قازىر الماتى اكىمدىگىنىڭ سىرتىن جاۋىپ قويدى. جوندەۋ جۇمىستارى ءجۇرىپ جاتقان سياقتى. قاتەلەسپەسەم اكىمدىك عيماراتىنىڭ وزىنە كەلگەن شىعىن كولەمى 21 ملرد تەڭگە سياقتى. ناقتى ەسىمدە جوق. ەندى قۇرىلىس جۇمىستارى قارقىندى بولادى، كۇيگەنىن قىرادى، جارامايتىنىن اۋىستىرادى دەگەندەي.
بىراق قاراپ تۇرسام ء(وزىمنىڭ تازا شالا-شيكى ويىم عوي), اكىمدىكتى تۋرا سول جەرگە قايتا سالۋدىڭ كەرەگى جوق سياقتى. بىرىنشىدەن 1986 جىلى دا، 2022 جىلى دا ءبىراز جاستىڭ قانى توگىلگەن الاڭ جاتىر. اۋراسى وتە اۋىر. بۇرىن دا اكىمدىك ىشىنە كىرگەندە سۇپ-سۇر بولىپ تۇراتىن، ەندى ءتىپتى اۋىر اۋرا بولاتىن سياقتى.
ەكىنشىدەن اكىمدىكتى باسقا ءبىر اۋدانعا قويىپ تاستاسا، مىسالى الاتاۋ اۋدانىنىڭ ءبىر شەتىنە، "شاڭىراق" دەگەن سىندى جاققا نەمەسە ناۋرىزباي اۋدانىنىڭ ءبىر شەتىنە دەگەندەي. اۋىلدان قالاعا كەلگەن جاستاردىڭ جانە ۋربانيزاتسيانىڭ ەڭ ءىرى ءجۇرىپ جاتقان وشاقتارى سول جاقتار. ونى يا قالالىق اكىمدىك ناقتى بىلمەيدى (بىلسە دە ءوز كوزىمەن دۇرىس كورمەيدى), يا اۋداندىق اكىمدىكتەر ناقتى جەتكىزبەيدى. ەگەر سول اۋدانداردىڭ بىرىندە قالالىق اكىمدىك تۇرسا، ءبىراز وزگەرىس بولادى. بازاردا ۋاقىتشا جۇمىس ىستەيتىن، كۇزەتشى بولىپ جۇرگەن، اربا سۇيرەتىپ، جاقسى ومىردەن ءۇمىت ۇزگەن، باسپاناسىز پاتەر جالدايتىن، جۇمىسسىز جۇرەتىن جاستاردىڭ ورتاسىنا تۇسكەن ساتتە عانا ماسەلەلەر اقىرىنداپ شەشىلە باستايدى. قالانىڭ قاق ورتاسىندا وتىرىپ، ەليتالىق اۋداندا تۇرعان عيماراتتان ءسوز سويلەۋگە قاراعاندا دامۋى باياۋ اۋداندا "حالىقتىڭ ماسەلەسىن شەشەمىز" دەپ ءسوز سويلەپ تۇرۋ حالىققا وتىمدىرەك (مۇمكىن قاتەلەسەرمىن). جول، اۋىز سۋ، جارىقتاندىرۋ جانە باسقا دا ماسەلەلەر شەشىلە باستايدى ما دەگەن وي عوي.
مىسالى ەۋروپادا (جالپى دامىعان ەلدەردە), ارتتا قالعان اۋدان-اۋىل-قالاعا ءبىر ماڭىزدى عيماراتتى قويادى. ول نە ۋنيۆەرسيتەت (قاسكەلەڭدە سدۋ تۇرعان سياقتى), نە اكىمدىك، نە باسقا بىردەڭە بولۋى مۇمكىن. سول عيمارات سول اۋداننىڭ دامىتۋشى درايۆەرىنە اينالادى. اقىرىنداپ وركەنيەت، مادەنيەت، ماتەريالدىق يگىلىكتەر كەلە باستايدى. نەگىزى 21 ملردقا سۋ جاڭا عيمارات تا سالۋعا بولادى عوي...
"ادىرنا" ۇلتتىق پورتالى.
