پاۆلوداردا كۋتۋزوۆ كوشەسىنىڭ اتىن تاۋەلسىزدىك دەپ اۋىستىرۋ ماسەلەسى قوزعالىپ جاتىر. وسىعان وراي، ءساۋىردىڭ 27-ءى كۇنى ساعات 15:00-دە قالاداعى «شاڭىراق» مادەني-ساۋىق ورتالىعىندا جيىن وتپەك، دەپ حابارلايدى zhasalash.kz.
ء—بىز تۇرعىنداردىڭ اتىنان، ونىڭ ىشىندە قازاقستان حالقى اسسامبلەياسى ۇيىمىنان اشىق حات الدىق. وندا قازىرگى كۋتۋزوۆ كوشەسىن «تاۋەلسىزدىك» دەپ اۋىستىرۋ كەرەك دەگەن ۇسىنىس جازىلعان،- دەيدى پاۆلودار قالاسى مادەنيەت جانە تىلدەردى دامىتۋ ءبولىمى جەتەكشىسىنىڭ مىندەتىن اتقارۋشى مەيرام نۇعىمان.
ال كەرەكۋلىكتەردىڭ بۇل ۇسىنىسقا كوزقاراسى ءار ءتۇرلى.
— ەلدى-مەكەننىڭ، كوشەنىڭ اتاۋلارى ەل ءۇشىن، حالىق ءۇشىن، ۇرپاق ءۇشىن ماڭىزدى. كەز كەلگەن سانالى ادامنىڭ تۇرىپ جاتقان جەرىندەگى كوشە، اۋىل، قالا اتاۋىنىڭ سەبەبىن، تاريحىن بىلۋگە تالپىنۋ ارقىلى ەل تاريحىنا ۇڭىلەرى انىق. قازاق تاريحىندا ەشقانداي اتاۋ تەگىن بەرىلمەگەن. تاريحى بار، اڭىزى بار. ال ەندى قالامىزداعى كۋتۋزوۆ كوشەسىن وزگەرتەتىن ۋاقىت باياعىدا كەلگەن. ونى ءتىپتى تالقىلاپ تا كەرەك ەمەس. كەزىندە سول كوشەلەرگە ولاردىڭ اتاۋى بەرىلگەندە بىرەۋلەردەن رۇقسات سۇراپ، اقىلداستى ما ەكەن؟ كەڭەس وداعىنىڭ ءداۋىرى ءجۇرىپ تۇرعاندا قويا سالعان اتاۋلار. سوندىقتان ءوز قولىمىز ءوز اۋزىمىزعا جەتكەندە قالانىڭ ءدال ورتاسىنداعى الىپ داڭعىل بولۋعا لايىق كوشەگە قازاقي اتاۋ بەرۋ ۇرپاق الدىنداعى بورىشىمىز،-دەيدى پاۆلودار قالاسىنىڭ تۇرعىنى ارمان حاسەنوۆ.
پاۆلودارعا تاۋەلسىزدىك كەلە مە؟
—قاجەت ەمەس. كۋتۋزوۆ دەگەن اتاۋعا ابدەن ۇيرەنىپ الدىق. بۇعان قوسا، بۇل قالاداعى ەڭ ۇزىن كوشە. قانشاما ءۇيدىڭ ءنومىرى جازىلعان تاقتايشاسىمەن قوسا، ءۇي قۇجاتتارىن دا اۋىستىرۋ كەرەك. بۇل قانشاما شىعىن عوي، بۇل قاراپايىم جۇرتتى تاعى ابىگەرگە سالادى -دەيدى پاۆلودار قالاسىنىڭ تۇرعىنى جۇلدىز قۋانىشەۆا.
—مەن بۇل كوشە اتاۋىنىڭ تاۋەلسىزدىك دەپ وزگەرۋىن قولدايمىن. بۇل بەيتاراپ ماعىنا. بۇعان قوسا، «تاۋەلسىزدىك» دەگەن جاقسى ەستىلەتىن سياقتى. كۋتۋزوۆ دەگەن دە جاقسى، بىراق تاۋەلسىز قازاقستاننىڭ ءوز تاريحى بار عوي. سوندىقتان بۇل دۇرىس شەشىم دەپ ويلايمىن، -دەيدى جەرگىلىكتى اقپارات اگەنتتىگىنىڭ ءتىلشى مارگاريتا چۋداكوۆا.
— مەن بۇل ۇسىنىستى تولىعىمەن قۇپتايمىن. ءوز كەزىندە بۇل ەسكى كوشە اتاۋلارى بىرنەشە رەت وزگەرگەن. قازىر دا وزگەرتەتىن كەز كەلدى. ماسەلەن، لەنين كوشەسى 150 جىل ىشىندە ءتورت رەت اۋىستىرىلعان ەكەن. بىلۋىمشە، قازىر لەنيننىڭ اتى بەرىلگەن كوشەلەر كورشى رەسەيدە دە قالماعان. سوندىقتان، ەگەمەن ەلىمىزدىڭ ەسكى، جاڭا كوشەلەرىنىڭ ءبارى جاڭالانۋى ءتيىس دەپ ويلايمىن، -دەيدى وڭىرلىك تەلەارنانىڭ جۇرگىزۋشىسى ءمولدىر قازىمبەت.
دەگەنمەن، كوشە اتاۋىنىڭ وزگەرەر، وزگەرمەسى كوپشىلىك تىڭدالىمىنا كەلگەن ازاماتتاردىڭ پىكىرىنە تىكەلەي بايلانىستى بولماق. ەگەر مۇنى ماقۇلداعانداردىڭ قاتارى قارسى تاراپتان كوپ بولسا، بۇل سۇراق قالالىق ءماسليحاتتىڭ سەسسياسىنا جولدانادى. كەيىن شىققان شەشىم رەسپۋبليكالىق ونوماتيكالىق كوميسسيانىڭ قاراۋىنا جىبەرىلۋى ءتيىس. جىل باسىندا پاۆلوداردا لەنين كوشەسى «استاناعا» اۋىسقانىن ايتا كەتەيىك.
ايگەرىم جەتپىسوۆا،
پاۆلودار
سۋرەتتەر اۆتوردىكى
