Pavlodarda Kýtýzov kóshesiniń atyn Táýelsizdik dep aýystyrý máselesi qozǵalyp jatyr. Osyǵan oraı, sáýirdiń 27-i kúni saǵat 15:00-de qaladaǵy «Shańyraq» mádenı-saýyq ortalyǵynda jıyn ótpek, dep habarlaıdy zhasalash.kz.
—Biz turǵyndardyń atynan, onyń ishinde Qazaqstan halqy assambleıasy uıymynan ashyq hat aldyq. Onda qazirgi Kýtýzov kóshesin «Táýelsizdik» dep aýystyrý kerek degen usynys jazylǵan,- deıdi Pavlodar qalasy mádenıet jáne tilderdi damytý bólimi jetekshisiniń mindetin atqarýshy Meıram NUǴYMAN.
Al kerekýlikterdiń bul usynysqa kózqarasy ár túrli.
— Eldi-mekenniń, kósheniń ataýlary el úshin, halyq úshin, urpaq úshin mańyzdy. Kez kelgen sanaly adamnyń turyp jatqan jerindegi kóshe, aýyl, qala ataýynyń sebebin, tarıhyn bilýge talpyný arqyly el tarıhyna úńileri anyq. Qazaq tarıhynda eshqandaı ataý tegin berilmegen. Tarıhy bar, ańyzy bar. Al endi qalamyzdaǵy Kýtýzov kóshesin ózgertetin ýaqyt baıaǵyda kelgen. Ony tipti talqylap ta kerek emes. Kezinde sol kóshelerge olardyń ataýy berilgende bireýlerden ruqsat surap, aqyldasty ma eken? Keńes Odaǵynyń dáýiri júrip turǵanda qoıa salǵan ataýlar. Sondyqtan óz qolymyz óz aýzymyzǵa jetkende qalanyń dál ortasyndaǵy alyp dańǵyl bolýǵa laıyq kóshege qazaqı ataý berý urpaq aldyndaǵy boryshymyz,-deıdi Pavlodar qalasynyń turǵyny Arman HASENOV.
Pavlodarǵa Táýelsizdik kele me?
—Qajet emes. Kýtýzov degen ataýǵa ábden úırenip aldyq. Buǵan qosa, bul qaladaǵy eń uzyn kóshe. Qanshama úıdiń nómiri jazylǵan taqtaıshasymen qosa, úı qujattaryn da aýystyrý kerek. Bul qanshama shyǵyn ǵoı, bul qarapaıym jurtty taǵy ábigerge salady -deıdi Pavlodar qalasynyń turǵyny Juldyz QÝANYShEVA.
—Men bul kóshe ataýynyń Táýelsizdik dep ózgerýin qoldaımyn. Bul beıtarap maǵyna. Buǵan qosa, «Táýelsizdik» degen jaqsy estiletin sııaqty. Kýtýzov degen de jaqsy, biraq Táýelsiz Qazaqstannyń óz tarıhy bar ǵoı. Sondyqtan bul durys sheshim dep oılaımyn, -deıdi jergilikti aqparat agenttiginiń tilshi Margarıta ChÝDAKOVA.
— Men bul usynysty tolyǵymen quptaımyn. Óz kezinde bul eski kóshe ataýlary birneshe ret ózgergen. Qazir da ózgertetin kez keldi. Máselen, Lenın kóshesi 150 jyl ishinde tórt ret aýystyrylǵan eken. Bilýimshe, qazir Lenınniń aty berilgen kósheler kórshi Reseıde de qalmaǵan. Sondyqtan, egemen elimizdiń eski, jańa kósheleriniń bári jańalanýy tıis dep oılaımyn, -deıdi óńirlik telearnanyń júrgizýshisi Móldir QAZYMBET.
Degenmen, kóshe ataýynyń ózgerer, ózgermesi kópshilik tyńdalymyna kelgen azamattardyń pikirine tikeleı baılanysty bolmaq. Eger muny maquldaǵandardyń qatary qarsy taraptan kóp bolsa, bul suraq qalalyq máslıhattyń sessııasyna joldanady. Keıin shyqqan sheshim respýblıkalyq onomatıkalyq komıssııanyń qaraýyna jiberilýi tıis. Jyl basynda Pavlodarda Lenın kóshesi «Astanaǵa» aýysqanyn aıta keteıik.
Áıgerim Jetpisova,
Pavlodar
Sýretter avtordiki
