Belgili aqyn Muhtar Shahanovtyń týǵan ápkesi Izet Shahanqyzy dúnıeden ozdy. Marqumnyń jatqan jeri jaıly, topyraǵy torqa bolsyn! Júzge kelgen qarııa sheshendigimen kópti tamsandyrǵan. Qamshy.kz aqparat agenttigi Izet Shahanqyzy týraly birshama estelikti oqyman nazaryna usynady.
«Qarttar úıinde turamyn»
Qazaqtyń birtýar daryndy uly Muhtar Shahanulynyń týǵan ápkesi Izet Shahanqyzy Shymkent qalasynda turady. Áli de tyń, tilge sheshen apamyzdyń ázilqoı, ýytty sózderimen halyqty tanystyrǵymyz keldi.
Qasqasýǵa aǵaıynshylap, qydyryp, alystan qonaqtar keledi. Bul aýylda aqyn Muhtar Shahanovtyń týǵan ápkesi Izet apa turatynyn estigen Muhtardyń óleńin jatqa oqıtyn bireýi:
– Izet apanyń qolyn alyp, amandasyp shyǵaıyq – dep qolqa salsa, bári qup kóripti.
Izet apa úlken uly Amanbaıdyń úıinde júr eken. Qonaqtar úıge kirip, amandasyp, sháı iship, áńgime-dúken quryp otyrǵanda qonaqtyń biri:
– Apa, kimniń úıinde turasyz? – dep tosynnan suraq qoıady.
– Qarttar úıinde turamyn – deıdi qý tildi apa. Qonaqtar ańyrap, túsinbeı ún-túnsiz qalady.
– Úlken ulym jetpisten asty, kelinim jetpiske keldi. Ekeýi de shal men kempir, taıaq súıenip júredi. Men de taıaq súıenip olarǵa qosylǵanda, qarttar úıi bolmaǵanda nesi qaldy? – dep bir kúldirgen eken.
Meniń jasymdy bermesin. . .
Izet apa Qalampyr degen qyzynyń úıinde otyrsa, aýyldyń qatyn-qalashtary jıylyp qalady. As iship, tarqar kezinde:
– Apa, bizge sizdiń jasyńyzdy bersin! Cizdiń jasyńyzǵa jetý biz úshin arman, baqyt ǵoı – deıdi bári biraýyzdan shýlap.
– Meniń jasyma jetseń jetisersiń, – dep apa dúńk etkizedi. Shýlap turǵandar jym bolady. Bárine baǵdarlap, bir qarap alady da:
– Meniń jasymdy bermeı-aq qoısyn. Tursam otyra almaımyn, otyrsam tura almaımyn. Tórt aıaqtap júrgenniń nesi jaqsy? – depti ashy mysqylmen.
Ottaı beredi. . .
Bir jıynda qonaq bolyp kelgen Izet apaǵa:
– Áje, júzge kelińiz, shópshek kórińiz, baqytty bolyńyz – Dep úı ıesi alǵysyn bildirip jatady. Sonda Izet apa:
– Mundaı tilegińe maǵan qaraıtyn kelinniń ne aıtqysy keletinin estigiń kele me?
– Iá, depti úı ıesi.
– Essiz qalǵyr, ózderi baqpaıtyn bolǵasyn ottaı beredi eken-aý deıdi ol, – dep jeńil jymıypty apamyz.
Kimge berdiń?
Izet apa nemere kelinin túsirip, toı ótedi. Eki jaq bir-birine qalyń malyn tapsyryp, kıtin bólisip, kákir-shúkir taýarlaryn almasyp, qyzdyń tórkininen kelgender qoshtasyp jatady. Izet apaǵa qyzdyń sheshesi:
– Al, qudaǵı, denińiz saý bolyp, jastardyń aldynda qaraıyp júre berińiz. Qyzymdy tumsyqtyǵa shoqytpaı, qanattyǵa qaqtyrmaı mápelep, qaǵyp, baǵyp ósirdim. Qyzymdy qyzyńyzdaı kórińiz, sizge tapsyrdym – depti.
– Qudaǵı, qyzyńdy maǵan nesine tapsyrasyń? Jasym seksen altyda, – depti apa. Sasyp qalǵan qudaǵıy qyzaryp ketedi.
– Qyzyńdy kimge berdiń, soǵan tapsyr, – dep jurtty bir kúldiripti.
