ەلوردالىق انا قىزىنا قورلىق كورسەتكەن فەلدشەردىڭ ۇستىنەن قۇزىرلى ورگاندارعا ارىز جازعان. سودان بەرى 5 اي وتكەنىمەن، ءىس ورنىنان قوزعالمادى دەيدى، دەپ حابارلايدى “ادىرنا” ۇلتتىق پورتالى “استانا” ارناسىنا سىلتەمە جاساپ.
ەلوردالىق انا قىزىنا قورلىق كورسەتكەر فەلدشەردىڭ ۇستىنەن قۇزىرلى ورگاندارعا ارىز جازعان. سودان بەرى 5 اي وتكەنىمەن، ءىس ورنىنان قوزعالمادى دەيدى.
ەلوردالىق انا ءوزىن دە، ناۋقاس قىزىن دا كورسەتكىسى كەلمەدى. جاعا ۇستاتارلىق جايتى جايىپ سالدى. ايتۋىنشا، جارىمجان بالاسىنا قالا ەمحاناسىنىڭ فەلدشەرى زورلىق كورسەتكەن. ماماندى سۋىق ءتيىپ اۋىرىپ قالعان سوڭ وزدەرى، ۇيگە شاقىرتقان ەكەن.
“ۇيگە ەمدەۋ-7 ەمحاناسىنان كەشكى ۋاقىتتا، جۇمىس ۋاقىتىنان تىس فەلدشەر كەلدى. كەلىپ قىزىڭىزدى الىپ كەتەمىز، كت تۇسىرەمىز دەدى. ماعان بارماي-اق قويىڭىز دەدى. سوسىن ەمحاناعا اپارىپ، ونى زورلاعان. الدىمەن كوزىن بايلاپ، گينەكولوگيالىق كرەسلوعا وتىرعىزعان. سودان سوڭ ءوزىنىڭ ارام ويىن اسىرعان”، – دەيدى قىزدىڭ اناسى.
اناسىنىڭ سوزىنە سەنسەك، قىزى 2-ءشى توپتاعى مۇگەدەك، اقىل-ەسى 10-15 جىلعا كەش داميتىن كورىنەدى. ايتقانىڭنان شىقپايتىن، تۇيىق مىنەزدى دەپ وتىر. جابىرلەنۋشى دە وقيعا تۋرالى ايتىپ بەردى.
“ول مەنى اپاردى. اكەلەرىڭ سەندەرمەن تۇرادى ما دەپ سۇرادى،بۇرىن سوڭدى قارىم-قاتىناستا ءتۇستىڭ با دەدى. سودان سوڭ سەزىنىپ تۇرسىڭ با دەپ سۇراي بەردى. ماعان بۇل قۇپيا ەشكىمگە ايتۋعا بولمايدى دەدى”، – دەيدى زارداپ شەگۋشى.
وتباسى ونىڭ ءالى كۇنگە جۇمىستا جۇرگەنىن ايتادى. ەمحانا دارىگەردىڭ جۇمىستا ەكەنىن راستادى.
“اتالمىش جاعدايعا قاتىستى نۇر-سۇلتان قالاسىنىڭ دەنساۋلىق ساقتاۋ باسقارماسى مەن ەمحانا اكىمشىلىگى حاباردار. بۇل جاعداي بويىنشا تەرگەۋ جۇمىستارى جۇرگىزىلىپ جاتىر، بۇل ءىستىڭ ناتيجەلەرى تەرگەۋ جۇمىستارى بىتكەن سوڭ جاريا ەتىلەدى. پوليتسيا دەپارتامەنتى تەرگەۋ ءالى دە جالعاسىپ جاتقانىن حابارلادى. تەرگەۋدىڭ ۇزاققا سوزىلۋىنىڭ سەبەبى ساراپتامالاردىڭ كوپ بولۋىنان دەپ ءتۇسىندىردى”، – دەيدى قالالىق دەنساۋلىق ساقتاۋ باسقارماسىنىڭ ءباسپاسوز قىزمەتى.
الداعى ۋاقىتتا شەشىم شىعارىلاتىن بولادى دەيدى زاڭ ورگاندارى.
“ادىرنا” ۇلتتىق پورتالى
