شاريعاتىمىزداعى جەرلەنگەن ادامنىڭ قابىرىن اشۋدىڭ ۇكىمى قانداي؟ بۇل سۇراققا سانسىزباي قۇربانۇلى جاۋاپ بەردى، دەپ حابارلايدى "ادىرنا" ۇلتتىق پورتالى.
مuftiat.kz سايتىندا جاريالانعان ۆيدەودا سانسىزباي قۇربانۇلى ءمايىتتى ءماجبۇر بولعان ءۇش جاعدايدا عانا اشۋعا بولاتىنىن باسا ايتتى.
«اقيقاتتا ءبىز ادام بالاسىن ارداقتادىق. ادام بالاسىن اللا تاعالا ارداقتى قىپ جاراتتى. ول ءتىرى بولا ما، بۇل دۇنيەدەن وتە مە ءبارىبىر، ول ابىرويلى بولادى. پايعامبارىمىز قايتىس بولعان ادامنىڭ، ياعني ءمايىتتىڭ سۇيەگىن سىندىرۋ ءتىرى ادامنىڭ سۇيەگىن سىندىرعانمەن بىردەي دەيدى»، دەدى قۇربانۇلى.
«قابىردى قايتا اشۋ ۇكىمىنە كەلەر بولساق، شاريعاتىمىزدا ونى بوستان بوسقا اشۋ حارام بوپ سانالادى. قابىر تەك قانا مۇقتاج جاعدايدا عانا اشىلادى.
مىسالى جەرلەنگەن ادامنىڭ ءمايىت جاتقان جەرىن سۋ باسسا، بىرەۋدىڭ مەنشىگىندەگى جەردە جەرلەنسە، نەمەسە قىلمىستىق جاعدايدى انىقتاۋ بارىسىندا ءمايىتتى اشۋ ارقىلى عانا انىقتالاتىن جاعدايدا عانا رۇقسات ەتىلەدى»، دەپ ءتۇسىندىردى ول.
«ادىرنا» ۇلتتىق پورتالى
