2018 جىلى 20 ناۋرىز كۇنى «جەبەۋ» رەسپۋبليكالىق قوعامدىق بىرلەستىگىنىڭ توراعاسى ءومارالى ادىلبەكۇلى، دۇنيەجۇزى قازاقتارى قاۋىمداستىعىنىڭ باس حاتشىسى، جەبەۋدىڭ كەڭەس مۇشەسى راحىم Aيىپۇلى، كەڭەس مۇشەلەرى جەڭىس امىربەكۇلى، ساۋلەن توققازىۇلى استانا قالاسىندا قحر-نىڭ قازاقستانداعى توتەنشە جانە وكىلەتتى ەلشىسى چجاڭ حانحۋەي مىرزانىڭ قابىلداۋىندا بولدى. كەزدەسۋگە ەلشىلىك كونسۋلدىق باسقارماسىنىڭ باستىعى Gu Ming مىرزا، ەلشىلىك قىزمەتكەرلەرى Liu Jiangping حانىم مەن Zhou Jianjun مىرزا قاتىناستى. ەلشى مىرزا ناۋرىز مەرەكەسىمەن قۇتتىقتاي كەلە، ەكى ەل اراسىنداعى ەكونوميكالىق-ماندەني قارىم-قاتىناستاردىڭ ماڭىزى مەن دامۋىنا توقتالىپ ءوتتى. سونىمەن بىرگە، شۇار-دا قالىپتاسقان جاعداي جونىندە اشىق-جارقىن بۇكپەسىز پىكىر الماسۋ بولدى. باس ەلشى الدا ءساۋىر ايىندا شۇار-عا ەلشىلىكتىڭ قىزمەت گرۋپپاسى باراتىندىعىن ايتتى. شۇار-داعى قالىپتاسقان جاعداي بويىنشا ءبولىنىپ-جارىلعان وتباسىلاردىڭ ارىز-ارمان، ءمۇڭ-زارى بولسا، استاناداعى ەلشىلىك پەن الماتىداعى باس كونسۋلدىققا جولداۋىن ەسكەرتتى.
ناۋرىز ايىنىڭ باسىندا قحر-نىڭ الماتىداعى باس كونسۋلدىعى قازاقتىڭ ءداستۇرلى ناۋرىز مەرەكەسىنە ارنالعان جامبىل اتىنداعى فيلارمونيادا وتەتىن ساۋىق كەشكە شاقىرتۋ جىبەردى. بىز شاقىرتۋدى العاننان كەيىن «جەبەۋ» رەسپۋبليكالىق قوعامدىق بىرلەستىگىنىڭ كەڭەس مۇشەلەرى اقىلداسا كەلە بۇل كەشكە قاتىسپايمىز دەپ شەشتىك. سونىمەن باس كونسۋلدىققا ارنايى حات جازىپ(حاتتىڭ تۇپ نۇسقاسى مەن اۋدارماسى ماتەريالدىڭ سوڭىندا), شۇار-دا ورىن الىپ جاتقان ەكى ەلدىڭ دوستىق قارىم-قاتىناسىنا سىزات تۇسىرەتىن زاڭسىزدىقتار مەن كەلەڭسىزدىكتەردى اتاپ وتتىك. حات جازعاننىڭ ەرتەسى كونسۋلدىق ىستەر ءبولىمىنىڭ باسشىسى دۋ چجيان حانىم بىرلەستىك توراعاسى ءومارالى ادىلبەككە تەلەفون شالىپ باس كونسۋلدىقتىڭ بۇل ماسەلەگە ايىرىقشا نازار اۋدارىپ وتىرعانىن، بىرلەستىك كەڭەس مۇشەلەرىن 11 ناۋرىزدا باس كونسۋلدىققا كەلىپ ەمىن-ەركىن پىكىر الماسۋعا ۇسىنىس ەتتى. ءبىز اقىلداسا كەلە كەزدەسۋدى جەبەۋدىڭ كەڭسەسىندە وتكىزۋدى ءارى باس كونسۋلدىڭ ءوزىنىڭ قاتىسۋىن تالاپ ەتتىك. ناۋرىزدىڭ 11 كۇنى ساعات 11:00- دە باس كونسۋلدىڭ ورىنباسارى مياو حونبو مىرزا، كونسۋلدىق ىستەرى ءبولىمىنىڭ باسشىسى دۋ چجيان حانىم جانە سول ءبولىمنىڭ قىزمەتكەرى حاي لا حانىم كەڭسەمىزگە كەلىپ، بىرلەستىكتىڭ كەڭەس مۇشەلەرىمەن قالىپتاسقان ماسەلەلەر جونىندە ەمەن-جارقىن پىكىر الماستى. كەزدەسۋدى بىرلەستىك توراعاسى ءومارالى ادىلبەك جۇرگىزدى.
