ءماجىلىس دەپۋتاتى امانجان جامالوۆ زەينەتاقىلار مەن تولەمدەردى ينفلياتسيادان جوعارى يندەكستەۋ، سونداي-اق تابىسى تومەن وتباسىلار ءۇشىن ازىق-تۇلىك كارتاسىن ەنگىزۋ قاجەت ەكەنى تۋرالى مالىمدەدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"رەسمي ستاتيستيكا بويىنشا بىلتىر ينفلياتسيا 8,4 پايىز بولدى. ناقتى ينفلياتسيا الدەقايدا جوعارى. الدانۋدىڭ قاجەتى جوق. كوممۋنالدىق قىزمەت ءۇشىن تولەمدەر قازاقستاندىقتاردىڭ بۇرىنعى داۋىرگە ورالۋعا دەگەن ىقىلاسىن تۋدىرۋدا. ەگەر ءسىز دۇكەندەردەگى باعالاردى قاراساڭىز، قاراقۇمىق جارماسىن قاراقۇمىق ۋىلدىرىعى، ال تاۋىق جۇمىرتقالارىن فابەرجە جۇمىرتقالارى دەپ اتاۋلارىن اۋىستىرۋدىڭ ۋاقىتى كەلگەن سياقتى. ۇلتتىق بانكتىڭ ساۋالناماسى بويىنشا حالىقتىڭ 58 پايىزى باعا 16-20 جانە ودان دا كوپ پايىزعا ءوستى دەپ ەسەپتەيدى", - دەدى جامالوۆ قر پرەمەر-ءمينيسترىنىڭ اتىنا جولداعان دەپۋتاتتىق ساۋالدا.
ول ۇكىمەت 180 كۇن مەرزىمگە سۇيىتىلعان گازدىڭ، بەنزيننىڭ جانە ديزەلدىڭ باعالارىن رەتتەۋدى، الەۋمەتتىك ماڭىزى بار ازىق-تۇلىك تاۋارلارى بويىنشا باعانى رەتتەۋدى، 180 كۇن مەرزىمگە كوممۋنالدىق تاريفتەردى كوتەرۋگە موراتوري ەنگىزگەنىن ەسكە سالدى.
"بۇگىندە الەمدە ينفلياتسياعا ازىق-تۇلىك تاۋارلارى نەگىزگى ۇلەس قوسادى. قازاقستان الداعى ۋاقىتتا دا قىمباتتايتىن ازىق-تۇلىك ونىمدەرىنىڭ يمپورتىنا ءالى دە تاۋەلدى. قازاقستانداعى ازىق-تۇلىك تاۋارلارىنىڭ يمپورتى 3 ميلليارد اقش دوللارىنان اسادى. بۇل ينفلياتسيانىڭ تاپ سول كولەمدەگى ءسوزسىز يمپورتىن بىلدىرەدى.
بۇل ماسەلەنى تۇبەگەيلى شەشۋ ءۇشىن ءبىز وسى تاۋارلاردى قازاقستاندا ءوندىرۋدى جانە شىعارۋدى جولعا قويۋىمىز قاجەت. بىراق قازىردىڭ وزىندە حالىقتى باعانىڭ وسۋىنەن قورعاۋ بويىنشا شۇعىل شارالار قاجەت", - دەپ ەسەپتەيدى دەپۋتات.
قازاقستانداعى ينفلياتسيانىڭ ءوسۋ ماسەلەسىن شەشۋدىڭ ءبىرىنشى پۋنكتى رەتىندە امانجان جامالوۆ زەينەتاقىلار مەن الەۋمەتتىك تولەمدەردى ينفلياتسيادان جوعارى دەڭگەيگە يندەكستەۋدى ۇسىندى.
"مۇنداي يندەكستەۋ ەڭ تومەنگى كۇنكورىس دەڭگەيىنىڭ ارتۋى ارقىلى مۇمكىن. بۇل الەۋمەتتىك وسال ساناتتار ءۇشىن نەگىزگى تاۋارلار مەن قىزمەتتەردىڭ قىمباتتاۋىنىڭ ورنىن تولتىرۋعا مۇمكىندىك بەرەدى. ياعني، بازالىق زەينەتاقىلار، مۇگەدەكتەرگە، اسىراۋشىسىنان ايىرىلعان وتباسىلارعا ارنالعان جاردەماقىلار، مۇگەدەك بالالاردى تاربيەلەۋشىلەرگە ارنالعان جاردەماقىلار مولشەرى، اتاۋلى كومەكتىڭ كولەمى ۇلعايادى. جالپى، بۇل ءۇش ميلليون قازاقستاندىققا قاتىستى بولادى. ەڭ تومەنگى كۇنكورىس دەڭگەيىنىڭ مولشەرىن 20 پايىزعا، ياعني 43 221 تەڭگەگە دەيىن ارتتىرۋ ءۇشىن شامامەن 600 ميلليارد تەڭگە قاجەت بولادى. بۇل قاراجاتتى ديۆيدەندتەردى ۇلعايتۋ جانە كۆازيمەملەكەتتىك سەكتورعا ارنالعان شىعىستاردى وڭتايلاندىرۋ ەسەبىنەن، جەكەشەلەندىرۋدەن جانە باسقا دا بيۋدجەتتىك تۇسىمدەردەن تۇسەتىن قاراجات ەسەبىنەن ىزدەستىرۋگە بولادى", - دەيدى پارلامەنت مۇشەسى.
ونىڭ ايتۋىنشا، ءبىرىنشى كەزەكتە تابىسى تومەن وتباسىلارعا ازىق-تۇلىك كارتالارىن ەنگىزۋدى قاراستىرۋ قاجەت.
"ستاتيستيكاعا سايكەس، تابىسى وتباسىنىڭ ءار مۇشەسىنە 25 مىڭ تەڭگەدەن تومەن وتباسىلار از قامتىلعان وتباسىلارعا جاتادى. حالىقتىڭ مۇنداي ساناتى ءۇشىن ۋاقىتشا، ەكونوميكا تۇراقتانعانعا دەيىن قازاقستاندىق ازىق-تۇلىك ونىمدەرىن ساتىپ الۋعا بولاتىن تەگىن ازىق-تۇلىك كارتالارىن ەنگىزۋدى قاراستىرۋ قاجەت. ولاردى ەنگىزۋدى تسيفرلىق الەۋمەتتىك ءامياندى ەنگىزۋگە بايلانىستىرۋ قاجەت", - دەدى جامالوۆ.
سونىمەن قاتار، ول كوپتەگەن ادامدار ازىق-تۇلىك كارتالارىن سىنعا الىپ، ونى "كسرو-عا ورالۋ" دەيتىنىن ايتتى.
"بىراق ازىق-تۇلىك كارتالارى كوپتەگەن ەلدەردە، سونىڭ ىشىندە اقش-تا الەۋمەتتىك قولداۋدىڭ ماڭىزدى قۇرالى سانالادى. رەسەيدە حالىقتىڭ كەدەي توپتارى ءۇشىن ازىق-تۇلىك تالوندارىن ەنگىزۋ پىسىقتالىپ جاتىر", - دەپ تۇيىندەدى دەپۋتات.
“ادىرنا” ۇلتتىق پورتالى
