Belgılı aqyn, elge Aitman degen atpen belgılı Svetqali Nūrjan Qasqa Jol Youtube arnasyna bergen sūhbatynda Prezident Qasym-Jomart Toqaevtyŋ bolmysyna, şyqqan tegıne qatysty airyqşa pıkır bıldırdı.
Ol jurnalist Abai Seifullaǧa jalaiyr ruynan şyqqan bır ǧalym, şeneunık jıgıttıŋ Qasym-Jomart Toqaevty «harizmasy joq, uaqytşa adam, patşa bolatyn adamnyŋ sipaty basqa bolady» degen pıkırıne qalai jauap qatqanyn aityp berdı.
«2019 jyly Nazarbaev Prezident qylyp öz qyzy Dariǧany nemese Mamindy ne Mäsımovty qoiǧanda ne qylatyn edıŋ?! Dym da qyla almaisyŋ, Bes kün äleumettık jelıde şäuıldeisıŋ. Tıptı, bes künge de jetkızbeidı, üş künde ünıŋdı öşıredı. Sosyn Qūdai bıledı, taǧy qanşa jyl otyratynyŋdy. Al otyz jyl boiy haram dariiada jüzıp jürıp, üstıne bır haram daq jūqtyrmaǧan adamdy äkelıp otyrǧan kım? Būl dünienıŋ özgerısı emes pe?! Men nege ondai adamnyŋ tıleuın tılemeuım kerek?! Qūdaidyŋ ısı ǧoi būl. «Qyzyr Ǧalaissalam nazaryn salmasa esek bazarǧa da deldal bola almaisyŋ» degen söz bar. Būl – bır. Ondai taza adamǧa Qūdaidyŋ perıştelerı, äulieler järdemge keledı. Onyŋ qasyna kemel ūldar men salih qūldar jinalady. Sol kezde köresıŋ sen qazaqtyŋ saltanatyn. Qazaqty jerge tyǧam, qūrtam, tılın tezek qylam, 30 jyl tabanyma salyp taptadym, şylǧau qyldym, öşırdım dep jürgenderdıŋ erteŋ qazaqtyŋ qūnynyŋ, kegınıŋ aldynda qalai jauap bergenın köresıŋ dedım»,- dep äŋgımeleidı aqyn.
Sonymen bırge ol Toqaev şyqqan jalaiyr ruynyŋ tarihtaǧy rölın de aityp ötken.
«Jalaiyr degen küllı üş jüzdıŋ noqta aǧasy. Şyŋǧys qaǧan babamyzdyŋ sadaǧyn sary saǧymǧa ıldırgızıp jürgen jalaiyrlar ǧoi. Sonau Mysyrǧa deiın qandai qyzmet atqarǧandary belgılı . Jeme-jem, talqyly tūsta, tarihtyŋ eŋ tar ötkelınde sol jalaiyrdyŋ ūrpaǧyn qazaqqa basşy qylyp äkelıp otyr. Mūnda zaŋdylyq bar emes pe?!», - deidı Svetqali Nūrjan.
https://www.youtube.com/watch?v=_aThjmF6iiU
S.Nūrjan Prezidenttıŋ alǧan bılımı, därejesıne qatysty da oiymen bölıstı.
«Būl kısı 53 tılde därıs beretın älemdegı jalǧyz oqu orny MGİMO-da 8 jyl oqydy. Bızdı neşe ǧasyr tabanyna salyp janşyǧan Reseidıŋ ışkı-syrtqy bılımın jinady. Odan keiın Qytaida qyzmet ettı. Qytai imperiiasynyŋ bızge qandai qauıp ekenın bılemız ǧoi. Ol turaly – Qytaidyŋ «jūmsaq küşı» turaly eŋbek jazdy. Söitıp Europaǧa baryp düniejüzılık saiasatqa aralasty. Odan keiın Qazaqstanǧa alyp keldı. Qūdaidyŋ bergen pıtır-imanynyŋ arqasynda özın taza saqtady. Mūnyŋ bärı Qūdaidyŋ zaŋdylyǧy. Qazaqta «bolar erdıŋ qosyn jek» degen söz bar», - dep pıkır bıldırdı aqyn sūhbatynda.
"Adyrna" ūlttyq portaly
