جىلدام شاحماتتان (بليتس) الەم چەمپيوناتىنىڭ جەڭىمپازى ءبيبىسارا اساۋباەۆا ەلورداعا كەلدى. گروسسمەيستەر نۇر-سۇلتان قالاسىنىڭ كىشكەنتاي شاحماتشىلارىمەن ءبىر پارتيا شاحمات ويناپ، شەبەرلىك ساعاتىن كورسەتتى، دەپ حابارلايدى "ادىرنا" ۇلتتىق پورتالى.
الەم شاحماتى تاريحىنداعى ەڭ جاس چەمپيون اتانعان سپورتشىنى كەشە اۋەجايدان قر مسپ سپورت كوميتەتى، قازاقستان شاحمات فەدەراتسياسى وكىلدەرى، جانكۇيەرلەرى، جاس شاحماتشىلار كۇتىپ العان بولاتىن. ءبيبىسارا 25-30 جەلتوقسان ارالىعىندا پولشاداعى چەمپيوناتقا قاتىسىپ، ەل ابىرويىن اسقاقتاتتى.
- ۆارشاۆا قالاسىنداعى تۋرنير 5 كۇنگە جالعاستى. راپيدتەن ەكىنشى ورىن، بليتستەن ءبىرىنشى ورىنعا قول جەتكىزدىم. بۇل جارىسقا وتە تىڭعىلىقتى دايىندالدىم. بۇعان دەيىنگى ەڭ جوعارعى جەتىستىگىم 13 جاسىمدا راپيدتەن 10-ورىن العانىم ەدى. جەڭىس تۇعىرىندا تۇرىپ، قازاقستاننىڭ گيمنى ويناعاندا ەرەكشە ماقتانىش سەزىمىندە بولدىم. قازاقستاندىق جانكۇيەرلەردىڭ قولداپ جاتقانىنا وتە قۋانىشتىمىن، - دەپ العىسىن ءبىلدىردى اساۋباەۆا.
قازاقستان شاحمات فەدەراتسياسى وكىلدەرى وتاندىق جاس شاحماتشىلاردى ءبيبىسارانىڭ جەڭىسى جىگەرلەندىرەتىنىن ايتىپ وتىر. ونىڭ ۇستىنە وسى جاس بۋىننىڭ اراسىنان مىقتى سپورتشىلاردىڭ جوعارى ناتيجە كورسەتۋ تەندەنتسياسى قازاقستاندا ەرەكشە بايقالادى.
-ءبيبىسارانىڭ جەڭىسىن الەمدىك رەكورد دەۋگە بولادى. ويتكەنى ول ازىرگە الەمنىڭ ەڭ جاس چەمپيونى. ەرەسەكتەر اراسىندا ەندى قازاقستاندا دا چەمپيون بار. بۇل جاس بۋىن ءۇشىن العا ۇمتىلۋعا سەبەپ بولادى. ءبيبىسارانىڭ كەلەشەكتە بۇدان دا ۇزدىك ناتيجەلەر كورسەتۋىنە پوتەنتسيالى بار. جالپى، 2021 جىل قازاقستاننىڭ شاحمات سپورتى ءۇشىن وتە ءساتتى اياقتالدى. 9 جىل بويى گروسسمەيستەر شىقپاپ ەدى، مىنە، بيىل ەكى سپورتشىمىز گروسسمەيستەر اتاندى. سوچيداعى الەم كۋبوگىندا جاقسى جەتىستىكتەرگە جەتتىك، وليمپيادا ويىندارىندا قۇراما 8-ورىن الدى. قازاقستاندا 10 مىڭ بالا شاحماتپەن اينالىسادى، ءۇمىتىمىز سول جاستاردا، - دەدى رۋسلان ىسقاقوۆ.
مىسالى، 10 جاسقا دەيىنگى بالالار اراسىندا قازاقستان چەمپيونى بولعان ايارۋ التىنبەك ءبيبىسارانىڭ جەتىستىگىن قايتالاعىسى كەلەدى.
-مەن بۇعان دەيىن استانانىڭ 3 دۇركىن جەڭىمپازى بولدىم. ازيا چەمپيوناتىندا 2-ورىن الدىم. بۇگىن ءبيبىسارانى كۇتىپ الىپ، تانىستىم. ونىمەن كەزدەسكەنىمە قاتتى قۋانىشتىمىن. مەن دە ءبيبىسارى سياقتى الەم چەمپيونى اتانعىم كەلەدى، - دەيدى كىشكەنتاي شاحماتشى.
راپيد جانە بليتستەن الەم چەمپيوناتى (FIDE World Rapid and Blitz ) - سپورت جانكۇيەرلەرىنىڭ كوپشىلىگى ءۇشىن شاحمات كۇنتىزبەسىندەگى ەڭ سۇيىكتى جانە اسىعا كۇتەتىن وقيعالاردىڭ ءبىرى. 2021 جىلى اۋقىمدى شاراعا 50 ەلدەن 200-گە جۋىق سپورتشى – الەم چەمپيوندارى مەن ۆيتسە-چەمپيوندارى، قازىرگى ەل چەمپيوندارى جانە الەمنىڭ رەيتينگى جوعارى شاحماتشىلارى قاتىستى.
بۇعان دەيىن اساۋباەۆا كلاسسيكالىق شاحماتتان 8, 10, 12 جانە 14 جاسقا دەيىنگى قىزدار اراسىندا الەم چەمپيونى، 7, 9 جاسقا دەيىنگى مەكتەپ وقۋشىلارى اراسىندا الەم چەمپيونى اتانعان.
"ادىرنا" ۇلتتىق پورتالى
