بەلگىلى اقىن، ەلگە ايتمان دەگەن اتپەن بەلگىلى سۆەتقالي نۇرجان Qasqa Jol Youtube ارناسىنا بەرگەن سۇحباتىندا پرەزيدەنت قاسىم-جومارت توقاەۆتىڭ بولمىسىنا، شىققان تەگىنە قاتىستى ايرىقشا پىكىر ءبىلدىردى.
ول جۋرناليست اباي سەيفۋللاعا جالايىر رۋىنان شىققان ءبىر عالىم، شەنەۋنىك جىگىتتىڭ قاسىم-جومارت توقاەۆتى «حاريزماسى جوق، ۋاقىتشا ادام، پاتشا بولاتىن ادامنىڭ سيپاتى باسقا بولادى» دەگەن پىكىرىنە قالاي جاۋاپ قاتقانىن ايتىپ بەردى.
«2019 جىلى نازارباەۆ پرەزيدەنت قىلىپ ءوز قىزى داريعانى نەمەسە ماميندى نە ءماسىموۆتى قويعاندا نە قىلاتىن ەدىڭ؟! دىم دا قىلا المايسىڭ، بەس كۇن الەۋمەتتىك جەلىدە شاۋىلدەيسىڭ. ءتىپتى، بەس كۇنگە دە جەتكىزبەيدى، ءۇش كۇندە ءۇنىڭدى وشىرەدى. سوسىن قۇداي بىلەدى، تاعى قانشا جىل وتىراتىنىڭدى. ال وتىز جىل بويى حارام داريادا ءجۇزىپ ءجۇرىپ، ۇستىنە ءبىر حارام داق جۇقتىرماعان ادامدى اكەلىپ وتىرعان كىم؟ بۇل دۇنيەنىڭ وزگەرىسى ەمەس پە؟! مەن نەگە ونداي ادامنىڭ تىلەۋىن تىلەمەۋىم كەرەك؟! قۇدايدىڭ ءىسى عوي بۇل. «قىزىر عالايسسالام نازارىن سالماسا ەسەك بازارعا دا دەلدال بولا المايسىڭ» دەگەن ءسوز بار. بۇل – ءبىر. ونداي تازا ادامعا قۇدايدىڭ پەرىشتەلەرى، اۋليەلەر جاردەمگە كەلەدى. ونىڭ قاسىنا كەمەل ۇلدار مەن ساليح قۇلدار جينالادى. سول كەزدە كورەسىڭ سەن قازاقتىڭ سالتاناتىن. قازاقتى جەرگە تىعام، قۇرتام، ءتىلىن تەزەك قىلام، 30 جىل تابانىما سالىپ تاپتادىم، شىلعاۋ قىلدىم، ءوشىردىم دەپ جۇرگەندەردىڭ ەرتەڭ قازاقتىڭ قۇنىنىڭ، كەگىنىڭ الدىندا قالاي جاۋاپ بەرگەنىن كورەسىڭ دەدىم»،- دەپ اڭگىمەلەيدى اقىن.
سونىمەن بىرگە ول توقاەۆ شىققان جالايىر رۋىنىڭ تاريحتاعى ءرولىن دە ايتىپ وتكەن.
«جالايىر دەگەن كۇللى ءۇش ءجۇزدىڭ نوقتا اعاسى. شىڭعىس قاعان بابامىزدىڭ ساداعىن سارى ساعىمعا ىلدىرگىزىپ جۇرگەن جالايىرلار عوي. سوناۋ مىسىرعا دەيىن قانداي قىزمەت اتقارعاندارى بەلگىلى . جەمە-جەم، تالقىلى تۇستا، تاريحتىڭ ەڭ تار وتكەلىندە سول جالايىردىڭ ۇرپاعىن قازاققا باسشى قىلىپ اكەلىپ وتىر. مۇندا زاڭدىلىق بار ەمەس پە؟!»، - دەيدى سۆەتقالي نۇرجان.
س.نۇرجان پرەزيدەنتتىڭ العان ءبىلىمى، دارەجەسىنە قاتىستى دا ويىمەن ءبولىستى.
«بۇل كىسى 53 تىلدە ءدارىس بەرەتىن الەمدەگى جالعىز وقۋ ورنى مگيمو-دا 8 جىل وقىدى. ءبىزدى نەشە عاسىر تابانىنا سالىپ جانشىعان رەسەيدىڭ ىشكى-سىرتقى ءبىلىمىن جينادى. ودان كەيىن قىتايدا قىزمەت ەتتى. قىتاي يمپەرياسىنىڭ بىزگە قانداي قاۋىپ ەكەنىن بىلەمىز عوي. ول تۋرالى – قىتايدىڭ «جۇمساق كۇشى» تۋرالى ەڭبەك جازدى. ءسويتىپ ەۋروپاعا بارىپ دۇنيەجۇزىلىك ساياساتقا ارالاستى. ودان كەيىن قازاقستانعا الىپ كەلدى. قۇدايدىڭ بەرگەن ءپىتىر-يمانىنىڭ ارقاسىندا ءوزىن تازا ساقتادى. مۇنىڭ ءبارى قۇدايدىڭ زاڭدىلىعى. قازاقتا «بولار ەردىڭ قوسىن جەك» دەگەن ءسوز بار»، - دەپ پىكىر ءبىلدىردى اقىن سۇحباتىندا.
"ادىرنا" ۇلتتىق پورتالى
