Mańǵystaý oblysynyń ákimi Nurlan Noǵaev mańyzdy úndeý jasady

2057
Adyrna.kz Telegram

Mańǵystaý oblysynyń ákimi Nurlan Noǵaev óńir turǵyndaryna úndeý jasady, dep habarlaıdy "Adyrna" ulttyq portaly.

«Qurmetti mańǵystaýlyqtar! Qańtar aıynyń basynda Qazaqstan tap bolǵan oqıǵalar elimizdiń tutastyǵy men Táýelsizdigine qaýip tóndirgen kúrdeli kezeń boldy. Elge qaýip tóngen kezde Memleket basshysy barlyq jaýapkershilikti óz moınyna alyp, birqatar naqty sheshim qabyldady. Memleket basshysy jańa mindetter qoıyp, Qazaqstannyń damý jolynyń jańa kezeńin aıqyndady. Bizdiń maqsatymyz - bolashaqta osyndaı jalpyulttyq tragedııalarǵa jol bermeý. Al bul úshin «Bir jaǵadan bas, bir jeńnen qol» shyǵaryp, halyq ıgiligi úshin jumyla jumystaný asa mańyzdy. Mańǵystaý - tarıhı ónerkásiptik óńir. Aımaqtaǵy óndiristik kompanııalardyń qyzmeti oblystyń damýynda asa mańyzdy ról atqarady», - dedi óńir basshysy úndeýinde.

Onyń atap ótýinshe, búgingi tańda óńirde birneshe kásiporyn ókilderi jumys berýshilerdiń aldyna túrli sıpattaǵy máselelerdi qoıyp otyr. Onyń ishinde eńbek aqynyń ósýine qatysty suraqtar da kóterilip otyr. Talap qoıýshylardyń arasynda oblys turǵyndaryn aýyz sýmen jáne elektr qýatymen qamtamasyz etetin MAEK mekemesiniń ókilderi de bar.

«Qazir jumysshy men jumys berýshiniń arasynda eńbek arbıtrajy bastalady. Oǵan qala ákimi, Energetıka mınıstrliginiń ókilderi, eńbek qatynastary jónindegi mamandar, qyzmetkerler, jumys berýshi jáne qoǵam ókilderi qatysady. Komıssııanyń mindeti - kásiporynǵa óziniń negizgi qyzmetine oralýǵa múmkindik beretin ońtaıly sheshimdi tabý. Qurmetti mańǵystaýlyqtar! Halyq pen eldiń ıgiligi úshin barshańyzdy sabyr saqtap, túsinistik tanytýǵa shaqyramyn. Memleket basshysy reformalar josparyn jáne olardy iske asyrý jónindegi naqty sharalardy usyndy. Biz bul tapsyrmalardy kezeń-kezeńmen júzege asyrýdy bastap kettik. Barlyq qıyndyqtyń ýaqytsha ekendigi maǵan da, sizderge de belgili. Sondyqtan turaqtylyqty saqtap, konstrýktıvti dıalogqa, naqty jáne syndarly ózgeristerge úles qosýǵa shaqyramyn. Biz birgemiz», - dedi Nurlan Noǵaev.

"Adyrna" ulttyq portaly

Pikirler