الدىمەن ءسوز العان ءومارالى مىرزا: «ۇسىنىسىمىزدى جەرگە تاستاماي، دەمالىس ۋاقىتتارىڭىزدى قيىپ پىكىر الماسۋعا كەلگەندەرىڭىزگە كوپ راقمەت! شۇار-دا قالىپتاسقان كۇردەلى جاعداي بارلىق ازاماتتاردى الاڭداتىپ وتىر. ءبىز بىلتىر جىل باسىنان باستاپ سىزدەرگە، استاناداعى ەلشىلىككە، قىتايداعى قاتىستى مەكەمەلەرگە كوپتەگەن حات جازدىق. كەي ماسەلەلەر شەشىلدى، كەي سۇراقتارعا جاۋاپ كەلدى. بۇگىن جەبەۋدىڭ كەڭەس مۇشەلەرى 95% تولىق جينالىپ وتىر. ەندى ەمىن-ەركىن پىكىر الماسىپ، قالىپتاسقان ماسەلەلەردىڭ دۇرىس شەشىلۋىنە تۇرتكى بولساق دەيمىن» دەدى. وسىدان كەيىن ءسوز العان مياو حونبو مىرزا: «حاتتارىڭىزدى تاپسىرىپ الدىق، باس كونسۋل بۇل ىسكە وتە ءمان بەرىپ وتىر. ءاسىلى ءوز كەلمەكشى ەدى، تىعىز شارۋالارى شىعىپ ورىنا مەن كەلدىم. بىلتىر جىل باسىنان باستاپ ءومارالى، تالعات، راحىم، قۇرمەت مىرزالارمەن 5,6 رەت كەزدەسىپ، ءبىرتالاي ماسەلەلەردى تالقىلادىق. سىزدەر جىبەرگەن حاتتاردى، ارىز شاعىمداردى ءتيىستى ورىندارعا جىبەردىك. ءبىز تەك ۇسىنىس بەرە الامىز، كۇشتىك قۇرلىمدار مەن اتقارۋشى ورگاننىڭ بيلىگىنە ارالاسا المايىمز. ال جاۋاپ حاتتىڭ كەشىگۋىنە كەلسەك، پەكيندە ەكى قۇرىلتاي اشىلىپ، ۇكىمەتتىك قۇرلىمداردا وزگەرىس بولىپ جاتىر. كونستيتۋتسيادا وزگەرىستەر ەنگىزىلدى. ال شۇار-دىڭ جاعدايىن مەنەن جاقسى بىلەسىزدەر، مەملەكەتتىك قۇرلىمداعى كادرلەردىڭ 1/3-ءى تومەنگە ءتۇسىپ كەتكەن. وسىدان كوپتەگەن جۇمىستار اقساپ جاتىر. سىزدەر قوعامدىق ۇيىم رەتىندە قانداستارىڭىزدىڭ زاڭدى قۇقىن قورعاۋ جولىندا مىندەتتەرىڭىزدى دۇرىس اتقاردىڭىزدار. ءبىز دە ديپلوماتيالىق جۇمىسىمىزدى تيىسىنشە اتقارىپ جاتىرمىز. ەندى سابىر كەرەك، ءار ءىستىڭ شەشىمى بولادى دەپ ۇمىتتەنەمىز. قر ازاماتتارىنىڭ قىتايعا بارىپ ۇستالىپ قالۋى سول ازاماتتىڭ قر