"قاسىرەتتى قاڭتار" وقيعاسىنان كەيىن سەمەي قالاسىندا 6-قاڭتار كۇنى جاندوس جوتاباەۆ، 10-قاڭتاردا ەلدوس قاليەۆ ۇستالعان. ەكەۋى دە پوليتسيانىڭ ۋاقىتشا ۇستاۋ مەكەمەسىنەن ءتىرى شىقپاعان. دەنەسىندە ۇرىپ-سوعۋ ءىزى قالعان قوس ازامات تا جۇمباق جاعدايدا كوز جۇمعان. بۇل تۋرالى اzattyq.org مالىمدەدى.
26 جاستاعى ەلدوس قاليەۆ 10 قاڭتاردا جولداستارىمەن بىرگە دوسىنىڭ اكە اتانىپ، نارەستەلى بولعانىن تويلاعان. تۇندە قاڭتار نارازىلىعىنا بايلانىستى ەنگىزىلگەن كومەندانت ساعاتى باستالعاننان كەيىن ەلدوس ۇيىنە قايتقان. ەلدوستىڭ ءىنىسى پوليتسيا بولىمشەسىنە بارعاندا ءىنىسىنىڭ كولىگىن كورگەن، الايدا ونى پوليتسيا بولىمشەسىنە كىرگىزبەگەن.
ارتىنشا پوليتسيا قىزمەتكەرلەرى شىعىپ، ء"ىنىڭىز قارسىلىق كورسەتىپ، قازا تاپتى" دەپ قىسقا قايىرعان. ايدوس ءىنىسى تۋرالى: "مۇرنى، قابىرعاسى، سول جاعى تولىق سىنعان، ومىرتقاسىنا ۇشكىر زات تىققان، بەلىنەن تومەن قاراي اياعىنىڭ ارتى تۇگەل كوگەرىپ، قانتالاپ كەتكەن، باسىندا دا ءدال سونداي جاراقاتتار بار", - دەيدى.
ەلدوستىڭ دەنەسىن كورگەن دوسى تالعات يسلاموۆ بىلاي دەيدى: "باسقاشا ايتا المايمىن: ونى ولتىرگەن. مەديتسينالىق ساراپتاما جاساتتىق، قابىرعاسى دەنەسىنە كىرىپ كەتكەن، ءبىر اياعى تۇگەل كوگەرگەن، باسى جارىلعان. بۇكىل دەنەسىندە تەپكىنىڭ ءىزى بار. تىرناقتارىنىڭ استىنا ينە جۇگىرتكەن. مۇندايدى ءبىرىنشى رەت كوردىم. شىمىر جىگىت ەمەس ەدى، سالماعى 60 كيلوگرامعا دا جەتپەيتىن. ادامدى وسىنشا ايۋاندىقپەن ءولتىرۋ دەگەن... ساراپتامادا "اسقازانى ورنىنان جىلجىپ كەتكەن" دەدى. ءار تىرناعىنا ينە تىققان. قانىپەزەر، ءتىپتى ءفاشيستىڭ ءوزى بۇلاي جاسامايدى عوي. حالىققا انت بەرگەن قۇقىق قورعاۋ ورگاندارى مۇندايعا قالاي باردى؟" – دەيدى.
سەمەيدىڭ تاعى ءبىر تۇرعىنى 36 جاستاعى جاندوس جوتاباەۆ 6-قاڭتاردا "ميتينگىگە قاتىسقانى ءۇشىن" ۇستالعان. 8 قاڭتاردا جاندوستى ۋاقىتشا تەرگەۋ يزولياتورىنا اۋىستىرعان. تەرگەۋ يزولياتورىنا تۋىستارىن، جاقىندارىن كىرگىزبەگەن. 17 قاڭتاردا ۋاقىتشا تەرگەۋ يزولياتورىنىڭ قىزمەتكەرلەرى جەدەل جاردەم شاقىرعان. مەديتسينا قىزمەتكەرلەرى جاندوس جوتاباەۆتىڭ ءولىمىن تىركەگەن.
"مۇردەسىن سۋرەتكە ءتۇسىرىپ الدىق، ءۇستى-باسى كوك الا قويداي. ساۋ جەرى جوق. دەنەسىن تىلگەن كەزدە پلەۆريت، ءبىر وكپەسىندە 750 ميلليليتر، ەكىنشىسىندە 251 ميلليليتر سۇيىق زات بار دەگەن قورىتىندى جازىپ بەردى. 11 قابىرعاسى سىنعان. بۇل قاعازدىڭ قايدا ەكەنىن بىلمەيمىن. سوڭعى قورىتىندى ءبىر ايدان كەيىن بەرىلەدى دەدى. بىراق وندا نە جازىلاتىنىن بىلمەيمىن، ءوزىڭىز دە ءتۇسىنىپ وتىرسىز عوي", – دەيدى مارقۇمنىڭ ءىنىسى ەردوس جوتاباەۆ.
اتالمىش قايعىلى ىستەرمەن ادام قۇقىقتارى جانە زاڭدىلىقتى ساقتاۋ جونىندەگى قازاقستاندىق بيۋرونىڭ قۇقىق قورعاۋشىسى ەرلان قاليەۆ اينالىسۋدا. 9 اقپاندا ول سەمەي قالالىق پروكۋراتۋراسى "ەلدوس قاليەۆ پەن جاندوس جوتاباەۆتىڭ ولىمىنە بايلانىستى سەمەي وڭىرلىك جەمقورلىققا قارسى كۇرەس قىزمەتى قىلمىستىق كودەكستىڭ 362-بابى 4-ءبولىمى ("بيلىگى مەن قىزمەت قۇزىرەتىن اسىرا پايدالانۋدان بولعان اۋىر سالدار") بويىنشا سوتقا دەيىنگى تەرگەۋ امالدارىن باستادى" دەپ مالىمدەگەنىن حابارلادى. بۇل باپ بويىنشا بەس جىلدان ون جىلعا دەيىن بوستاندىعىنان ايىرۋ جازاسى قاراستىرىلعان.
"ادىرنا" ۇلتتىق پورتالى
