2021 جىلدىڭ 1 ماۋسىمىندا «قازاقپارات» حالىقارالىق اقپارات اگەنتتىگىندە "قاراعاندى پەرزەنتحاناسىندا سابيلەردى رەانيماتسيالاۋعا ارنالعان زاماناۋي اپپارات ورناتىلدى"دەگەن تاقىرىپتا، «ۇلىتاۋ» گازەتىندە “قاراعاندى پەريناتولوگيا ورتالىعىندا سابيلەردى رەانيماتسيالاۋعا ارنالعان زاماناۋي اپپارات ورناتىلدى" دەگەن تاقىرىپتا، 2021 جىلدىڭ 27 قىركۇيەگىندە “ەگەمەن قازاقستان” گازەتىندە ء“سابيدىڭ ءومىرىن ساقتاعاندار” تاقىرىبىمەن ماقالا جاريالانىپ، قاراعاندى وبلىسىنداعى بالا تۋ كورسەتكىشى بويىنشا بىرقاتار كۇماندى دەرەكتەر كەلتىرىلدى. ءبىز بۇل اقپاراتتىڭ راس-وتىرىگىن تەكسەرىپ كورەيىك.
«جىل سايىن قاراعاندى وبلىسىندا 19 مىڭ بالا دۇنيەگە كەلەدى، ونىڭ ىشىندە مەرزىمىنەن بۇرىن تۋاتىندار – شامامەن 7%».
«جىل سايىن قاراعاندى وبلىسىندا 19 مىڭ بالا دۇنيەگە كەلەدى»
ۇكىم: جالعان
ۇلتتىق ستاتيستيكا بيۋروسىنىڭ دەرەكتەرىنە ساي، قاراعاندى وبلىسىندا 2016 جىلى - 23 950, 2017 جىلى - 22 715, 2018 جىلى - 22 950, 2019 جىلى – 23 034, 2020 جىلى - 23 423, ال 2021 جىلعى قاڭتار-قىركۇيەكتە تۋعاندار سانى – 18 106 ادامدى قۇرادى. ياعني، اتالعان پايىزدىق كورسەتكىش ماقالاداعى ساندارمەن سايكەس كەلمەيدى.
«ونىڭ ىشىندە مەرزىمىنەن بۇرىن تۋاتىندار – شامامەن 7%».
ۇكىم: جالعان
ۇلتتىق ستاتيستيكا بيۋروسى مالىمەتىنشە، جالپىلاي ايتقاندا قازاقستاندا شالا تۋعاندار سانى 2016 جىلى - 5,5%، 2017 جىلى -5,5%، 2018 جىلى - 5,4%، 2019 جىلى – 5,5%، 2020 جىلى - 5,1%-دى قۇرادى. دەمەك، بۇل دا جالعان مالىمەت.
باق بەتتەرىندە جاريالانعان ماقالاعا جۇرگىزىلگەن فاكتچەك قورىتىندىسى بويىنشا، اقپاراتتا كەلتىرىلگەن فاكتىلەر شىندىققا جاناسپايدى. جىل سايىن قاراعاندى وبلىسىندا 19 مىڭ ەمەس، ورتاشا ەسەپپەن 23 مىڭ ءسابي دۇنيەگە كەلەدى جانە مەرزىمىنەن بۇرىن تۋاتىندار – شامامەن 5%-دى قۇرايدى.
زارينا اشىربەك،
"ادىرنا" ۇلتتىق پورتالى
