قايرات قۇدايبەرگەن بۋكمەكەرلەر مەن كازينولاردى جابۋعا پەتيتسيا جاريالادى

8434
Adyrna.kz Telegram

ءماسليحات دەپۋتاتى، كاسىپكەر قايرات قۇدايبەرگەن قۇمارلىققا شاقىراتىن بۋكمەكەرلەر مەن ونلاين كازينولاردى جابۋدى ۇسىندى. ول اتالعان ىسكە قاتىستى پەتيتسيا قۇرىپ، قول جيناۋدى باستاپ كەتتى. قاسىم-جومارت توقاەۆقا جولداعان ۆيدەو-ۇندەۋىندە قايرات قۇدايبەرگەن بۇل ماسەلەنى قولعا الىپ، شەشىپ بەرۋدى ءوتىندى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.

"وكىنىشكە قاراي، ءسىز-بىزدەپ شىرىلداپ جۇرگەن ماسەلە بەي-جاي قالىپ وتىر. بۇل ونلاين كازينو، بۋكمەكەرلەر بينگو، الاياقتاردىڭ وتىرىك ويناۋ پلاتفورمالارى، ويىن قۇمارلىققا شاقىراتىن، تەحنيكالىق تۇرعىدا زاڭسىز، ليتسەنزياسى جوق وسىنداي ويىنداردى كورىپ وتىرمىز", - دەيدى دەپۋتات.

قۇدايبەرگەن بۇعان دەيىن دە پەتيتسيا قۇرىپ، قول جيناپ، پرەزيدەنتكە جولداعانىن ايتادى. الايدا ازىرگە بۇل سۇراق نازاردان تىس قالىپ وتىر، دەيدى كاسىپكەر. 

ايتۋىنشا، قۇمار ويىندار ەلىمىزدەگى جانۇيا ينستيتۋتىن بۇزادى. 

"قانشاما وتباسىلار اجىراسىپ جاتىر، ادامدار وزىنە قول جۇمساپ جاتىر، قارىزعا باتىپ، بىرەۋدىڭ ومىرىمەن ويناپ جاتقان ويىن قۇمارلاردىڭ، كازينولاردىڭ قالتاسىن تولتىرىپ جاتىر. ەلىمىزدەن ميللياردتاعان اقشالار باسقا ەلدىڭ وفشورلىق زوناسىنا، بانكتەرىنە كەتىپ جاتىر. بۇعان قارايتىن قۇزىرلى ورگاندار قازىرگى تاڭدا ەشتەڭە ەستىمەيتىن، كورمەيتىن، بۇل تۋرالى ايتپايتىن ۇيىمدارعا اينالدى", - دەيدى قۇدايبەرگەن. 

دەپۋتات بۋكمەكەرلەر مەن ونلاين كازينولاردىڭ جارناماسى "جەر جاراتىنىن" ايتىپ اشىندى. اسىرەسە، سپورتتى ناسيحاتتايتىن ارنالاردىڭ قۇمار ويىندى قولداپ وتىرعانى وكىنىشتى، دەيدى ول. 

"ەڭ نامىسقا تيەتىن نارسە، ۇلكەن سايتتار، YouTube, تەلەارنا بولسىن، سپورتتى ناسيحاتتايتىن ءبىزدىڭ ۇلتتىق تەلەارنالار وسى بۋكمەكەرلەردىڭ جارناماسىنا قارقىن بەرىپ وتىر. بۇل - ناعىز ۇيات، نامىسسىزدىق. ەلىمىزدى الداپ جۇرگەن بۋكمەكەرلەردىڭ اقشالارىن الىپ، سپورتقا سالۋ. مەنىڭشە، سپورتقا سالاتىن اقشاسى 5 پايىز، ال 95 پايىزى بىرەۋدىڭ قالتاسىن تولتىرىپ جاتىر. بۇل اقشا - قاراپايىم حالىقتىڭ اقشاسى", - دەيدى قۇدايبەرگەن. 

"ەل اعاسى رەتىندە وسى سۇراقتى قولعا الىپ، شەشۋىڭىزدى سۇرايمىز", - دەپ پرەزيدەنتكە ءوتىنىشىن ايتتى دەپۋتات.

قۇدايبەرگەن بۇل ماسەلەگە بەي-جاي قارامايتىن ادامداردى پەتيتسياعا قول قويۋعا شاقىردى. ول قازىردىڭ وزىندە 21 مىڭنان اسا قول جيناپ ۇلگەرگەن. 

“ادىرنا” ۇلتتىق پورتالى

پىكىرلەر