ازاماتتىعىن الۋدان بۇرىن قحر ازاماتتىعىنان شىعۋ تۋرالى ءتيىستى ەرەجەلەردى بۇزعان بولۋى مۇمكىن، سوندىقتان وسى جايتتەردى انىقتاۋ ءۇشىن ۋاقىتشا قالدىرىلىپ وتىرعان بولۋى كەرەك دەپ ويلايمىن. قحر-نىڭ ازاماتتىعى تۋرالى زاڭىنىڭ 3 باپ 9 تارماعىندا شەتەل ازاماتتىعىن قابىلداعان كىسىلەردىڭ قحر ازاماتتىعى سول ساتتەن اۆتوماتتى تۇردە جويىلادى دەگەنمەن وسى زاڭنىڭ 12 بابىندا اسكەري ادامدار مەن مەملەكەتتىك قىزمەتكەرلەر ۇكىمەتتىڭ رۋحساتىنسىز شەتەلدىڭ ازاماتتىعىن الۋعا بولمايدى دەلىنگەن. ول ازاماتتار وسى تالاپتى ورىنداماعان بولسا كەرەك. قر ىقتيارحاتىنىڭ الىنۋىن زاڭسىزدىق ءارى جەرگىلىكتى اتقارۋشى ورگانداردىڭ اسىرا سىلتەۋى دەپ بىلەم». وسى جەردە راحىم ايىپۇلى: «زەينەتكە شىققان ادامدار وسى ساناتقا كىرەدى مە؟»،- دەپ سۇرادى. مياو حونبو: «بۇل جونىندە تالاس بار. بىرەۋلەر كىرەدى دەيدى، بىرەۋلەر كىرمەيدى دەيدى».
راقىم ايىمۇلى: مەن ءۇش نارسەنى اتاپ وتەيىن: ءبىرىنشى، قازاقستان پاسپورتىن العان ازامات قىتاي ەلشىلىگىنىڭ رۋحساتىمەن ۆيزا الىپ، سول ەلگە باردى. حالىقارالىق زاڭ بويىنشا ولاردى 4 ساعاتتان ارتىق ۇستاۋعا بولمايدى. ال ولار نە ءۇشىن ساياسي ۇيرەنۋگ جىبەرەدى؟ قىلمىسى بولسا دالەلدەپ قىتاي زاڭىمەن سوتتاسىن، ساياسي ۇيرەنۋگە كىرگىزۋدىڭ ەشقانداي نەگىزى جوق دەپ بىلەمىن. ەكىنشى، تىركەۋدەن شىعۋ تۋرالى ايتايىن، مەنىڭ شەشەم 85 جاستا، ول قايتىپ بارىپ تىركەۋىن وشىرەدى؟ ال ءبىزدىڭ مىنا كەڭەس مۇشەلەرى سابىرجان مۇحامەتحان، جەڭىس امىربەكتەر كەزىندە جاتاقحاناعا تىركەلگەن. ال بۇگىن ول جاتاقحانالار جوق. ولار تىركەۋدەن قايتىپ شىعادى؟ ىقتيارحات جونىندەگى پىكىرىڭىزگە ريزا بولدىم. جالپى شۇار-دا كوشى-قون زاڭى تولىق كەمەلدەنبەگەن. وسىنى ءبىر جۇيەگە ءتۇسىرىپ، حالىقتى قيىندىقتان قۇتقارۋلارىڭىزدى ءۇمىت ەتەمىن.
