ەكىباستۇزدا جالدامالى پاتەرلەردىڭ بىرىنەن ءتورت ناۋقاس، اش بالا تابىلدى. بالالار اتا-انالارىمەن بىرگە انتيسانيتاريالىق جاعدايدا ءومىر ءسۇرىپ كەلگەن، سوڭعى ءۇش كۇن ءنار تاتپاعان. ۇيدەگى ۇلكەن بالا جەتى جاستا، قالعاندارى بەس، ءتورت جانە ۇشتە. بالالار جۇرە المايدى، ادامداردان قورقادى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەمە جاساپ.
ەرىكتىلەردىڭ ايتۋىنشا، وتباسىنىڭ جاعدايى تۋرالى ەكىباستۇز قالاسى اكىمدىگىنىڭ قىزمەتكەرلەرى حابارلاپ، قوعامنان كومەك سۇراعان.
"بۇعان دەيىن كورشىلەرى پوليتسياعا پاتەردە جانجال، شۋ بولىپ جاتىر دەپ حابارلاعان. قۇقىق قورعاۋشىلار پاتەرگە كەلگەندە ءبارى تىنىش بولدى، بىراق اتا-اناسىمەن بىرگە اش، جالاڭاش بالالار وتىرعان. ءبىزدىڭ توپقا كومەك تۋرالى حابار كەلگەندە تەز ارادا ازىق-تۇلىك، جورگەك، سابىن، تازارتقىش قۇرالدارعا اقشا جيناپ، قولدا بار زاتتاردى جيناپ، دەمەۋشى بەرگەن نارسەنى وتباسىعا اپاردىق", - دەيدى جەرگىلىكتى ەرىكتىلەر Instagram-دا.
كوپ بالالى وتباسىنىڭ جاعدايى ەرىكتىلەردىڭ زارەسىن ۇشىردى. "بالالار لاس پاتەردە تۇرعان، بارلىق جەردە ءناجىس، ءزاردىڭ ءيىسى، شىبىن. بالالار جالاڭاش، كىر-قوجالاق. ەشقايسى جۇرە المايدى. قىزدىڭ ءىشى ۇلكەيىپ كەتكەن، ۇلداردىڭ ءبىرى ەكى كۇننەن اسا قۇسىپ ءجۇر، ەكى ۇلكەن بالانىڭ اياعى قويىرىلىپ قالعان. ولار ءۇش كۇن ءنار تاتپاعانى بەلگىلى بولدى، ۇيدە تاماق جوق", - دەيدى ەرىكتى ليۋدميلا بىلينينا.
ەرىكتىلەر پوليتسەيلەرمەن بىرگە جەدەل جاردەم شاقىرىپ، بالالاردى اناسىمەن بىرگە شۇعىل تۇردە اۋرۋحاناعا جاتقىزدى.
"بالالار سىرتقا شىقپايدى، سەرۋەندەمەيدى، ادامداردان قورقادى، ماۋگلي سياقتى. اناسىنىڭ ايتۋىنشا، ولاردىڭ دەنساۋلىعى جىل سايىن ناشارلاي بەرگەن. ال شامامەن ءبىر جىل بۇرىن جۇرمەي قالعان", - دەيدى ەرىكتىلەر.
سونداي-اق، كامەلەتكە تولماعانداردىڭ بىردە-ءبىرى مەديتسينالىق مەكەمەگە تىركەلمەگەنى جانە دارىگەرلەرگە قارالماعانى انىقتالدى. وتباسى ەكىباستۇزعا ءۇش جىل بۇرىن اۋىلدان كوشىپ كەلگەن، جالدامالى پاتەردە اكەسىنىڭ كەزدەيسوق تابىسى مەن بالالاردىڭ 27 جاستاعى اناسى الاتىن جاردەماقىعا تۇرادى.
قازىر بالالار پاۆلودار وبلىستىق بالالار جۇقپالى اۋرۋلار اۋرۋحاناسىندا جاتىر.
"بالالاردا پنەۆمونيا ءورشىپ كەتكەن، جاعدايى ورتاشا اۋىر، بىرەۋىنەن كوۆيد راستالدى. سونداي-اق، ولاردان راحيت انىقتالدى. اتا-اناسى ولاردى نەگە ەمدەمەگەنى بەلگىسىز. كەشە ءبىز بالالارعا كيىم، ويىنشىقتار جيناپ، اۋرۋحاناعا جەتكىزدىك. ءبىز بالالاردى ءالى دە قۇتقارۋعا بولادى دەپ ۇمىتتەنەمىز، مۇگەدەك بولىپ قالماسا ەكەن", - دەيدى بىلينينا.
ونىڭ ايتۋىنشا، قازىر ەرلى-زايىپتىنى اتا-انا قۇقىعىنان شەكتەۋگە قۇجاتتار دايىندالىپ جاتىر.
ەكىباستۇز قالاسىنىڭ اكىمى ارداق قاڭتارباەۆ جاعدايعا تۇسىنىك بەردى.
ء"بىز ءوزىمىزدى تاڭعالىپ وتىرمىز، بارىپ كەلدىك، سۇمدىق. ولار ەشقايدا تىركەلمەگەن. ەندى سەبەبىن انىقتاپ جاتىرمىز، ءححى عاسىردا مۇنداي قالاي بولۋى مۇمكىن؟ وتباسىنا بارلىق كومەك كورسەتىلىپ جاتىر", - دەدى ول.
قالا باسشىسى قابىلدانعان شارالار تۋرالى تولىعىراق اقپاراتتى كەيىنىرەك حابارلاۋعا ۋادە بەردى.
"ادىرنا" ۇلتتىق پورتالى
