Qasym-Jomart Toqaev Qarjylyq monıtorıng agenttiginiń tóraǵasy Janat Elımanovpen kezdesýde zańsyz ıemdelgen aktıvterdi, sonyń ishinde shetelden izdeýge basa mán berý qajet ekenin, sondaı-aq olardy Qazaqstanǵa qaıtarý jumystaryn jandandyrý kerektigin aıtty, dep habarlaıdy "Adyrna" ulttyq portaly Aqordanyń resmı saıtyna silteme jasap.
Vedomstvo kapıtaldy zańsyz shyǵarýǵa jol bermeý maqsatynda qarjy retteýshilerimen birlesip, kúmándi transshekaralyq aýdarymdarǵa kúsheıtilgen monıtorıng jasaý isin jolǵa qoıǵan.
Qasym-Jomart Toqaevqa bıyl toqtatylǵan kúdikti operaııalardyń sany 3 eseden asqany jáne olardyń jalpy quny 150 mlrd teńgege jýyq ekeni baıandaldy. Osy derekter boıynsha tekserý sharalary júrgizilip jatyr. Agenttiktiń málimeti boıynsha shetelge aqsha qarajatyn shyǵarýdyń kúrt kóbeıgeni baıqalmaıdy. Kerisinshe bıyl shetelge aýdarylǵan qarjy 30 paıyzǵa azaıǵan.
Janat Elımanovtyń aıtýynsha, múddeli organdarmen birlesip, qolma-qol valıýtany zańsyz shyǵarýǵa baqylaý kúsheıtilgen. Jalpy somasy 5 mıllıon AQSh dollaryna jýyq zań buzýshylyq anyqtalǵan. Sonymen qatar Qazaqstan-qytaı shekarasynda tekserý jumystary júrgizilip jatyr. Úsh aptanyń ishinde taýardy zańsyz ákelý faktileri boıynsha 8 qylmystyq jáne 24 ákimshilik is qozǵaldy.
Kezdesý qorytyndysy boıynsha Memleket basshysy kóleńkeli ekonomıkaǵa qarsy kúresý úshin Agenttik tóraǵasyna tıisti sharalar qabyldaý jóninde tapsyrma berdi. Prezıdent zańsyz ıemdelgen aktıvterdi, sonyń ishinde shetelden izdeýge basa mán berý qajet ekenin, sondaı-aq olardy Qazaqstanǵa qaıtarý jumystaryn jandandyrý kerektigin aıtty. Bul jumystardyń bári tulǵanyń kim ekenine jáne laýazymyna qaramaı júrgizilýge tıis.
"Adyrna" ulttyq portaly
