بەرىك قانيەۆ قازاقستان فۋتبولىن فيفا رەيتينگىندە جوعارى پوزيتسياعا قالاي شىعارۋعا نيەتتى ەكەنىن ايتىپ بەردى.
فۋتبولدى دامىتۋ, سپورت ينفراقۇرىلىمىنا رەۆيزيا جۇرگىزۋ, كادرلاردى دايىنداۋ جۇيەسىن جەتىلدىرۋ جانە سىبايلاس جەمقورلىقتى جويۋ – قازاقستان فۋتبول فەدەراتسياسىنىڭ پرەزيدەنتتىگىنە ۇمىتكەر بەرىك قانيەۆ الماتىدا ءوزىنىڭ سايلاۋ الدىنداعى باعدارلاماسىن تانىستىردى, دەپ حابارلايدى Adyrna.kz
«جاس قىران» بالالار مەن جاسوسپىرىمدەر فۋتبول ليگاسى ۇيىمداستىرۋشىسىنىڭ ايتۋىنشا, ونىڭ مىندەتى – سپورتتىڭ وسى ءتۇرىن ەلىمىزدە تانىمال ەتۋ جانە دامىتا ءتۇسۋ.
«ءبىزدىڭ ماقساتىمىز – فۋتبولدى كوپشىلىككە تانىمال ەتۋ ارقىلى فيفا رەيتينگىندە جوعارى پوزيتسياعا قول جەتكىزۋ. ءبىز بۇقارالىق فۋتبولدىڭ, بالالار مەن جاسوسپىرىمدەر فۋتبولىنىڭ, فۋتبول ورتالىقتارىنىڭ, ۇلتتىق قۇرامالار ينستيتۋتىنىڭ, كاسىبي كلۋبتار مەن ليگالاردىڭ دۇرىس پيراميداسىن قۇرعىمىز كەلەدى», - دەدى بەرىك قانيەۆ.
قۇجات 11 تارماقتان تۇرادى جانە قازاقستانداعى قازىرگى فۋتبول ماسەلەلەرىن تولىق قامتيدى. بەرىك قانيەۆ بريفينگتە مالىمدەگەنىندەي, فۋتبولدى دامىتۋ – ونىڭ ۇيرەنشىكتى ءىسى جانە ونىڭ وسى سالادا جۇرگەنىنە 20 جىلدان استام ۋاقىت بولدى.
قفف پرەزيدەنتتىگىنە ۇمىتكەردىڭ پىكىرىنشە, بۇقارالىق فۋتبولدى دامىتۋداعى جاڭا سەرپىن سپورتتىڭ وسى تۇرىمەن بەلسەندى اينالىساتىن جاستاردىڭ ۇلەسىن ەكى ەسە ارتتىرۋعا سەپتىگىن تيگىزەدى. بۇل ءۇشىن بەرىك قانيەۆ فۋتبول ينفراقۇرىلىمىن «ادىمدىق قولجەتىمدىلىكتە» وركەندەتۋدى, سونىمەن قاتار اۋەسقويلار ليگاسىن – بالالار, مەكتەپتىك, ستۋدەنتتىك, ارداگەرلەر جانە كورپوراتيۆتىك ليگالاردى دامىتۋدى كوزدەپ وتىر. ول, سونداي-اق, ايەلدەر فۋتبولى مەن فۋتزالدى جەتىلدىرۋدى نيەت ەتۋدە. سونىمەن قاتار قفف پرەزيدەنتتىگىنە ۇمىتكەر بەرىك قانيەۆ «بىلعارى دوپ» بالالار كوماندالارىنىڭ رەسپۋبليكالىق ءتۋرنيرىن جانداندىرۋدى جوسپارلاپ وتىر.
بەرىك قانيەۆ باعدارلاماسىنداعى باسىمدىق – بالالار مەن جاسوسپىرىمدەر فۋتبولىن دامىتۋ, بۇل 5 جاستان 17 جاسقا دەيىنگى فۋتبولمەن جۇيەلى تۇردە اينالىساتىن بالالاردىڭ سانىن كەمىندە ەكى ەسە ارتتىرۋعا مۇمكىندىك بەرەدى. بەرىك قانيەۆتىڭ بجف دامىتۋ باعدارلاماسى اياسىندا مىناداي شارالار قاراستىرىلعان:
- ايماقتىق فەدەراتسيالار جانىنداعى قوسىمشا 17 فۋتبول ورتالىعىن اشۋ;
- اۋدان ورتالىقتارى مەن اۋىلداردا فۋتبول ينفراقۇرىلىمىن كەڭەيتۋ;
رەزەرۆتى دايىنداۋ جۇيەسىن جەتىلدىرۋ;
- بجف باسەكەلەستىك جۇيەسىن جۇيەلەۋ;
تالانتتاردى ىزدەۋ جۇيەسىن دامىتۋ (سكاۋتينگ);
- ۋەفا-مەن بىرلەسكەن قفف جانىنداعى جوعارى بىلىكتى فۋتبولشىلاردى دايىنداۋ اكادەمياسىن قۇرۋ.
