رەسەيدىڭ ۇزدىك ۋنيۆەرسيتەتى اكادەميالىق ادالدىق ليگاسىنا مۇشە بولۋدى جوسپارلاۋدا

1630
Adyrna.kz Telegram

290 جىلدىق تاريحى بار، رەسەيلىك جەتەكشى جوعارى وقۋ ورىندارىنىڭ ءبىرى سانكت-پەتەربۋرگ مەملەكەتتىك ۋنيۆەرسيتەتى قازاقستاندىق م.س. نارىكباەۆ اتىنداعى KAZGUU ۋنيۆەرسيتەتىمەن ىسكەرلىك باينالىس ورناتىپ، اكادەميالىق ادالدىق ليگاسىنا مۇشە بولۋ ماقساتىمەن كەلدى.

كەزدەسۋ اياسىندا ۋنيۆەرسيتەتتىڭ ساپانى قامتاماسىز ەتۋ كەڭسەسى Apache Superset (دەرەكتەردى زەرتتەۋ جانە ۆيزۋالداۋعا ارنالعان باعدارلامالىق قامتاماسىز ەتۋ) نەگىزىندە قۇرىلعان KAZGUU Data Analytics اقپاراتتىق جۇيەسىمەن تانىستى.

- بۇگىن بىزگە اقپارات بەرۋدىڭ جاڭا ءتاسىلى مەن دەڭگەيى ۇسىنىلدى.

سونىمەن قاتار، بۇل اقپارات ۋنيۆەرسيتەتتىڭ كۇندەلىكتى قىزمەتىندە وتە ماڭىزدى، ارينە، مۇنداي وڭتايلاندىرىلعان مالىمەتتەرمەن جۇمىس ىستەۋ وڭايىراق، - اتاپ ءوتتى سانكت-پەتەربۋرگ مەملەكەتتىك ۋنيۆەرسيتەتىنىڭ ەلەكتروندىق ءبىلىم بەرۋ رەسۋرستارىن دامىتۋ ورتالىعىنىڭ ديرەكتورى ۆلاديمير ستاروستەنكو.

كەزدەسۋ ناتيجەسىندە فەدەرالدىق مەملەكەتتىك بيۋدجەتتىك جوعارى ءبىلىم بەرۋ مەكەمەسى «سانكت-پەتەربۋرگ مەملەكەتتىك ۋنيۆەرسيتەتى» مەن «اكادەميالىق ادالدىق ليگاسى» اراسىندا قۇجاتقا قول قويىلدى.

اتالعان قۇجات ءوزارا ءتيىمدى، ۇزاق مەرزىمدى ارىپتەستىكتى نىعايتۋعا باعىتتالعان.

«اكادەميالىق ادالدىق ليگاسى» جالپى جينالىسىنىڭ توراعاسى سەرگەي پەننىڭ ايتۋىنشا، ليگا قازاقستاندىق ۋنيۆەرسيتەتتەرمەن عانا شەكتەلمەي، كورشىلەس ەلدەردىڭ ۇزدىك وقۋ ورىندارىمەن مۇشەلەرىنىڭ قاتارىن كوبەيتۋدە. مىسالى، رەسەيلىك ارىپتەستەرىمەن قاتار وزبەكستاندىق جوعارى وقۋ ورىندارى دا ليگانىڭ قىزمەتىنە جوعارى باعا بەرىپ، مۇشەلىك ەتۋگە نيەتتى ەكەنىن بىلدىرگەن.

ەسكەرتۋ: قازاقستاننىڭ 11 ۇزدىك جوعارى وقۋ ورنى ليگانىڭ مۇشەلەرى بولىپ تابىلادى. ولار قازىرگى تاڭدا ءبىلىم جانە عىلىم مينيسترلىگىنىڭ تاپسىرىسىمەن «اتامەكەن» ۇكپ دايىنداعان جوو رەيتينگىسىندە العاشقى ورىنداردى يەلەنەدى. اتاپ ايتساق: قازاق-بريتان تەحنيكالىق ۋنيۆەرسيتەتى، الماتى مەنەدجمەنت ۋنيۆەرسيتەتى، سۇلەيمەن دەميرەل ۋنيۆەرسيتەتى، م.نارىكباەۆ اتىنداعى كازگيۋ ۋنيۆەرسيتەتى، س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى، قاراعاندى مەديتسينالىق ۋنيۆەرسيتەتى، حالىقارالىق بيزنەس ۋنيۆەرسيتەتى، حالىقارالىق اقپاراتتىق تەحنولوگيالار ۋنيۆەرسيتەتى، قر پرەزيدەنتىنىڭ جانىنداعى مەملەكەتتىك باسقارۋ اكادەمياسى، ق.ساتباەۆ اتىنداعى قازاق ۇلتتىق تەحنيكالىق ۋنيۆەريسيتەتى، م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى.

اكادەميالىق ادالدىق ليگاسىنىڭ ءباسپاسوز قىزمەتى

پىكىرلەر