Belgili aqyn, elge Aıtman degen atpen belgili Svetqalı Nurjan Qasqa Jol Youtube arnasyna bergen suhbatynda Prezıdent Qasym-Jomart Toqaevtyń bolmysyna, shyqqan tegine qatysty aıryqsha pikir bildirdi.
Ol jýrnalıst Abaı Seıfýllaǵa jalaıyr rýynan shyqqan bir ǵalym, sheneýnik jigittiń Qasym-Jomart Toqaevty «harızmasy joq, ýaqytsha adam, patsha bolatyn adamnyń sıpaty basqa bolady» degen pikirine qalaı jaýap qatqanyn aıtyp berdi.
«2019 jyly Nazarbaev Prezıdent qylyp óz qyzy Darıǵany nemese Mamındy ne Másimovty qoıǵanda ne qylatyn ediń?! Dym da qyla almaısyń, Bes kún áleýmettik jelide sháýildeısiń. Tipti, bes kúnge de jetkizbeıdi, úsh kúnde únińdi óshiredi. Sosyn Qudaı biledi, taǵy qansha jyl otyratynyńdy. Al otyz jyl boıy haram darııada júzip júrip, ústine bir haram daq juqtyrmaǵan adamdy ákelip otyrǵan kim? Bul dúnıeniń ózgerisi emes pe?! Men nege ondaı adamnyń tileýin tilemeýim kerek?! Qudaıdyń isi ǵoı bul. «Qyzyr Ǵalaıssalam nazaryn salmasa esek bazarǵa da deldal bola almaısyń» degen sóz bar. Bul – bir. Ondaı taza adamǵa Qudaıdyń perishteleri, áýlıeler járdemge keledi. Onyń qasyna kemel uldar men salıh quldar jınalady. Sol kezde kóresiń sen qazaqtyń saltanatyn. Qazaqty jerge tyǵam, qurtam, tilin tezek qylam, 30 jyl tabanyma salyp taptadym, shylǵaý qyldym, óshirdim dep júrgenderdiń erteń qazaqtyń qunynyń, keginiń aldynda qalaı jaýap bergenin kóresiń dedim»,- dep áńgimeleıdi aqyn.
Sonymen birge ol Toqaev shyqqan jalaıyr rýynyń tarıhtaǵy rólin de aıtyp ótken.
«Jalaıyr degen kúlli úsh júzdiń noqta aǵasy. Shyńǵys qaǵan babamyzdyń sadaǵyn sary saǵymǵa ildirgizip júrgen jalaıyrlar ǵoı. Sonaý Mysyrǵa deıin qandaı qyzmet atqarǵandary belgili . Jeme-jem, talqyly tusta, tarıhtyń eń tar ótkelinde sol jalaıyrdyń urpaǵyn qazaqqa basshy qylyp ákelip otyr. Munda zańdylyq bar emes pe?!», - deıdi Svetqalı Nurjan.
S.Nurjan Prezıdenttiń alǵan bilimi, dárejesine qatysty da oıymen bólisti.
«Bul kisi 53 tilde dáris beretin álemdegi jalǵyz oqý orny MGIMO-da 8 jyl oqydy. Bizdi neshe ǵasyr tabanyna salyp janshyǵan Reseıdiń ishki-syrtqy bilimin jınady. Odan keıin Qytaıda qyzmet etti. Qytaı ımperııasynyń bizge qandaı qaýip ekenin bilemiz ǵoı. Ol týraly – Qytaıdyń «jumsaq kúshi» týraly eńbek jazdy. Sóıtip Eýropaǵa baryp dúnıejúzilik saıasatqa aralasty. Odan keıin Qazaqstanǵa alyp keldi. Qudaıdyń bergen pitir-ımanynyń arqasynda ózin taza saqtady. Munyń bári Qudaıdyń zańdylyǵy. Qazaqta «bolar erdiń qosyn jek» degen sóz bar», - dep pikir bildirdi aqyn suhbatynda.
"Adyrna" ulttyq portaly
