بەلگىلى اقىن مۇحتار شاحانوۆتىڭ تۋعان اپكەسى ىزەت شاحانقىزى دۇنيەدەن وزدى. مارقۇمنىڭ جاتقان جەرى جايلى، توپىراعى تورقا بولسىن! جۇزگە كەلگەن قاريا شەشەندىگىمەن كوپتى تامساندىرعان. Qamshy.kz اقپارات اگەنتتىگى ىزەت شاحانقىزى تۋرالى ءبىرشاما ەستەلىكتى وقىمان نازارىنا ۇسىنادى.
«قارتتار ۇيىندە تۇرامىن»
قازاقتىڭ ءبىرتۋار دارىندى ۇلى مۇحتار شاحانۇلىنىڭ تۋعان اپكەسى ىزەت شاحانقىزى شىمكەنت قالاسىندا تۇرادى. ءالى دە تىڭ، تىلگە شەشەن اپامىزدىڭ ازىلقوي، ۋىتتى سوزدەرىمەن حالىقتى تانىستىرعىمىز كەلدى.
قاسقاسۋعا اعايىنشىلاپ، قىدىرىپ، الىستان قوناقتار كەلەدى. بۇل اۋىلدا اقىن مۇحتار شاحانوۆتىڭ تۋعان اپكەسى ىزەت اپا تۇراتىنىن ەستىگەن مۇحتاردىڭ ولەڭىن جاتقا وقيتىن بىرەۋى:
– ىزەت اپانىڭ قولىن الىپ، امانداسىپ شىعايىق – دەپ قولقا سالسا، ءبارى قۇپ كورىپتى.
ىزەت اپا ۇلكەن ۇلى امانبايدىڭ ۇيىندە ءجۇر ەكەن. قوناقتار ۇيگە كىرىپ، امانداسىپ، ءشاي ءىشىپ، اڭگىمە-دۇكەن قۇرىپ وتىرعاندا قوناقتىڭ ءبىرى:
– اپا، كىمنىڭ ۇيىندە تۇراسىز؟ – دەپ توسىننان سۇراق قويادى.
– قارتتار ۇيىندە تۇرامىن – دەيدى قۋ ءتىلدى اپا. قوناقتار اڭىراپ، تۇسىنبەي ءۇن-ءتۇنسىز قالادى.
– ۇلكەن ۇلىم جەتپىستەن استى، كەلىنىم جەتپىسكە كەلدى. ەكەۋى دە شال مەن كەمپىر، تاياق سۇيەنىپ جۇرەدى. مەن دە تاياق سۇيەنىپ ولارعا قوسىلعاندا، قارتتار ءۇيى بولماعاندا نەسى قالدى؟ – دەپ ءبىر كۇلدىرگەن ەكەن.
مەنىڭ جاسىمدى بەرمەسىن. . .
ىزەت اپا قالامپىر دەگەن قىزىنىڭ ۇيىندە وتىرسا، اۋىلدىڭ قاتىن-قالاشتارى جيىلىپ قالادى. اس ءىشىپ، تارقار كەزىندە:
– اپا، بىزگە ءسىزدىڭ جاسىڭىزدى بەرسىن! ءCىزدىڭ جاسىڭىزعا جەتۋ ءبىز ءۇشىن ارمان، باقىت عوي – دەيدى ءبارى ءبىراۋىزدان شۋلاپ.
– مەنىڭ جاسىما جەتسەڭ جەتىسەرسىڭ، – دەپ اپا دۇڭك ەتكىزەدى. شۋلاپ تۇرعاندار جىم بولادى. بارىنە باعدارلاپ، ءبىر قاراپ الادى دا:
– مەنىڭ جاسىمدى بەرمەي-اق قويسىن. تۇرسام وتىرا المايمىن، وتىرسام تۇرا المايمىن. ءتورت اياقتاپ جۇرگەننىڭ نەسى جاقسى؟ – دەپتى اشى مىسقىلمەن.
وتتاي بەرەدى. . .
بىر جيىندا قوناق بولىپ كەلگەن ىزەت اپاعا:
– اجە، جۇزگە كەلىڭىز، شوپشەك كورىڭىز، باقىتتى بولىڭىز – دەپ ءۇي يەسى العىسىن ءبىلدىرىپ جاتادى. سوندا ىزەت اپا:
– مۇنداي تىلەگىڭە ماعان قارايتىن كەلىننىڭ نە ايتقىسى كەلەتىنىن ەستىگىڭ كەلە مە؟
– ءيا، دەپتى ءۇي يەسى.
– ەسسىز قالعىر، وزدەرى باقپايتىن بولعاسىن وتتاي بەرەدى ەكەن-اۋ دەيدى ول، – دەپ جەڭىل جىميىپتى اپامىز.
كىمگە بەردىڭ؟
ىزەت اپا نەمەرە كەلىنىن ءتۇسىرىپ، توي وتەدى. ەكى جاق ءبىر-بىرىنە قالىڭ مالىن تاپسىرىپ، كيتىن ءبولىسىپ، كاكىر-شۇكىر تاۋارلارىن الماسىپ، قىزدىڭ توركىنىنەن كەلگەندەر قوشتاسىپ جاتادى. ىزەت اپاعا قىزدىڭ شەشەسى:
– ال، قۇداعي، دەنىڭىز ساۋ بولىپ، جاستاردىڭ الدىندا قارايىپ جۇرە بەرىڭىز. قىزىمدى تۇمسىقتىعا شوقىتپاي، قاناتتىعا قاقتىرماي ماپەلەپ، قاعىپ، باعىپ ءوسىردىم. قىزىمدى قىزىڭىزداي كورىڭىز، سىزگە تاپسىردىم – دەپتى.
– قۇداعي، قىزىڭدى ماعان نەسىنە تاپسىراسىڭ؟ جاسىم سەكسەن التىدا، – دەپتى اپا. ساسىپ قالعان قۇداعيى قىزارىپ كەتەدى.
– قىزىڭدى كىمگە بەردىڭ، سوعان تاپسىر، – دەپ جۇرتتى ءبىر كۇلدىرىپتى.