مياو حونبو: قىتاي قوس ازاماتتىقتى قولدامايدى. ارينە قۇقىق قورعاۋ ورگاندارى مەن سوت جۇيەسىنىڭ ءوز بەلگىلەمەلەرى مەن ءباتۋالارى بار بولۋى كەرەك. سىزدەر وسى ىسكە ۇشىراعان جەكە تۇلعالاردىڭ جەكە پىكىرىن قايتالاپ وتىرسىزدار. بۇل ءىستى جان-جاقتى زەرتتەۋ كەرەك. تىركەۋدەن شىعۋدى قىتاي ۇكىمەتى بۇرىن قۋزاماسا، قازىر قۋزاپ جاتىر. بايقاعان شىعارسىزدار قحر-دا قازىر كوپتەگەن وزگەرىس بولىپ جاتىر. كەشەگى ولشەمدەر بۇگىنگە جارامايدى. بۇرىن مەملەكەتتىك قوناقاسىلاردا اراق اسپاتوك قۇيىلاتىن، كورۋپتسياعا قارسى كۇرەس باستالعاننان كەيىن مۇلدە قۇيىلمايتىن بولدى. وسىعان باستا ادامدار سەنبەگەن. قازىر ءبارى ۇيرەنىپ كەتتى. پارتيالىق ءتارتىپ تە كۇشەيدى.
ءومارالى ادىلبەكۇلى: بىلتىر جازدا ساياسي ۇيرەنۋ دەگەن نە دەپ وزىڭىزدەن سۇراعانمىن، كەيىن پەكينگە جينعا بارعاندا قحر مۇحاجىرلار مينيسترلىگىنىڭ دەپارتامەنت باستىعى شىن مىرزاعا وسى سۇراقتى قويدىم. ارينە، سىزدەر اتقارۋشى ورگان نە قۇقىق قورعاۋ ورگاندارى ەمەسسىزدەر. بىراق، قالىپتاسقان جاعدايعا بايلانىستى حالىقتىڭ ارىز ارمانىن جەتكىزەدى دەپ ويلايمىن. قوس ازاماتتىق ماسەلەسىنە كەلسەك، قازاقستان دا سوتسيaليستىك لاگەردەن شىققاندىقتان تىركەۋگە قاتتى ءمان بەرەدى. جەكە تۇلعا ازاماتتىق العاندا بۇرىنعى ەلدىڭ پاسپورتى مەن جەكە كۋالىگىن تاپسىرماي جاڭا قۇجات الا-المايدى. ەۆروپا، كانادا، سينگاپۋر، اۆستراليا ازاماتتىعىن العان قىتاي ازاماتتارى ەكى پاسپورتتى قاتار قولداناتىن جاعداي ىشكى ولكەدە كوپتەن كەزدەسەدى. ءبىزدىڭ قانداستارىمىزدا تەك تىركەۋدەن شىعۋ ماسەلەسى. ولاردى قوس ازاماتتىق دەپ كىنالاۋعا كەلمەيدى. قاتىستى ورىندارمەن پىكىر الماسىپ، وسى ماسەلەلەردىڭ جەڭىل جولىن قاراستىرساڭىزدار دەپ وتىنەمىن. شۇار-داعى جەرگىلىكتى كادرلاردىڭ زاڭ جونىندە تانىمى، ساياسي مادەنيەت ورەسى، تومەن بولعاندىقتان كوپتەگەن كەلەڭسىزدىكتەرگە جول بەرىپ وتىر.
