ماڭعىستاۋ وبلىسىنىڭ اكىمى نۇرلان نوعاەۆ ءوڭىر تۇرعىندارىنا ۇندەۋ جاسادى، دەپ حابارلايدى "ادىرنا" ۇلتتىق پورتالى.
«قۇرمەتتى ماڭعىستاۋلىقتار! قاڭتار ايىنىڭ باسىندا قازاقستان تاپ بولعان وقيعالار ەلىمىزدىڭ تۇتاستىعى مەن تاۋەلسىزدىگىنە قاۋىپ توندىرگەن كۇردەلى كەزەڭ بولدى. ەلگە قاۋىپ تونگەن كەزدە مەملەكەت باسشىسى بارلىق جاۋاپكەرشىلىكتى ءوز موينىنا الىپ، بىرقاتار ناقتى شەشىم قابىلدادى. مەملەكەت باسشىسى جاڭا مىندەتتەر قويىپ، قازاقستاننىڭ دامۋ جولىنىڭ جاڭا كەزەڭىن ايقىندادى. ءبىزدىڭ ماقساتىمىز - بولاشاقتا وسىنداي جالپىۇلتتىق تراگەديالارعا جول بەرمەۋ. ال بۇل ءۇشىن «ءبىر جاعادان باس، ءبىر جەڭنەن قول» شىعارىپ، حالىق يگىلىگى ءۇشىن جۇمىلا جۇمىستانۋ اسا ماڭىزدى. ماڭعىستاۋ - تاريحي ونەركاسىپتىك ءوڭىر. ايماقتاعى وندىرىستىك كومپانيالاردىڭ قىزمەتى وبلىستىڭ دامۋىندا اسا ماڭىزدى ءرول اتقارادى»، - دەدى ءوڭىر باسشىسى ۇندەۋىندە.
ونىڭ اتاپ وتۋىنشە، بۇگىنگى تاڭدا وڭىردە بىرنەشە كاسىپورىن وكىلدەرى جۇمىس بەرۋشىلەردىڭ الدىنا ءتۇرلى سيپاتتاعى ماسەلەلەردى قويىپ وتىر. ونىڭ ىشىندە ەڭبەك اقىنىڭ وسۋىنە قاتىستى سۇراقتار دا كوتەرىلىپ وتىر. تالاپ قويۋشىلاردىڭ اراسىندا وبلىس تۇرعىندارىن اۋىز سۋمەن جانە ەلەكتر قۋاتىمەن قامتاماسىز ەتەتىن ماەك مەكەمەسىنىڭ وكىلدەرى دە بار.
«قازىر جۇمىسشى مەن جۇمىس بەرۋشىنىڭ اراسىندا ەڭبەك اربيتراجى باستالادى. وعان قالا اكىمى، ەنەرگەتيكا مينيسترلىگىنىڭ وكىلدەرى، ەڭبەك قاتىناستارى جونىندەگى ماماندار، قىزمەتكەرلەر، جۇمىس بەرۋشى جانە قوعام وكىلدەرى قاتىسادى. كوميسسيانىڭ مىندەتى - كاسىپورىنعا ءوزىنىڭ نەگىزگى قىزمەتىنە ورالۋعا مۇمكىندىك بەرەتىن وڭتايلى شەشىمدى تابۋ. قۇرمەتتى ماڭعىستاۋلىقتار! حالىق پەن ەلدىڭ يگىلىگى ءۇشىن بارشاڭىزدى سابىر ساقتاپ، تۇسىنىستىك تانىتۋعا شاقىرامىن. مەملەكەت باسشىسى رەفورمالار جوسپارىن جانە ولاردى ىسكە اسىرۋ جونىندەگى ناقتى شارالاردى ۇسىندى. ءبىز بۇل تاپسىرمالاردى كەزەڭ-كەزەڭمەن جۇزەگە اسىرۋدى باستاپ كەتتىك. بارلىق قيىندىقتىڭ ۋاقىتشا ەكەندىگى ماعان دا، سىزدەرگە دە بەلگىلى. سوندىقتان تۇراقتىلىقتى ساقتاپ، كونسترۋكتيۆتى ديالوگقا، ناقتى جانە سىندارلى وزگەرىستەرگە ۇلەس قوسۋعا شاقىرامىن. ءبىز بىرگەمىز»، - دەدى نۇرلان نوعاەۆ.
"ادىرنا" ۇلتتىق پورتالى
