پرەزيدەنتتىك كادر رەزەرۆىندە بولعان ارنۇر سارتوۆ تاياۋدا قوستاناي وبلىسى التىنسارين اۋدانىنىڭ اكىمى بولىپ تاعايىندالدى دەپ حابارلايدى "ادىرنا" ۇلتتىق پورتالى "قازاقپاراتقا" سىلتەمە جاساپ.
ارنۇر سارتوۆ 2013 جىلى مەملەكەتتىك قۇرىلىمعا جۇمىسقا ورنالاسقان. ول سول كەزدىڭ وزىندە مەملەكەتتىك قىزمەتتىڭ ۇلكەن جاۋاپكەرشىلىك ەكەنىن تۇسىنگەن.
"ۇلكەن جاۋاپكەرشىلىكتە ءتارتىپ بولۋى ءتيىس. جۇمىستا بولسىن، ومىردە بولسىن ۇلكەن جاۋاپكەرشىلىك پەن ءتارتىپتى اكەمنەن كوردىم. ول ۇزاق جىلدار بويى مەملەكەتتىك قىزمەتتە جۇمىس ىستەدى. مەنىڭ مەملەكەتتىك قىزمەتكە كەلۋىم اكەمنەن العان ۇلگى-ونەگەمەن بايلانىستى دەۋگە بولادى", - دەپ ءبولىستى ا. سارتوۆ.
ارنۇر سارتوۆ پرەزيدەنتتىك كادر رەزەرۆىنە ءبىر دەگەننەن وتە الماعانىن ەسكە الادى. ءبىرىنشى رەت جەتكىلىكتى دايىندالماي، ءوز كۇشىنە قاتتى سەنگەن. "العاشىندا ىرىكتەۋ كەزەڭىنەن وتە المادىم. وسى جولى دايىندىققا، ىرىكتەۋگە جانە كونكۋرسقا قاتىسۋعا بايىپپەن قارادىم", - دەپ كۇلدى ول.
"مەملەكەتتىك قىزمەت مانسابىندا بىردەن جوعارى كوتەرىلۋدى كۇتكەن جوقسىز با؟ دەگەن سۇراققا ا. سارتوۆ مەملەكەتتىك باسقارۋ جۇيەسىندەگى مەريتوكراتيا قاعيداسى ءساتتى جۇمىس ىستەپ جاتقانىن اتاپ ءوتتى. وسىنداي ىرىكتەۋ ءادىسىن قولدانۋ تيىمدىلىگىنىڭ ءبىر مىسالى – وسى جاعداي.
"گەنەرال بولۋدى ارماندامايتىن سارباز جوق". سوندىقتان، ارينە، ارمانىم مەن ماقساتىم بيىك. مۇنىڭ قاجىرلى ەڭبەك ەكەنىن دە تۇسىنگەن ءجون. بۇل ىرىكتەۋدەن ءوتۋ وڭاي ەمەس، ءار ۇمىتكەر ءجىتى ىرىكتەلەدى", - دەيدى ارنۇر سارتوۆ.
"مەن اكىم ەتىپ تاعايىندايدى دەپ كۇتپەدىم. بىراق، ەكى جىل بويى اكىم ورىنباسارى بولىپ جۇمىس ىستەپ، تاجىريبە جيناقتادىم. مەملەكەتتىك قىزمەتتە 2013 جىلدان بەرى جۇمىس ىستەيمىن. سوندىقتان مەريتوكراتيا قاعيداتى بويىنشا قادام-قاداممەن ىلگەرى جىلجىپ كەلەمىن. بايقاعانىڭىزداي، وسى قاعيدا ەنگىزىلگەننەن بەرى جۇمىس ءجۇرىپ جاتىر جانە بەلگىلى ءبىر وڭ ناتيجە بار", - دەيدى ول.
سونداي-اق اۋدان اكىمى رەتىندە ارنۇر سارتوۆ مەملەكەت باسشىسى ق. توقاەۆتىڭ ءماجىلىس وتىرىسىنداعى سوڭعى تاپسىرمالارى مەن باستامالارىنا قاتىستى ءوز پىكىرىن ءبىلدىردى.
ماعان مەملەكەت باسشىسىنىڭ قوعامدى ءبولىپ-جىكتەمەيتىنى ۇنايدى. حالىقتىڭ وتىنىشىنە قۇلاق اسىپ، بارلىق پروبلەمالىق ماسەلەنى شەشۋدىڭ ناقتى قۇرالدارىن اتايدى. مەملەكەت پەن قوعامنىڭ اجىراماس ءبىرتۇتاس ەكەنىن ءتۇسىنۋ كەرەك. تەك بىرلەسە وتىرىپ كوپتەگەن ماسەلەلەر مەن پروبلەمالاردى شەشۋگە بولادى،- دەيدى ا.سارتوۆ.
"ادىرنا" ۇلتتىق پورتالى.