وسى پىكىر الماسۋلاردان كەيىن تالعات مامىرۇلى ورالمان ستۋدەنتتەر مەن وقۋشىلاردىڭ قىستىق كونيكۋلعا بارىپ، قايتا الماي وتىرعانىن ءوزىنىڭ قىتايعا بارىپ، قايتىپ كەلە الماي وقۋىنان قالعان ءۇش ستۋدەنتىن مىسالعا الا وتىرىپ جەتكىزدى. قۇرمەت قابىلعازىۇلى تىركەۋدەن شىعۋ مەن زەينەتكەر ماسەلەسىندە كەرەعارلىقتىڭ بولعانىن، زەينەتكەرلەرگە نە تىركەۋدەن شىعىپ زەينەتاقىڭدى المايسىڭ، نە زەينەت اقىڭدى الساڭ تىركەۋدەن شىقپايسىڭ دەپ جەرگىلىكتى بيلىك زاڭسىز تالاپ قويلىپ جاتقانىن ايتتى. سەرىك سادۋاقاس 2017 جىلدان باستاپ ەكى ەلدىڭ اراسىنداعى بارىس-كەلىستىڭ توقىراۋعا ۇشىراعانىن، قانداستارىمىزدىڭ قۇجاتتارىن جيناپ العاننان كەيىن ەلگە كەلۋ ماسەلەسى قيىنداسا، مۇنداعى قازاقتاردىڭ قىتايعا بارۋعا، ۆيزا الۋعا كەدەرگىگە ۇشىراعانىن، ۆيزاسى بولعانىمەن وندا بارۋعا قر ازاماتتارىنىڭ ءوزىن ساياسي ۇيرەنۋگە اكەتۋ ىستەرى بولعاندىقتان بارۋعا جۇرەكىسىنەتىندىگىن، وسىنىڭ سالدارىنان ەكى ەل اراسىنداعى ساۋدا-ساتتىق، تۋريزم جاقتارىنىڭ دا توقىراۋعا ۇشىراپ كەلە جاتقانىن ايتىپ ءوتتى. ءادىل وسىنداعى قانداستارىمىزدى شاقىرۋ ءۇشىن ول جاقتاعى باۋىر تۋىستارىنا ءتۇرلى قىسىمدار جاسالىپ جاتقانىن ناقتى فاكتىلەرمەن تىلگە تيەك ەتتى.
وسىدان كەيىن ءسوز العان مياو حونبو مىرزا بۇل كەزدەسۋدىڭ وتە ماعىنالى بولعاندىعىن، وسىنداعى بارلىق پىكىرلەردى ەسكەرىپ ءتيىستى جەرلەرگە جەتكىزەتىنىن، بۇدان كەيىن دە ءجيى كەزدەسىپ، پىكىر الماسۋ كەرەكتىگىن اتاپ ءوتتى. ءارى ەكى ەل قارىم-قاتىناسىنىڭ جوعارى دەڭگەيدە دامىپ كەلە جاتقانىن، ۇلكەن باعىتتىڭ دۇرىس ەكەنىن، بارلىق ورالماندار ارىز ارمانى، قيىنشىلىعى بولسا الماتىداعى كونسۋلىق پەن استاناداعى ەلشىلىككە كەلۋىن، ولارعا ەسىك اشىق ەكەنىن ايتتى. بوگدە كۇشتەردىڭ ارالاسۋى، ەكى ەلگە دە ءتيىمسىز، ءبارىن زاڭمەن، اقىلمەن شەشەيىك دەپ قورتىندىلادى. سوڭىندا دۋ زجيان حانىم قازاقستانداعى كاسىپكەرلەر قىتايداعى ارىپتەستەرى ارناۋلى شاقىرۋ جىبەرسە، ءبىر جىلعا كوپ مارتە ۆيزا الۋعا بولاتىندىعىن ەسكەرتتى.
كەزدەسۋ ەكى ساعاتقا سوزىلدى.
قحر-نىڭ الماتىداعى باس كونسۋلىنا حات
قۇرمەتتى قحر-نىڭ الماتىداعى باس كونسۋلى چجان ۆەي مىرزا:
اۋەلى، بىرلەستىگىمىز اتىنان وزدەرىڭىز ۇيىمداستىرعالى وتىرعان ناۋرىز مەرەكەسىنە ارنالعان ساۋىق كەشكە شاقىرعاندارىڭىزعا العىس ايتامىن! بۇل شارانى ۇيىمداستىرۋ كونسۋلدىقتىڭ ەلىمىزگە، ۇلتىمىزدىڭ ءداستۇرى مەرەكەسىنە دەگەن ۇلكەن قۇرمەت، شىنايى تىلەك دەپ بىلەمىز. سونىمەن بىرگە، وقۋدا ۇزدىك، وتباسىلىق جاعدايى تومەن ستۋدەنتتەرگە جاردەماقى تاعايىنداپ، ولارعا جاقىننان جاردەمشى بولعاندارىڭىزعا بارلىق قانداستارىمىزدىڭ اتىنان راحمەتىمىزدى ايتامىز.