- ءبىرىنشى كەزەڭدە (ۋەفا ساناتىنداعى) بالالار جاتتىقتىرۋشىلارىنىڭ سانىن ەكى ەسە ارتتىرۋ
بەرىك قانيەۆ فۋتبول ينفراقۇرىلىمىن دامىتۋداعى ساپالى سەرپىلىس تۋرالى ايتا كەلىپ, باعدارلامانىڭ وسى تارماعى اياسىندا ەلىمىزدىڭ سولتۇستىك وڭىرلەرىندە تولىق كولەمدەگى الاڭدارى بار 5 مانەجدىڭ, سونداي-اق جاڭا تولىق كولەمدەگى الاڭداردىڭ قۇرىلىسى جوسپارلانىپ وتىرعانىن اتاپ ءوتتى.
بۇدان بولەك, بەرىك قانيەۆتىڭ باعدارلاماسىندا جوعارعى وقۋ ورىندارىندا فۋتبول جاتتىقتىرۋشىلارىن جانە فۋتبول سالاسىنىڭ باسقا دا ماماندارىن دايىندايتىن كافەدرالار سانىن كوبەيتۋ قاراستىرىلعان. بۇل فۋتبول يندۋسترياسىنىڭ ماماندارىن دايىنداپ, ليتسەنزيا بەرۋگە مۇمكىندىك جاسايدى.
بەرىك قانيەۆ كاسىبي فۋتبولدى قالاي قايتا رەتكە كەلتىرۋگە نيەتتى ەكەنىن ايتتى. ونىڭ اياسىندا فۋتبول كلۋبتارىن مەملەكەتتىك قارجىلاندىرۋدان جەكە قارجىلاندىرۋعا كەزەڭ-كەزەڭىمەن كوشۋ, لەگيونەرلەردى (ويىنشىلار مەن مامانداردى) كەزەڭ-كەزەڭىمەن قىسقارتۋ جانە ولاردىڭ ساپاسىن ارتتىرۋ مىندەتىن العا قويا وتىرىپ, ولاردى قابىلداۋ ءليميتىن قايتا قاراۋ جۇزەگە اسىرىلادى. مەملەكەتتiك بيۋدجەت ەسەبiنەن ەڭبەكاقى تاعايىنداۋ, ۇستەماقىنى دەمەۋشiلەر ەسەبiنەن تولەۋ مەحانيزمiن قاراستىرۋ.
بەرىك قانيەۆ ءوزىنىڭ سايلاۋالدى باعدارلاماسىنا ەنگىزىلگەن فۋتبولدى دامىتۋعا مەملەكەتتىك قولداۋ كورسەتۋ شارالارىن اتاپ ءوتتى. ولاردىڭ ىشىندە:
سپورت عيماراتتارىن ۇستاۋعا ارنالعان كوممۋنالدىق تولەمدەردى سۋبسيديالاۋ;
سالىق ماسەلەلەرىن قاراستىرۋ – كتس, جەر, مۇلىك;
«قاراپايىم زاتتار ەكونوميكاسى» باعدارلاماسى ارقىلى ارزان نەسيەلەر;
اتالمىش شارالار سپورت زاڭناماسىنا ەنگىزىلەدى.
سونىمەن قاتار پرەزيدەنت قاسىم-جومارت توقاەۆتىڭ اۋىلداردا سپورت الاڭدارىن سالۋ جونىندەگى تاپسىرماسىن ورىنداۋ شەڭبەرىندە «قازاقستان حالقىنا» قورىنىڭ مۇمكىندىكتەرىن پايدالانۋ قاراسىرىلعان.
بەرىك قانيەۆ ۇسىنعان فۋتبولدى دامىتۋدىڭ 2030 جىلعا دەيىنگى باعدارلاماسىنىڭ جەكە تارماعى وتاندىق سپورتتاعى جەمقورلىقتى جويۋعا ارنالعان. ول ءۇشىن فۋتبولدىڭ قازىرگى جاعدايىنا: فۋتبولمەن اينالىساتىن بالالاردىڭ, جاتتىقتىرۋشىلاردىڭ, فۋتبولشىلاردىڭ, فۋتبول ورتالىقتارىنىڭ, سەكتسيالاردىڭ ناقتى سانىنا اۋديت جۇرگىزۋ جوسپارلانۋدا. ينفراقۇرىلىمعا تولىق تالداۋ, ماتەريالدىق-تەحنيكالىق بازاعا تۇگەندەۋ جۇرگىزىلەدى. جانە جۇرگىزىلگەن اۋديت بويىنشا ەسەپ بەرۋ جاريالانادى دەپ ۋادە ەتىلگەن.
سونىمەن قاتار بەرىك قانيەۆ كەلىسىلگەن ويىنداردىڭ الدىن الۋ تەتىكتەرىن ازىرلەپ, سوت كورپۋسىن ىنتالاندىرۋ جۇيەسىن جەتىلدىرۋدى ماقسات ەتىپ وتىر. تاجىريبەگە فۋتبول مەريتوكراتياسى ءپرينتسيپى ەنگىزىلەدى – ياعني, سپورتشىلاردى ءادىل ىرىكتەۋ قولعا الىنادى. فۋتبول ترانسفەرلەرىن جۇزەگە اسىرۋدا دەلدالدىق سحەمالار جويىلادى.
”ادىرنا” ۇلتتىق پورتالى
