارىسىندا كوتەرىلگەن بارلىق ماسەلەنى مىندەتتى تۇردە شەشەتىنىن تاعى دا اتاپ ءوتتى.
ءارى قاراي «اتامەكەن» ۇكپ باسشىسى وڭىردەگى فەرمەرلىك قوجالىقتاردى ارالادى. مارتوك اۋىلىنداعى شارۋالارمەن كەزدەستى. جاقىن اۋدانداردان 60 فەرمەر جينالدى. وزەكتى ماسەلەلەردىڭ ءبىرى – شاعىن شارۋا قوجالىقتارى ءۇشىن سۋبسيديالاردىڭ قولجەتىمسىزدىگى ايتىلدى.
«قازىر سۋبسيديالار نەگىزىنەن ءىرى شارۋاشىلىقتارعا كەتەدى. «اتامەكەن» بۇل ولقىلىقتى جويعىسى كەلەدى. ماسەلەنى شەشۋ ءۇشىن مەحانيزمدى وزگەرتىپ قانا قويماي، ءاربىر اۋداندا جەرگىلىكتى جەردىڭ ەرەكشەلىگىنە بايلانىستى شارۋاشىلىقتى دامىتۋ باعدارلاماسىن ازىرلەۋ ماڭىزدى»، – دەپ جاۋاپ بەردى رايىمبەك باتالوۆ.
كاسىپكەرلەر جەرگە ءموراتوريدىڭ جۇمىسقا قالاي كەدەرگى كەلتىرەتىنى، جوسىقسىز كاسىپكەرلەر يگەرمەگەن جەرلەردى اينالىمعا قايتارۋ قاجەتتىلىگى جانە Qoldau جۇيەسىنىڭ ساپاسىز جۇمىسى تۋرالى ايتتى. اۋىل شارۋاشىلىعى تەحنيكالارىنىڭ پاركىن جاڭارتۋ ماسەلەلەرى دە شەشۋدى تالاپ ەتەدى. «قازاگرو» ونى نارىقتاعىدان ەداۋىر جوعارى باعامەن ساتادى، ال تەحنيكانى شەتەلدەن اكەلۋگە كادەگە جاراتۋ الىمى كەدەرگى كەلتىرەدى.
رايىمبەك باتالوۆ جاقىن ارادا «اتامەكەن» ۇكپ الاڭىندا فەرمەرلەر مەن اۋىل شارۋاشىلىعى ءمينيسترى اراسىندا اشىق پىكىرتالاس وتكىزۋدى، سونداي-اق بۇگىنگى كەزدەسۋلەردە ايتىلعان ماسەلەلەردى پرەمەر-مينيسترمەن تالقىلاۋدى جانە ولاردى تولىق شەشكەنگە دەيىن نازاردا ۇستايتىنىن جەتكىزدى.
كەلەسى اپتادا «اتامەكەن» ۇكپ باسشىلىعى الماتى، نۇر-سۇلتان قالاسى جانە وڭتۇستىك ءوڭىر اگلومەراتسيالارىنىڭ بيزنەسمەندەرىمەن كەزدەسۋدى جوسپارلاپ وتىر.