بىرلەستىگىمىز قۇرىلعالى بەرى، قازاقستان-قىتاي ارا بۇقارالىق بارىس-كەلىستىڭ نىعايۋى، مۇعاجىرلار مۇددەسىنىڭ قورعالۋى، ەكىجاقتى بايلانىستىڭ نىعايىنا پايدالى جۇمىستار اتقارىپ كەلدى، ونى ءوز كەزەگىندە وزدەرىڭىز دە جوعارى باعالاپ، جىلى لەبىز بىلدىرگەنسىزدەر. ءبىزدىڭ بىرلەستىكتىڭ ماقساتىنىڭ ءوزى مۇعاجىرلارعا، وتە-موتە قانداستارعا زاڭدىق كەڭەس جانە گۋممانيتارلىق كومەك بەرۋ، جەرگىلىكتى ورتاعا ۇيلەسىپ كەتۋىنە دانەكەر بولۋ بولىپ تابىلاپدى.
باس كونسۋلدىق ورالمانداردىڭ قازىرگى جاعدايلارىنان ءبىرشاما حاباردار. 2017 جىلدىڭ باسىنان باستاپ، شۇار-داعى ءار دارەجەلى ۇكىمەتى نەمەسە سالالىق مەكەمەلەرى قحر كونستيتۋتسياسى مەن قاتىستى زاڭ ەرەجەلەرىنە قايشى، ءتىپتى، قىتاي ورتالىق ۇكىمەتىنىڭ ساياساتىنا كەرەعار بىرقىدىرۋ جەرگىلىكتى ساياسات، ەرەجەلەر شىعارىپ، ورالمانداردىڭ ەكى جاققا قالىپتى بارىپ-كەلۋى مەن كوشى-قونىنا وراسان قيىندىقتار تۋدىردى. اسىرەسە، ولاردىڭ قىتايداعى تىركەۋىن ءوشىرۋ ماسەلەسىندە ادەيى كەدەرگى جاساپ، قاساقانا قيناپ، اۋرە-سارساڭعا سالدى. قاتتى ايتساق ايىپ ەتپەڭىز، قازىر ەكى ەلدىڭ قالىپتى بۇقارالىق بارىس-كەلىسى مەن ساۋدا-ساتتىعى وسى شۇار-نىڭ جەرگىلىكتى ساياساتىنىڭ كەسىرىنەن توقىراۋعا جاقىن. قازاقستان حالقى وسىنى تۇسىنە الماي الەك: «قازاقستان مەن قىتاي باسشىلارىنىڭ سونشاما جىلداردان بەرى اقىل-پاراساتى مەن ەڭبەگىنىڭ ارقاسىندا قولعا كەلگەن تاتۋ كورشىلىك، دوستىق قاتىناسى مەن ستراتەگيالىق ارىپتەستىگى ءبىر ساتتە وزگەرىپ شىعا كەلدى مە؟ ەكى ەل بايلانىسى ارىقاراي نە بولادى؟»، - بۇل سۇراق بارلىق دوستىق نيەتتەگى سانالى ادامداردى تولعاندىرىپ وتىر.
