"تۇلعانىڭ كىم ەكەنىنە جانە لاۋازىمىنا قاراماڭدار": توقاەۆ ەليمانوۆقا قانداي تاپسىرما بەردى؟

11346
Adyrna.kz Telegram

قاسىم-جومارت توقاەۆ قارجىلىق مونيتورينگ اگەنتتىگىنىڭ توراعاسى جانات ەليمانوۆپەن كەزدەسۋدە زاڭسىز يەمدەلگەن اكتيۆتەردى، سونىڭ ىشىندە شەتەلدەن ىزدەۋگە باسا ءمان بەرۋ قاجەت ەكەنىن، سونداي-اق ولاردى قازاقستانعا قايتارۋ جۇمىستارىن جانداندىرۋ كەرەكتىگىن ايتتى، دەپ حابارلايدى "ادىرنا" ۇلتتىق پورتالى اقوردانىڭ رەسمي سايتىنا سىلتەمە جاساپ. 

ۆەدومستۆو كاپيتالدى زاڭسىز شىعارۋعا جول بەرمەۋ ماقساتىندا قارجى رەتتەۋشىلەرىمەن بىرلەسىپ، كۇماندى ترانسشەكارالىق اۋدارىمدارعا كۇشەيتىلگەن مونيتورينگ جاساۋ ءىسىن جولعا قويعان.

قاسىم-جومارت توقاەۆقا بيىل توقتاتىلعان كۇدىكتى وپەراتسيالاردىڭ سانى 3 ەسەدەن اسقانى جانە ولاردىڭ جالپى قۇنى 150 ملرد تەڭگەگە جۋىق ەكەنى باياندالدى. وسى دەرەكتەر بويىنشا تەكسەرۋ شارالارى جۇرگىزىلىپ جاتىر. اگەنتتىكتىڭ مالىمەتى بويىنشا شەتەلگە اقشا قاراجاتىن شىعارۋدىڭ كۇرت كوبەيگەنى بايقالمايدى. كەرىسىنشە بيىل شەتەلگە اۋدارىلعان قارجى 30 پايىزعا ازايعان.

جانات ەليمانوۆتىڭ ايتۋىنشا، مۇددەلى ورگاندارمەن بىرلەسىپ، قولما-قول ۆاليۋتانى زاڭسىز شىعارۋعا باقىلاۋ كۇشەيتىلگەن. جالپى سوماسى 5 ميلليون اقش دوللارىنا جۋىق زاڭ بۇزۋشىلىق انىقتالعان. سونىمەن قاتار قازاقستان-قىتاي شەكاراسىندا تەكسەرۋ جۇمىستارى جۇرگىزىلىپ جاتىر. ءۇش اپتانىڭ ىشىندە تاۋاردى زاڭسىز اكەلۋ فاكتىلەرى بويىنشا 8 قىلمىستىق جانە 24 اكىمشىلىك ءىس قوزعالدى.

كەزدەسۋ قورىتىندىسى بويىنشا مەملەكەت باسشىسى كولەڭكەلى ەكونوميكاعا قارسى كۇرەسۋ ءۇشىن اگەنتتىك توراعاسىنا ءتيىستى شارالار قابىلداۋ جونىندە تاپسىرما بەردى. پرەزيدەنت زاڭسىز يەمدەلگەن اكتيۆتەردى، سونىڭ ىشىندە شەتەلدەن ىزدەۋگە باسا ءمان بەرۋ قاجەت ەكەنىن، سونداي-اق ولاردى قازاقستانعا قايتارۋ جۇمىستارىن جانداندىرۋ كەرەكتىگىن ايتتى. بۇل جۇمىستاردىڭ ءبارى تۇلعانىڭ كىم ەكەنىنە جانە لاۋازىمىنا قاراماي جۇرگىزىلۋگە ءتيىس.

"ادىرنا" ۇلتتىق پورتالى

پىكىرلەر