Qazir Almaty ákimdiginiń syrtyn jaýyp qoıdy. Jóndeý jumystary júrip jatqan sııaqty. Qatelespesem ákimdik ǵımaratynyń ózine kelgen shyǵyn kólemi 21 mlrd teńge sııaqty. Naqty esimde joq. Endi qurylys jumystary qarqyndy bolady, kúıgenin qyrady, jaramaıtynyn aýystyrady degendeı.
Biraq qarap tursam (ózimniń taza shala-shıki oıym ǵoı), ákimdikti týra sol jerge qaıta salýdyń keregi joq sııaqty. Birinshiden 1986 jyly da, 2022 jyly da biraz jastyń qany tógilgen alań jatyr. Aýrasy óte aýyr. Buryn da ákimdik ishine kirgende sup-sur bolyp turatyn, endi tipti aýyr aýra bolatyn sııaqty.
Ekinshiden ákimdikti basqa bir aýdanǵa qoıyp tastasa, mysaly Alataý aýdanynyń bir shetine, "Shańyraq" degen syndy jaqqa nemese Naýryzbaı aýdanynyń bir shetine degendeı. Aýyldan qalaǵa kelgen jastardyń jáne ýrbanızaııanyń eń iri júrip jatqan oshaqtary sol jaqtar. Ony ıa qalalyq ákimdik naqty bilmeıdi (bilse de óz kózimen durys kórmeıdi), ıa aýdandyq ákimdikter naqty jetkizbeıdi. Eger sol aýdandardyń birinde qalalyq ákimdik tursa, biraz ózgeris bolady. Bazarda ýaqytsha jumys isteıtin, kúzetshi bolyp júrgen, arba súıretip, jaqsy ómirden úmit úzgen, baspanasyz páter jaldaıtyn, jumyssyz júretin jastardyń ortasyna túsken sátte ǵana máseleler aqyryndap sheshile bastaıdy. Qalanyń qaq ortasynda otyryp, elıtalyq aýdanda turǵan ǵımarattan sóz sóıleýge qaraǵanda damýy baıaý aýdanda "halyqtyń máselesin sheshemiz" dep sóz sóılep turý halyqqa ótimdirek (múmkin qatelesermin). Jol, aýyz sý, jaryqtandyrý jáne basqa da máseleler sheshile bastaıdy ma degen oı ǵoı.
Mysaly Eýropada (jalpy damyǵan elderde), artta qalǵan aýdan-aýyl-qalaǵa bir mańyzdy ǵımaratty qoıady. Ol ne ýnıversıtet (Qaskeleńde SDÝ turǵan sııaqty), ne ákimdik, ne basqa birdeńe bolýy múmkin. Sol ǵımarat sol aýdannyń damytýshy draıverine aınalady. Aqyryndap órkenıet, mádenıet, materıaldyq ıgilikter kele bastaıdy. Negizi 21 mlrdqa sý jańa ǵımarat ta salýǵa bolady ǵoı...
"Adyrna" ulttyq portaly.