بىرلەستىگىمىز ەكى ەل قارىم-قاتىناسىن ويداعىداي ەسكەرىپ، كەزىندە كونسۋلدىقتارىعىزعا، جانە سىزدەر ارقىلى شۇار ۇكىمەتىنە اتالعان ماسەلەلەرگە جولىققان كىسىلەردىڭ ارىز-شاعىمدارىن ناقتى دالەلمەن جەتكىزگەن بولاتىنبىز. الايدا، وتكەن جىلدىڭ سوڭعى جارىمىنان بەرى قاراي ناقتى نەمەسە قاناعاتتانارلىق جاۋاپ الا الماي وتىرمىز. جاسى ۇلعايعان ناۋقاس زەينەتكەرلەردىڭ شۇار-دا قامقورشىسىز قالىپ قويۋى، اتا-اناسى كەلە الماعان بالالاردىڭ قازاقستاندا ءتىرى جەتىمنىڭ كۇيىن كەشۋى، ونى دەسەڭىز، قازاقستان ازاماتتىعىن العان كىسىلەردىڭ ەشقانداي سەبەپ-سىلتاۋسىز “ساياسي ۇيرەنۋ ورتالىقتارىنا” جىبەرىلۋى سياقتى ادام ساناسىنا كىرمەيتىن جايتتەر شاش ەتەكتەن. بيىل جىل باستالعالى بۇل اڭگىمە سايابىرسىعاننىڭ ورنىنا، ءورشىپ الدى. قىستىق كانيكۋلعا كەتكەن وقۋشىلار مەن ستۋدەنتتەردىڭ باسىم كوپشىلىگى قايتىپ كەلە الماعاندىقتان، وقۋلارىن تاستاۋعا ءماجبۇر بولدى.
ءبىزدىڭ بىرلەستىگىمىز قازاقستانداعى ورالمانداردىڭ قۇقىق-مۇددەسىن قورعاۋدا وزىندىك ورىنى بار، سونداي-اق، سىزدەرمەن سەلبەسىپ جۇمىس ىستەپ كەلە جاتقان ۇكىمەتتىك ەمەس ۇيىم. سوندىقتان دا، ورالمان قاۋىمى، ءتىپتى، قازاقستان قوعامى بىزگە ءۇمىت ارتىپ وتىر، سىزدەر ارقىلى اتالعان ماسەلەلەردى شەشىپ بەرەدى، نەمەسە سۇراقتارىمىزعا تولىققاندى جاۋاپ بەرەدى دەپ كۇتەدى. شاراسىزدىق ءبىزدى ىرىقسىز جاعدايعا يتەرمەلەپ وتىر. وتكەن ايدا سىزدەردىڭ باستامالارىڭىزعا سەلبەسىپ، ءبىراز ورالمان ازاماتتاردى الماتىداعى قىتايدىڭ ەسكى جاڭا جىل كەشىنە قاتىسۋعا ۇيىستىرعان ەدىك. وسىعان تۇسىنبەۋشىلىك ءبىلدىرىپ جاتقاندار بار: “سونشاما قانداستارىمىز شۇار-دا زاڭسىز قىسپاققا ءتۇسىپ، قينالىپ جاتقاندا، سول ەلدىڭ كونسۋلدىعى ۇيىمداستىرعان مەرەكەلىك شاراعا قاتىسۋ اقىلعا سىيمايدى، ءتىپتى ساتقىندىق” دەپ باعالاپ، جەبەۋ بىرلەستىگى “كونسۋلدىق ارقىلى ەشتەڭەنى شەشە الماسا، كىم ءۇشىن ىستەيتىن ۇيىم؟” دەپ سۇراق قويۋدا. مىنە بۇل ءبىزدىڭ بىرلەستىگىمىزگە قوعامدا تەرىس پىكىر قالىپتاستىرىپ وتىر. بىرلەستىك جاعىنان سىزگە جازعان حاتتار مەن ارىزدارىمىزعا جاۋاپ الا الماي وتىرمىز. وسىلاردى ەسكەرە وتىرا، بىرلەستىك مۇشەلەرىنىڭ ساۋىقكەشكە قاتىسا المايتىندىن بىلدىرەمىز. تۇسىنىستىكپەن قاراۋىڭىزدى سۇرايمىن.
مەرەكەلىك ساۋىقكەش ءساتتى ءوتسىن!
"جەبەۋ" رەسپۋبليكالىق قوعامدىق بىرلەستىگىنىڭ توراعاسى
ءومارالى ادىلبەك،
09.03.2018
Jebeu.kz
